Америкалықтар үнемдеуге көшті: Dollar Tree пайда болжамын арттырды
АҚШ-та арзан бағамен тауар сататын Dollar Tree дүкендер желісі акцияға шаққандағы жылдық пайда болжамын көтеріп, тоқсандық көрсеткіштерімен сарапшылар үмітін ақтады. Бұл өсімге Хэллоуин кезіндегі рекордтық сатылым мен 3–5 доллар тұратын тауарлар санын арттыру себеп болды. Бұл қадам жоғары пайда әкелетін тауар үлесін көбейтті. 3 желтоқсандағы саудадан кейін компания акциясы 4%-ке жуық өсті.
Егжей-тегжейі
Dollar Tree соңғы жылдардағы ең мықты тоқсандардың бірін өткізді. 2025 жылдың 1 қарашасында аяқталған үшінші қаржылық тоқсанда сатылым 9,4%-ке артып, 4,7 млрд долларға жетті. Акцияға шаққандағы түзетілген пайда 1,21 доллар болды. Бұл 12% өсім. Сарапшылар (LSEG деректері бойынша) 4,7 млрд доллар және 1,09 доллар күтті, деп хабарлайды Reuters.
3 желтоқсандағы саудада компания акциялары 4%-ке жуық өсті, ал бейсенбі күні таңертең тағы 0,7%-ке қымбаттады. Жыл басынан бері Dollar Tree акциялары 50%-ке өсіп, жалпы нарықтан озды.
Quartz жазуынша, 2025 жылғы Хэллоуин маусымы компания үшін рекордтық кезең болды. Ұқсас сатылымдар 4%-тен астам өсті, ал орташа түбіртек сомасы 4,5%-ке артты. Бұл — бөлшек саудада сатып алушы саны азайған уақытта жақсы нәтиже.
Dollar Tree 3, 4 және 5 долларлық тауарлар санын көбейтіп, негізгі 1,25 долларлық бағаны сақтап қалды. Бұл арқылы жоғары пайда әкелетін тауар сатылымы 5%-ке жуық өсті, ал жалпы ішіндегі үлесі 50%-тен асты.
Компания төртінші тоқсан мен 2025 жылға арналған жаңа болжамдар ұсынды. GuruFocus сарапшыларының пікірінше, бұл көрсеткіштер инвесторларға қызық болуы мүмкін. Dollar Tree бұрынғы 4–6% орнына ұқсас сатылым өсімін 5,0–5,5% шегінде күтеді. Кіріс бойынша болжам да нақтыланды. Енді 19,35–19,45 млрд доллар деп болжанып отыр (бұрын 19,3–19,5 млрд доллар болатын). Жылдық түзетілген пайда болжамы өзгеріссіз қалды — акцияға шаққанда 5,60–5,80 доллар.
Контекст
Dollar Tree жетістігі АҚШ-та тұтынушылық белсенділіктің әлсіреген тұсына сәйкес келді. Орташа табысы бар отбасылар артық шығыннан бас тартып, үнемдеуге көшкен. Бұл жағдай ірі сауда желілеріне кері әсер етуде. Бірақ Dollar Tree, керісінше, арзандау тауарға бет бұрған тұтынушылар мен қолжетімді, ұсақ сауда іздегендер есебінен ұтып отыр, дейді Quartz.
Reuters агенттігіне берген пікірінде eMarketer сарапшысы Зак Стэмбор: «Dollar Tree қазіргі экономикалық жағдайда ұтымды позицияда тұр. Көп адам сатып алудан барынша пайда іздейді. Мерекелік кезеңде қолжетімді баға басты орынға шығады, ал мұндай ұсыныс жасай алған дүкендер тұтынушы назарын тартады», — деді.
Компания басшысы Майкл Кридонның айтуынша, Dollar Tree-дің жаңа тұтынушыларының 60%-тен астамы жылдық табысы 100 000 доллардан асатын отбасылар. Ол дүкендерге тек арзан баға іздейтін дәстүрлі тұтынушылар ғана емес, сонымен қатар орта және жоғары табысты адамдар да жиі келе бастағанын айтты. Бұл — үнемдеу бағытындағы әдеттің кеңейгенін білдіреді, деп жазады Axios.
