Apple Siri-дегі ЖИ-ін OpenAI немесе Anthropic модельдеріне алмастыруы мүмкін
Apple Siri-де қолданылатын өз ЖИ-модельдерін жасаудан бас тартып, OpenAI немесе Anthropic технологияларын пайдалануға көшуі мүмкін. Бұл қадам генеративті жасанды интеллект жарысындағы сәтсіздіктерді еңсеруге талпыныс болмақ, деп хабарлайды Bloomberg. Егер осындай шешім қабылданса, бұл компанияның технологиялық артта қалғанын мойындаумен қатар, Apple үшін бетбұрыс сәті болады. Bloomberg материалы жарияланғаннан кейін Apple акциялары 3% өсті.
Егжей-тегжейлі
Apple жаңа Siri нұсқасында Anthropic немесе OpenAI-дің жасанды интеллект технологияларын қолдануды қарастырып жатыр, ал өз моделдерін шетке ысыруы мүмкін, деп хабарлады Bloomberg дереккөздері. Олардың мәліметінше, компания екі стартаппен де келіссөздер жүргізіп, Claude және ChatGPT чат-боттарының арнайы нұсқаларын дайындауды сұраған. Бұл нұсқалар Apple-дың бұлттық инфрақұрылымында жұмыс істеуі тиіс. Apple ЖИ-модельдерін өз серверлерінде орналастыру деректердің құпиялығын жақсырақ қорғайды деп есептейді, деп жазады Bloomberg.
Егер Apple шынымен осындай қадамға барса, бұл компания стратегиясындағы үлкен өзгеріс болмақ, деп атап өтті агенттік. Қазіргі уақытта Apple-дың ЖИ функцияларының көпшілігі өз технологияларына негізделген, әрі бастапқыда осы модельдерге негізделген жаңа Siri нұсқасы 2026 жылы шығарылады деп жоспарланған еді. Anthropic-тің Claude немесе OpenAI-дің ChatGPT моделіне көшу гаджет өндірушісінің генеративті ЖИ саласында бәсекеге төтеп бере алмай отырғанын көрсетеді. Қазірдің өзінде Siri интернеттен ақпарат іздеу үшін ChatGPT-ке жүгіне алады, бірақ негізінен Apple-дың ішкі технологияларында жұмыс істейді.
Bloomberg дереккөздерінің айтуынша, үшінші тарап модельдерін зерттеу әлі бастапқы кезеңде, серіктестікке қатысты түпкілікті шешім қабылданған жоқ. Компания өз ЖИ-ін пайдаланатын LLM Siri жобасын жасауды жалғастырып жатыр. Дегенмен, менеджмент «сыртқы» шешімдерді қолдану идеясына бұрынғыдан ашығырақ қарай бастады, деп көрсетеді агенттік. Bloomberg-тің жазуынша, сыртқы компаниялармен серіктестік қысқа мерзімде серпіліс жасауға мүмкіндік беруі мүмкін — Apple ішіндегі қазіргі көңіл күй осылай сипатталған.
Үш компанияның да өкілдері агенттікке түсініктеме беруден бас тартты.
Apple акциялары Bloomberg материалы жарияланғаннан кейін 3% секіріп, бірақ сауда сессиясы соңында 2%-дық өсіммен ғана жабылды. Биыл компанияның құны 18% қысқарды.
Siri-дегі мәселелер
Үшінші тарап модельдерін бағалау жұмысын Siri басшысы Майк Роквелл мен бағдарламалық қамтамасыз ету бөлімінің жетекшісі Крэйг Федериги бастаған, дейді Bloomberg. Бұл жобаға олар Apple Intelligence-тің сәтсіз таныстырылымы мен Siri функцияларының кешігуінен кейін, ЖИ бағытының бұрынғы басшысы Джон Джаннандреадан өкілеттіктерін алған соң кіріскен.
Apple-дың дауыс көмекшісі Siri танымал чат-боттардан артта қалып отыр, ал оны жақсарту әрекеттері техникалық қиындықтарға тап болуда. Бір жыл бұрын компания Siri-ге пайдаланушының жеке деректеріне қол жеткізу, экрандағы контентті талдау және қосымшалар мен құрылғы функцияларын дәлірек басқару сияқты жаңа мүмкіндіктерді таныстырған. Бірақ бұл жаңартулар дайын болудан әлі алыс еді. Алдымен оларды 2025 жылдың басында шығару жоспарланған, кейін релиз кейінге қалдырылды.
Маусым айының басындағы соңғы әзірлеушілер конференциясында да Apple ЖИ жарысындағы артта қалуын жоя алатындай ештеңе ұсына алмады, деп бағалады Уолл-стрит сарапшылары. Forrester Research-тің сарапшысы Дипанджан Чаттерджи: «Қанша жерден мәтінді автотүзету мен күлкілі эмодзилер қоссақ та, олар Siri-де болуы тиіс интуитивті, интерактивті ЖИ жүйесінің орнын толтыра алмайды», — деді.
Apple-ға тағы кім көмектесе алады?
Bloomberg мәліметінше, Apple жасанды интеллект бойынша Perplexity AI стартапын сатып алуды да қарастырған. Бұл қадам ЖИ жобаларын күшейтуге мүмкіндік берер еді. Сонымен қатар, компания OpenAI-дің бұрынғы техникалық директоры Мира Муратти негізін қалаған Thinking Machines Lab стартапымен де келіссөздер жүргізген.
Егер Apple Perplexity AI-ды шынымен сатып алса, бұл бірқатар маңызды мәселелерді шешуге көмектеседі, деп жазды өткен аптада Bank of America сарапшысы. Мысалы, компания дауыс көмекшісіне жылдам іздеу мүмкіндігін қосып, әдепкі іздеу жүйесі ретінде Google-ға тәуелділікті азайтып, акцияларының өсуіне жаңа серпін береді.
