aTyr акциялары 80%-ға құлдырады: сарапшылар неге сатып алуға кеңес бермей отыр?
Freedom Broker және басқа да аналитиктер өкпе саркоидозы бар науқастарға арналған терапияны әзірлейтін шағын капитализациялы компания — aTyr Pharma акцияларының рейтингін төмендетті. Оның басты дәрі-дәрмек кандидаты клиникалық сынақтардың соңғы кезеңінде плацебомен салыстырғанда айтарлықтай тиімділік көрсетпеді. Бұл оның мақұлдану мүмкіндігін азайтады және компанияның болжамды қаржылық көрсеткіштеріне кері әсер етеді, деп көрсетіледі аналитиктердің есебінде.
Егжей-тегжейлі
Freedom aTyr Pharma акцияларының рейтингін «сатып алудан» «ұстауға» дейін төмендетті, ал мақсатты бағасын 9,5 есе қысқартып, бар болғаны $1 деп белгіледі, делінген компанияның зерттеу жазбасында (Oninvest порталында бар).
Аналитиктер бұл ұсынысты aTyr компаниясы өз басты дәрі-дәрмек кандидаты — эфзофитимодтың соңғы фазадағы клиникалық сынақтарда плацебомен салыстырғанда айтарлықтай жақсы нәтиже көрсетпегенін хабарлағаннан кейін өзгерткен. Бұл компания акцияларының күрт құлдырауына себеп болды — 15 қыркүйек күні олардың құны бір күнде 83%-ға төмендеп, $1 деңгейіне дейін түсті.
aTyr болашағына қатысты болжамдарын Freedom ғана емес, басқа да сарапшылар қайта қарауда. BioPharma Dive порталының жазуынша Cantor Fitzgerald-тың сарапшысы Прахар Агравал зерттеу нәтижелерінен кейін компания акцияларына neutral (бейтарап) рейтингін берді, ал Leerink Partners өкілі Фейсал Куршид — market perform (нарықпен қатар) деп бағалады (екеуі де «ұстау» ұсынысына сәйкес келеді).
aTyr нені зерттеді
aTyr эфзофитимодты өкпенің саркоидозымен ауыратын науқастарда сынады — бұл қабыну ауруы, көбіне фиброзға әкеліп соғады, ал ол өз кезегінде қанның оттекпен қанығуын қиындатады. Қазіргі таңда бұл диагноз қойылған адамдар ұзақ уақыт бойы қабынуға қарсы — стероидты дәрі-дәрмектерді қабылдауға мәжбүр. Алайда, олардың жанама әсерлері болуы мүмкін, бұл қосымша ем қабылдауды талап етеді. aTyr мәлімдемесіне сәйкес эфзофитимод стероидтардың мөлшерін айтарлықтай азайтуға көмектеседі.
Алайда нәтиже кұткеннен басқа нәтижелер көрсетті. Эфзофитимод қабылдаған науқастарда стероидтардың орташа тәуліктік дозасы 2,79 мг дейін азайған, ал плацебо қабылдағандарда — 3,52 мг дейін. Компанияның айтуынша мұндай айырмашылық клиникалық тұрғыдан маңызды деп саналмайды.
«Плацебо тобында науқастардың 40%-ы стероидтарды толықтай тоқтатқан. Бұл зерттеушілер үшін күтпеген жағдай болды. Нақты медициналық тәжірибеге сүйенсек, мұндай көрсеткіш 10–15%-дан аспауы тиіс еді», — делінген Freedom шолуында.
Келесі қадамдар
aTyr өз препараты тиімді деп санайды және оны саркоидозбен ауыратын науқастарда қолданудың келесі қадамдарын талқылау үшін салалық реттеуші органмен кездесуді жоспарлап отыр.
Freedom бұл кездесу 2026 жылдың алғашқы тоқсанында өтуі мүмкін деп есептейді және терапияның мақұлдану ықтималдығы бұрынғыдан төмен екенін атап өтеді. Бұл компанияның қаржылық болжамдарына кері әсерін тигізеді, деп жазады аналитиктер. Тамыз айында олар компанияның алғашқы табысын 2027 жылы $59,6 млн деңгейінде күтті. Енді олардың жаңа болжамы бойынша, бұл көрсеткіш $30 млн-нан аспайды.
Куршидтің пікірінше препараттың артықшылықтарының «анық емес маңыздылығын» ескере отырып, aTyr компаниясына реттеуші орган алдында өз ұстанымын қорғау қиын болады.
Саркоидоздан бөлек, aTyr эфзофитимодты дәнекер тіннің аутоиммундық ауруы — склеродермиямен ауыратын науқастарда да сынақтан өткізуде. Қазір ол клиникалық зерттеулердің үш кезеңінің екінші сатысында. Алайда Агравал aTyr склеродермиямен ауыратын науқастар арасында эфзофитимодты сынау кезінде қиындықтарға тап болуы мүмкін екенін ескертті, себебі бұл ауру «тағы да бір қауіпті бағыт» болып саналады.
