Apple xAI көмегімен ЖИ бойынша қалып қоюын жоя ала ма?
Apple Илон Масктың xAI жасанды интеллект стартапын iPhone-ның жаңа буыны мен басқа да өнімдеріне қолдана алар еді, деп санайды Melius Research сарапшылары. Бұған дейін Apple Siri дауыстық көмекшісіне OpenAI-дың ChatGPT не Google-дың Gemini жүйесін қосуды немесе Perplexity стартапын сатып алуды қарастырған болатын. Алайда компания әлі нақты шешім қабылдамады және жасанды интеллектті енгізу бойынша бәсекелестерінен қалып қойды. Melius-тің айтуынша Apple-дің әзірге өз ЖИ-ын жасауға үміті де жоқ.
Егжей-тегжейлі
Melius сарапшысы Бен Райтцестің айтуынша Илон Масктың xAI компаниясы — Apple-ге жасанды интеллект саласындағы технологиялық артта қалуды еңсеруге көмектесе алатын дәл сол серіктес.
«Apple xAI-ға өз қолданушыларының базасына қолжетімділік беру арқылы OpenAI-ды (ChatGPT жасаушысы) басып оза алатын мүмкіндікке ие болар еді. Мұның орнына компания ауқымды тілдік модельге (LLM) иелік етудің барлық артықшылықтарына ие болар еді — бірақ бұл үшін үлкен инвестициялар салудың қажеті жоқ», — деді Райтцес 21 шілдедегі Barron’s жариялаған жазбасында.
Алайда мұндай келісімдегі әлсіз тұс — Apple-дің сыртқы әрі даулы серіктеске тәуелді болуы мүмкін. Мәселен, жуырда xAI-дың Grok атты чат-боты антисемиттік жазбалар жариялаған. Компания бұл жазбаларды өшіріп, чат-боттың мұндай әрекеті жүйедегі рұқсат етілмеген өзгерістер салдарынан орын алғанын айтты.
Apple Barron’s-тың ЖИ бойынша жоспарларына қатысты сауалына жауап бермеді.
Серіктес таңдау қиындығы
Apple бірнеше рет Siri-ге жасанды интеллект қосылған нұсқасын ұсынуды кейінге шегерді. Бұл мақсатта ChatGPT (OpenAI), Gemini (Google), Claude (Anthropic), тіпті Қытай нарығына арналған Alibaba Group-тың ЖИ-ы қарастырылған. Алайда шешімнің жоқтығы iPhone сатылымының өсімін қайта қалпына келтіруге деген үмітті азайтты — бұл көрсеткіш 2022 қаржы жылында $205 млрд-қа жеткеннен кейін тоқырап қалды, деп жазады Barron’s.
Apple-дің өзі дербес ЖИ мүмкіндіктері бар iPhone шығаруы екіталай көрінеді. Жақында компаниядан машиналық оқыту саласындағы жетекші зерттеуші Руомин Пан кетті — ол негізгі модель бойынша топты басқарған. Пан енді Meta Platforms-та жұмыс істейді.
Apple-дің операциялық жүйесі жабық құрылымға ие және компания пайдаланушы деректерін қорғауды желеу етіп, сыртқы әзірлеушілерге қолжетімділікті шектейді. Платформаларын қатаң бақылауда ұстау стратегиясы Apple-ді жасанды интеллект жеткізушісін сатып алуға итермелеуі мүмкін. Сарапшылар жиі Perplexity-ді осындай ықтимал нысана ретінде атайды.
Perplexity-ді сатып алу Apple-ге $20 млрд-тан астам шығын әкелуі мүмкін — стартаптың соңғы бағалауы $18 млрд. Алайда бұл келісім Apple акцияларының өсуін қолдауы мүмкін, дейді Райтцес. Оның есебінше, егер 100 млн Apple қолданушысы жылына $200 тұратын Perplexity Pro Tier жазылымын сатып алса, бұл Safari браузеріндегі әдепкі іздеу үшін Google жыл сайын төлейтін $20 млрд табыстың жоғалуын толық өтей алады.
xAI өнімдеріне жазылымнан Apple үлес алатын серіктестік моделі де Google-пен серіктестіктен түсетін табысты алмастыра алар еді, дейді Melius.
«Тим Кук пен оның командасы егер ЖИ саласында ілгерілеуді жеделдету үшін ыңғайлы аймақтан шығуға батылдық танытса, нарық оларды соған сай марапаттайды», — деп түйіндейді Райтцес.
Сарапшы Apple акцияларына «сатып алу» рейтингін сақтап отыр және олардың мақсатты бағасы ретінде $240 атады — бұл қазіргі бағадан 13% жоғары.
Apple-ге ЖИ мәселесін шешуді тағы кім ұсынды
LightShed Partners зерттеу компаниясының сарапшылары Уолтер Пайсек пен Джо Галоне 9 шілдедегі жазбасында Apple бас директоры Тим Кукты жаңасымен ауыстыру туралы ойлануға шақырды. Себебі компанияның ЖИ саласындағы проблемалары айтарлықтай тәуекел тудырып отыр.
«ЖИ бағытындағы қателік Apple-дің ұзақ мерзімді дамуына және өсім әлеуетіне түбегейлі кері әсер етуі мүмкін», — дейді олар. Сарапшылардың пікірінше, жаһандық салаларды түбегейлі өзгертіп жатқан жасанды интеллект дәуірінде Apple батыл әрі түбегейлі шаралар қабылдамаса, артта қалып қоюы мүмкін.
