Алтын, Германия және S&P 500: қазір $5000-ды қайда инвестициялау тиімді?
Oninvest жеке капиталды басқарушы Владимир Тодрестен қазіргі уақытта $5000 көлемінде инвестиция жасағысы келсе, қайда құюды жөн көретінін сұрады. Оның пікірінше мұндай шағын сомаға үш акциядан құралған индекс қорын құру — тіпті фундаменталды және техникалық талдау болған жағдайда да — лотерея секілді болады. Өзінің алғашқы портфелін құрастыра бастаған және белсенді акция саудасымен айналысқысы келмейтін, кем дегенде бір жылдық инвестициялық көкжиегі бар адам үшін басқа стратегия лайықтырақ.
Жеке капиталды басқарушы акция сатып алудың орнына қаражатты үш тең бөлікке бөліп салуды ұсынады.
Алтынға инвестиция құю
2024 жылғы Еуропа Орталық банкінің есебіне сәйкес өткен жылы алтын әлемдегі екінші резервтік активке айналды — ол тек доллардан кейін тұр. Әлемдік орталық банктердің резервтеріндегі алтынның үлесі еуродан да асып түсті. Мұндай жағдай соңғы 40 жылдан бері алғаш рет қайталанып отыр. Жоғары құбылмалылық пен инфляция жағдайында алтын — қорғаушы актив болып саналады, дейді Владимир Тодрес.
Ол осы қымбат металға инвестиция құюдың екі жолын ұсынады.
Бірінші әдіс — алтын металл шотын (XAU) ашу. Мұндай шотты кез келген жерде ашу мүмкін емес, тек Швейцария, Люксембург немесе Германия секілді кейбір юрисдикцияларда ғана ашуға болады. Бұл жағдайда инвестордың қолында физикалық алтын құймалары болмайды — бұл алтын бағасына байланған қарапайым ақшалай шот. Оның басты артықшылығы — өтімділіктің жоғары болуы. Құймаларды сақтау мен тасымалдаудың қажеті жоқ. Сонымен қатар, кейбір елдерде алтын металл шоттары қосылған құн салығынан (ҚҚС) босатылады, мысалы, Швейцарияда. Дегенмен, басты кемшілігі — банк банкротқа ұшыраған жағдайда мұндай шоттар банк активтерінің жалпы массасына кіреді, сондықтан оларға басқа кредиторлар да таласа алады.
Екінші әдіс — алтынды ETF арқылы сатып алу. Мысалы, iShares Physical Gold немесе Xetra-Gold қорларына инвестиция салуға болады. Бұл әдістің де өз кемшіліктері бар: қорды басқарғаны үшін комиссия төлеу қажет. Дегенмен, пай иесі өз үлесін кез келген уақытта сатып ала алады.
Бүгінде алтын бағасы АҚШ-тың ЖІӨ-не (Gold price/US GDP) қатысты 2012 жылғы деңгейде тұр — бұл тұрақты кезең болған. Сондықтан алтын бағасының әлі де өсу әлеуеті бар деуге болады, дейді Тодрес. UBS инвестициялар жөніндегі директоры Марк Хефеле де осы пікірді қолдайды. Ол алтын унциясының бағасы $3800-ге дейін өсуі мүмкін деп болжап отыр. 16 маусымдағы жағдай бойынша алтын шамамен $3400 деңгейінде саудалануда.
Германияға бәс тігу
Қаражаттың екінші бөлігін Тодрес неміс DAX индексін қайталайтын еуропалық ETF-ке инвестициялауды ұсынады. Ұзақ уақыт бойы бұл нарық әлемдік жетекші индекстермен салыстырғанда бағаланбай келді. DAX бір жылда 33%-ға өскеніне қарамастан, оның бағалау коэффициенті P/E — 18,58. Салыстыру үшін: Nasdaq 100-де бұл көрсеткіш — 32,22, ал S&P 500-де — 24,46.
DAX өсімін Германияның қайта индустрияландыруына бағытталған мемлекеттік қаржылық ынталандырулар күтілімі қолдайды. Әсіресе, қорғаныс өнеркәсібіне салынатын инвестициялар индекс құрамындағы негізгі компаниялардың өсуін ынталандыруда. Тодрестің айтуынша iShares Core DAX — осы индекске арналған жетекші және өтімді қорлардың бірі. Ол шағын портфель үшін кең ауқымды әртараптандыруды қамтамасыз ете алады. Жыл басынан бері оның бағамдары 17,8%-ға өсті.
S&P 500-ге бәс тігу
Егер бұл $5000 — алғашқы инвестиция болса, онда технологиялық компанияларсыз портфельді елестету қиын, өйткені дәл осы сектор америкалық нарықтың өсу қарқынын белгілейді, дейді Тодрес. Сондықтан қалған үшінші бөлікті S&P 500 индексіне салу орынды.
Индекске 500 ірі америкалық компания кіргенімен, оның 34% үлесі технологиялық алпауыттарға — «Ғажайып жетілікке» тиесілі. Бір жылда индекс 10%-ға, ал жыл басынан бері — 1,6%-ға өсті (13 маусымдағы жабылу деректері бойынша).
Бұл жағдайда инвестиция үшін iShares Core S&P 500 биржалық қоры ыңғайлы болар еді. 2024 жылдың 13 маусымынан 2025 жылдың 13 маусымына дейін оның өсімі 12%-дан сәл асты, ал жыл басынан бері шамамен 2%-ға өсті. Технология секторынан кейінгі ең ірі үлес қаржы секторына тиесілі.
Владимир Тодрестің пікірінше осындай тәсіл $5000 көлеміндегі салыстырмалы түрде шағын сомаға да әртараптандырылған портфель құрып, құбылмалылықтан қорғанып әрі өсу мүмкіндігін пайдалануға мүмкіндік береді.
Басқа юрисдикциялардағы инвестициялар алдында қосарланған салық салу қаупіне байланысты салық кеңесшісінен кеңес алған жөн.
