Алтында әлемдік ралли: Орталық банктер тоқтамай сатып алып жатыр
Әлемнің орталық банктері алтын бағасының рекордтық деңгейіне қарамастан сатып алу көлемін ұлғайтты. Үшінші тоқсанда олар алдыңғы тоқсанмен салыстырғанда қымбат металды 28% көп сатып алған. Мұндай белсенділіктің себебі — АҚШ долларының әлсіреуі мен геосаяси тұрақсыздық жағдайында резервтерді қорғау талпынысы. Ал Уолл-стрит сарапшыларының бірі раллидің жақында бәсеңдеуін болжаса, енді бірі алтын бағасының өсімінің жалғасуына сенімді.
Егжей-тегжейлі
Орталық банктер алтын бағасының рекордтық деңгейіне қарамастан үшінші тоқсанда сатып алуды айтарлықтай ұлғайтты, деп жазды Bloomberg. Бірқатар елдер алтынды АҚШ долларының әлсіреуінен қорғайтын сенімді құрал ретінде қарастырып, нарыққа қайта оралды. Шілде мен қыркүйек аралығында орталық банктер 220 тонна бағалы металл сатып алған, бұл алдыңғы тоқсанмен салыстырғанда 28% көп, деп хабарлады Дүниежүзілік алтын кеңесі (WGC).
2025 жылдың алғашқы тоғыз айында орталық банктердің алтын қоры 634 тоннаға артты — бұл соңғы үш жылдағы көрсеткіштерден аз, бірақ 2022 жылға дейінгі деңгейден едәуір жоғары. WGC болжамынша, жыл қорытындысында алтын сатып алу көлемі 750–900 тонна шамасында құрайды. «Геосаяси шиеленістің күшеюі, инфляциялық қысымның сақталуы және жаһандық саудадағы белгісіздік инвесторлардың қорғаныс активтеріне деген қызығушылығын арттыруда», — деді WGC аға сарапшысы Луиза Стрит.
Алтын бағасының ахуалы
30 қазандағы саудада спот-алтын бағасы 2% күрт өсіп, $4014-ға жетті. Соңғы түзетулерге қарамастан, жыл басынан бері қымбат металл шамамен 50% қымбаттады, ал қазан айының басында бір трой унциясы $4380-дан асып, тарихи рекорд орнатты. Bloomberg атап өткендей, бағаның өсуіне негізінен орталық банктердің белсенді сатып алуы және инвесторлардың өз портфельдерін тәуекелдерден қорғауға деген ұмтылысы әсер етті.
Алда не болмақ?
Citi 27 қазанда алдағы үш айға арналған алтын бағасына болжамын унциясына $4000-дан $3800-ға төмендетті — бұл қазіргі өзекті бағадан шамамен 5% төмен, деп хабарлады Reuters. Банк мұны АҚШ пен Азия елдері арасындағы сауда келіссөздері және Қытайдың диалогқа дайын екені туралы белгілерінің пайда болуы сияқты факторлармен түсіндірді, бұл нарықтағы белгісіздікті азайтты. Citi пікірінше, қысқа мерзімде алтынға инфляцияның баяулауы мен АҚШ үкіметінің шатдауының аяқталуы әсер етуі мүмкін. Дегенмен, орта және ұзақ мерзімді перспективада банк алтынды геосаяси және экономикалық тәуекелдерден қорғанудың сенімді құралы ретінде оң бағалап отыр.
Ал Уолл-стриттегі басқа сарапшылар алтын раллиі 2026 жылы да жалғасады деп күтуде: UBS алтын бағасы келесі жылдың бірінші тоқсанының соңына қарай унциясына $4700-ға, ал Goldman Sachs — 2026 жылдың соңына қарай $4900-ға дейін өседі деп болжайды.
«FOMO (пайданы жоғалту қорқынышы) аясында алтын құймалары мен монеталарына сауда қызып тұр, оған геосаяси шиеленіс те әсер етуде, сондықтан біз жыл қорытындысы бойынша оң болжамды сақтап отырмыз, — деп атап өтті Дүниежүзілік алтын кеңесі. — Алтын бағасының тез өсуі бұл жолы өткен жылдардағыдай тежеуші факторға айналған жоқ».
