Алтыннан медицинаға дейін: қарашадағы жаппай сатылымнан аман қалған жеті акция
Barron’s қараша айында жасанды интеллект саласындағы акциялардың артық бағалануына қатысты инвесторлар арасында туындаған дүрбелең кезінде өз құнын сақтап қалған компаниялардың акцияларын анықтады. 28 қазан мен 20 қараша аралығында бұл акциялар арзандап қана қоймай, кемінде 5 пайызға өскен. Таңдауға баға/табыс көрсеткіші 20-дан аспайтын акциялар ғана енген. Осы критерий бойынша Google-дің бас компаниясы Alphabet тізімге кірмей қалды.
Тізімнің басында — әлемдегі ең ірі деректер сақтау құрылғыларын өндірушілердің бірі Western Digital тұр. Бұл технокомпанияның акциялары сатылым кезінде 12 пайызға, ал қарашадағы ең төменгі деңгейден кейін тағы 13 пайызға өсті. Жыл басынан бері Western Digital-дің нарықтық құны 260 пайызға артты. ЖИ саласындағы серпіліс бұл өсімге үлкен үлес қосты. Уолл-стрит сарапшыларының пікірінше, бұл акциялардың әлі де 13 пайызға өсу әлеуеті бар. Баға/табыс көрсеткіші 13,1 болғандықтан, олар инвесторлар үшін тартымды болып саналады. Аналитиктердің 75 пайызынан астамы бұл акцияларды сатып алуға кеңес береді.
Екінші орында — алтын өндіруші Newmont компаниясы. Қазан айының ортасында күрт төмендегеннен кейін, алтын бағасы қайтадан тұрақты түрде өсіп жатыр. Бұл өсім Newmont-тің табысына оң әсер етуде. Компанияның акциялары жыл басынан бері 144 пайызға қымбаттады, ал олардың қазіргі бағасы 13 еселік таза табысқа негізделіп бағалануда. Уолл-стриттегі 29 сарапшының 23-і бұл акцияларды сатып алуға кеңес береді. Орташа болжамға сәйкес, компанияның нарықтық құны тағы 17 пайызға артуы мүмкін.
Фармацевтикалық Merck компаниясы да нарықтағы тербелістерден аман қалып, қайта қалпына келу кезеңінде өсті. Оның баға/табыс көрсеткіші — 14,8. Жыл басынан бері Merck-тің нарықтық құны 5,5 пайызға ғана өскен. Салыстырмалы түрде, S&P 500 индекісі осы уақыт аралығында 16 пайыздан астам қосқан. Сарапшылардың пікірі екіге бөлінген: 16 адам акцияны сатып алуға кеңес береді, 13-і ұстап тұруды ұсынады. Сатуға шақырған ешкім жоқ. Акциялардың орташа мақсатты бағасы қазіргі нарықтық бағамен шамалас.
Barron’s тізіміне бұдан бөлек тағы төрт компания енген: денсаулық сақтау саласындағы Centene, дизель қозғалтқыштарын өндіруші Cummins, күн панельдерін шығаратын First Solar және ауруханалар желісі Universal Health Services.
Контекст
Кейінгі апталар нарық үшін күрделі сынақ болды. Barron’s жазуынша, инвесторлар ЖИ саласындағы акциялардың тым жоғары бағалануы салдарынан қобалжыған. Қазанның соңы мен 20 қараша аралығында S&P 500 индексі 5 пайызға төмендеді, алайда кейін бұл төмендеуді дерлік толығымен өтеді.
Енді, ФРЖ желтоқсанда пайыздық мөлшерлемені төмендетеді деген үміт аясында, Алғыс айту аптасында S&P 500 2012 жылдан бергі ең жақсы апталық өсімді көрсетті. Бірақ ЖИ-ге қатысты алаңдаушылық сейілген жоқ. Уолл-стрит әлі де чип өндірісіндегі көшбасшылық үшін кімнің алда болатынын болжауға тырысып жатыр. Ал инвесторлар, егер нарықтағы қалпына келу тежелсе, портфелін қорғаудың жолдарын іздеуде.
