Amazon робот-такси нарығында Alphabet және Tesla-мен бәсекеге түсті
АҚШ-тағы ең ірі интернет-дүкен мен AWS бұлттық платформасының иесі — Amazon — Лас-Вегас көшелерінде Zoox робот-таксиін сынақтан өткізуді бастады. Алпауыт бес жыл бұрын сатып алған стартап қазір Tesla Robotaxi және Alphabet-тің Waymo жобасымен бәсекелесуде.
Егжей-тегжейлі
Zoox робот-таксиінің таныстырылым сапарлары 10 қыркүйекте Лас-Вегастың бірнеше нүктесінен басталды, ал алдағы айларда стартап ауқымды кеңейтуді жоспарлап отыр, деп хабарлайды CNBC. Перспективада жүріс ақылы болмақ, бірақ Zoox атап өткендей, ол үшін алдымен реттеушілерден коммерциялық пайдалануға рұқсат алу қажет.
Лас-Вегастағы бастамадан кейін Zoox жыл соңына дейін Сан-Францискода ерте қолжетімділік бағдарламасын іске қосуды жоспарлап отыр, онда да Лас-Вегас секілді 50 көліктен тұратын паркін сынақтан өткізіп жатыр. Келесі қалалар — Остин мен Майами. Бұдан бөлек, компанияның қайта жабдықталған сынақтық көліктері Лос-Анджелес, Атланта және Сиэтл көшелерінде де жүріп жатыр.
Лас-Вегаста Zoox-тың 1,8 гектарлық (шамамен үш футбол алаңы көлемінде) депосы бар. Онда ондаған көлік сапарға дайын тұр. Қаланың бірнеше нүктесінен смартфон арқылы жол жүруді тапсырыс беруге болады.
Zoox бұл технологиясын Лас-Вегаста 2019 жылдан бері сынақтан өткізіп келеді. Жолаушылармен тестілік сапарлар 2023 жылы басталған, ал 2025 жылдың шілдесінде компания Resorts World-те баршаға арналған демо-сапарларды іске қосты.
Робот-такси нарығы әлі қалыптасу үстінде
Amazon бес жыл бұрын $1,3 млрд-қа сатып алған Zoox ресми түрде АҚШ-тағы робот-такси жарысына қосылды. Стартаптың америкалық нарықтағы негізгі бәсекелестері — Alphabet-тің Waymo және Tesla болады.
Waymo әлдеқайда алда: ол коммерциялық жүргізушісіз сапарларды 2020 жылы іске қосқан. Жыл басынан бері Waymo 10 млн ақылы сапар көрсеткішінен асып, қазір бес қалада жұмыс істеп тұр. Келесі жылы сервис Даллас, Денвер, Майами, Сиэтл және Вашингтонда да іске қосылады.
Tesla маусымда Техас штатының Остин қаласында салонда адам-бақылаушысы бар шектеулі робот-такси сервисін сынақтан өткізе бастады.
«Біз мұның әлі тек бастамасы екенін және бұл саланың болашағы әзірге анықталмағанын ойлаймыз», — деді Zoox теңқұрушысы әрі техникалық директоры Джесси Левинсон CNBC тілшілерімен демонстрациялық сапар кезінде.
Робот-такси толыққанды сервисін құру мен іске қосуға кететін орасан шығындарды ескерсек, Zoox-тен 2030 жылға дейін пайда күтуге болмайды — тіпті мүлдем болмауы мүмкін, деп санайды зерттеу компаниясы Telemetry вице-президенті Сэм Абуэльсамид.
Соған қарамастан Amazon шыдамды болуға ниетті. 2020 жылғы мәміледен бері компания Zoox-қа миллиардтаған доллар құйды және енді, ақыры, нәтижесін әлемге көрсете алады, деп жазады CNBC.
Zoox деген не?
Zoox 2014 жылы, Google-дан кейін Waymo-ға айналған жобасын іске қосқаннан бес жыл өткен соң құрылды. Бәсекелестер көліктердің дайын үлгілерін бейімдеп, оларға сенсорлар мен софт қосып жатқанда, Zoox жаңа бөлшектерді 3D-принтерлерде басып шығарды, деп хабарлады телеарнаға электромобиль жасау процесімен таныс дереккөздер. Биыл Zoox Калифорниядағы штаб-пәтеріне жақын Хейвард қаласында жаңа өндірістік кәсіпорнын ашты. Қазір зауыт тәулігіне бір ғана көлік шығарып жатыр, бірақ толық қуатқа шыққанда сағатына үш робот-такси өндіре алады — бұл жылына шамамен 10 000 көлік. Салыстыру үшін, Waymo-ның коммерциялық паркіндегі көліктер саны 2000-нан асады.
Zoox робот-таксиі әдеттегі көлікке ұқсамайды. Руль мен педаль жоқ, ал тікбұрышты пішіні үшін салада оны «дөңгелектегі тостер» деп атап кеткен, деп жазады телеарна. «Әрине, автономды жүргізу жүйесін кәдімгі көлікке енгізуге болады, бірақ ол ымырашыл шешім болар еді, — деді Левинсон CNBC-ге берген сұхбатында Лас-Вегаста. — Біз басқа жолды таңдадық — бәрін нөлден бастап жасап, кәдімгі көліктен әлдеқайда жақсы өнім шығаруға инвестиция салдық».
Робот-таксиде орындықтар екі қатар болып, бір-біріне қарама-қарсы орналасқан. Алдыңғы және артқы бөліктері симметриялы: көлік бұрылмай-ақ кез келген бағытта қозғала алады. Zoox-тың заряды 16 сағатқа жетеді.
«Бұл қайта жабдықталған көлік емес, — деп атап өтті CNBC-ге берген сұхбатында Zoox бас директоры Айша Эванс. — Біз көлікті жолаушының айналасына жасақтап, нөлден бастап жобаладық».
