Ақ үй Қытайдағы Apple мен Alibaba-ның ЖИ серіктестігіне наразы — NYT
Дональд Трамп әкімшілігі Apple компаниясы мен Қытайдың ірі интернет-компаниясы Alibaba арасындағы серіктестікке наразы. Қытайда сатылатын iPhone-дарда Alibaba-ның жасанды интеллектісі қолданылмақ, деп хабарлайды The New York Times. Ақ үй бұл келісімге тосқауыл қоюға тырысуы мүмкін. Мұндай қадам Apple-ге Қытайдағы онсыз да әлсіреп тұрған позициясын одан әрі қиындатуы мүмкін. Ал iPhone құрылғыларында ЖИ-инновациясы болмаса, Apple Huawei секілді жергілікті бәсекелестермен күресте жеңілуі мүмкін.
Егжей-тегжейлі
The New York Times басылымының жазуынша, Ақ үй мен АҚШ Конгресінің өкілдері Apple мен Alibaba арасындағы серіктестіктен алаңдаулы. Себебі бұл келісім Alibaba-ның жасанды интеллектісін жетілдіруге, Қытайдағы цензураға бағынатын чат-боттардың ықпалын арттыруға және Apple-дің Қытайдың мәлімет беру мен цензураға қатысты заңдарына тәуелділігін күшейтуі мүмкін. Вашингтон Қытайдың жетілдірілген ЖИ-ді әскери мақсатта пайдалануы мүмкін деп қауіптенеді. Осыған байланысты Ақ үй Alibaba мен басқа да қытайлық компанияларды «қара тізімге» енгізу мәселесін талқылап жатыр. Бұл тізімге енген жағдайда америкалық компанияларға олармен жұмыс істеуге тыйым салынады.
Ақ үй бұл жайлы Apple басшылығымен тікелей сөйлескен. Шенеуніктер компаниядан келісімнің егжей-тегжейін, Alibaba-ға қандай мәліметтер берілетінін және Apple Қытай реттеушілері алдында қандай заңдық міндеттемелер алатынын сұраған. Наурыз айында Apple бұл сұрақтарға жауап бере алмаған, дейді басылым дереккөздері.
Apple, Ақ үй және Alibaba бұл мәселеге қатысты пікір білдіруден бас тартқан.
Apple үшін нені білдіреді
Егер Apple мен Alibaba арасындағы келісім жүзеге аспай қалса, бұл компанияның Қытайдағы позициясына елеулі соққы болып тиюі мүмкін, деп жазады The New York Times. Себебі Қытай — Apple-дің табысының бестен бірін қамтамасыз ететін маңызды нарық. Жергілікті серіктес ретінде Alibaba-мен әріптестік iPhone-да ЖИ функцияларын іске қосу үшін шешуші рөл атқарады. Қатаң реттеу мен жоғары бәсеке жағдайында Apple-ге ішкі нарық ойыншысы қажет. Онсыз компания Huawei мен Xiaomi секілді жергілікті бәсекелестерден қалып қоюы мүмкін, дейді басылым.
Arete Research сарапшысы Ричард Крамердің пікірінше, келісімнің болмауы Қытайдағы iPhone сатылымына теріс әсер етуі мүмкін. Alibaba — онлайн-сауда саласындағы ірі ойыншылардың бірі және ол Apple өнімдерін белсенді түрде жылжыта алады. «Адамдар iPhone сатып ала береді, бірақ таңдау жасау қиындай түседі», — дейді сарапшы. Ол сонымен қатар Apple-дің Қытайдағы нарықтағы үлесі 2023 жылғы 19%-дан 2024 жылы 15%-ға дейін төмендегенін еске салды.
Union Bancaire Privée басқарушы директоры Вей-Серн Лин: «Егер ЖИ бойынша келісім жүзеге аспаса, одан көбірек зиян шегетін — Apple. Ақыр соңында Apple-ге Қытайда ЖИ серіктесі қажет болады, әйтпесе оның смартфондары бәсекеге қабілетсіз болып қалады».
Акциялардың жай-күйі
19 мамырдағы сауда-саттықта Apple акциялары бір сәтте 3%-дан астам төмендеді, алайда кейін біршама қалпына келіп, күнді 1,2% минуспен жапты. Жыл басынан бері компанияның нарықтық құны шамамен 17% қысқарған. Салыстырмалы түрде: АҚШ-тың негізгі S&P 500 индексі сәйкес кезеңде 1,4% өсім көрсеткен.
MarketWatch дерегінше, Apple акцияларының динамикасын 49 сарапшы бақылауда. Олардың басым бөлігі (31) акцияны сатып алуға кеңес береді (Buy және Overweight рейтингтері). Тағы 14 сарапшы бейтарап көзқараста қалып, акцияларды портфельде ұстауды (Hold) ұсынады. Төрт сарапшы ғана сату керек деп есептейді (Underweight және Sell).
Уолл-стриттегі орташа консенсус-болжам бойынша, Apple акциясының мақсатты бағасы — $230. Бұл 19 мамырдағы жабылу бағасынан 10% жоғары.
Контекст
Alibaba-мен байланысты мәселелер Apple компаниясы үшін АҚШ пен Қытайдағы екі негізгі нарықта өз позициясын сақтап қалу жолында туындаған қиындықтардың қатарын толықтырып отыр. Бұл жағдай елдер арасындағы сауда және саяси шиеленістің күшеюі аясында орын алуда, дейді NYT.
«Керемет жетілік» компанияларының ішінде кедендік тарифтерге ең осалы — Apple, деп жазады The Wall Street Journal. Қытайдағы позициясы да әлсіреп келеді: соңғы тоқсанда бұл нарықтағы табысы 2,3%-ға қысқарған, бұл көрсеткіш сарапшылардың болжамынан әлдеқайда төмен болды. Apple өз орнын сақтап қалу үшін ЖИ-функциялары ендірілген iPhone үлгілеріне сенім артып отыр. Компания басшысының айтуынша, функциялар іске қосылған елдерде iPhone сатылымы жоғары. Алайда АҚШ пен Қытай арасындағы шиеленісті қарым-қатынас бұл жоспарлардың жүзеге асуына кедергі келтіруі мүмкін.
Apple-ге бағытталған сын тағы бір тараптан күшейе түсті: өткен аптада Таяу Шығысқа сапары кезінде Дональд Трамп компанияның бас директоры Тим Кукпен әңгімесінде «мәселе туындағанын» айтты. Айтуынша, бұл — Apple өндірісін Үндістанға көшірумен байланысты. «Біз сіздердің Үндістанда зауыт салғандарыңызды қаламаймыз, — деді Трамп. — Үндістан онсыз да дамып жатыр. Біз сіздердің мұнда, АҚШ-та салғандарыңызды қалаймыз».
