«Бағасы негізсіз қымбат». Jefferies Starbucks акцияларын сатуға кеңес берді
Jefferies инвестициялық банкінің талдаушысы Starbucks кофеханалар желісі акцияларының рейтингін төмендетіп, оларды «сатуға» кеңес берді. Сарапшы компания акцияларының құны алдағы уақытта шамамен 20%-ға төмендейді деп болжайды. Jefferies мамандарының пікірінше, нарықтың үміті компанияның нақты қаржылық жағдайынан тым алшақ жатыр. Әсіресе Қытайдағы бизнес болашағының бұлыңғырлығы мен сату және маржа көрсеткіштерінде айтарлықтай ілгерілеу болмағаны ескеріліп отыр. Дегенмен, Уолл-стрит сарапшыларының Starbucks жайлы пікірі екіге жарылды.
Егжей-тегжейі
Jefferies талдаушысы Энди Бариш Starbucks акцияларының рейтингін «ұстау» деңгейінен «сатуға» түсірді, деп хабарлайды Barron’s. Ол мақсатты бағаны бұрынғыдай $76 деңгейінде қалдырды. Бұл 16 шілдедегі жабылу бағасынан шамамен 18%-ға төмен.
Barron’s дерегінше, мұндай жағымсыз бағаның негізгі себебі — Starbucks-тың Қытайдағы бизнесі. CNBC мәліметтері бойынша, компания жергілікті бәсекелестердің күшеюіне байланысты Қытайдағы үлесін сату мүмкіндігін қарастырып жатыр. Бұл үлестің бағасы $10 млрд-қа дейін жетуі мүмкін. Starbucks бұл ақпаратты растап, стратегиялық серіктес іздеп жатқанын, бірақ 30% көлеміндегі бақылау пакетін сақтап қалғысы келетінін мәлімдеді.
Алайда Jefferies сарапшыларының ойынша, мұндай келісімге қатысты үміттер компания акциялар бағасына әлдеқашан енгізілген. Ал шын мәнінде, Қытайдағы бизнестің құны шамамен $2–2,5 млрд қана, себебі бәсекелестік өте жоғары. Бұл баға тіпті ең оңтайлы сценарийлерге негізделген.
Нарықтың үміті тым жоғары
Бариш Starbucks акцияларының бағасы бәсекелестермен салыстырғанда негізсіз қымбат екенін атап өтті. Компанияның табысқа қатысты мультипликаторы шамамен 38-ге тең. Бұл көрсеткіш ұқсас компанияларда орта есеппен 24.
«Біз нарықтың үміттері шынайылықтан тым алшақ кеткен деп санаймыз. Қазірге дейін сату немесе маржа бойынша айтарлықтай және тұрақты жақсарудың нақты дәлелі жоқ. Сонымен қатар, Starbucks алдағы уақытта персонал мен технологияға көп инвестиция салуы тиіс. Бұл табыс пен рентабельділікке қысым жасауы мүмкін», — деп жазды Бариш CNBC келтірген жазбасында.
Ол сондай-ақ компанияның стратегиялық басымдықтарына күмәнмен қарайды. Басқа брендтер салқын сусындар мен автоқызмет (drive-thru) нүктелерін дамытып жатқанда, Starbucks әлі де ыстық сусындар мен кофеханада қызмет көрсетуге басымдық беріп отыр. Бұл қазіргі экономикалық жағдайда тәуекелге толы қадам.
Сарапшылар не дейді?
Jefferies сарапшысы Starbucks-тың алдағы тоқсандық есебі бойынша болжамдар да шындыққа жанаспайды деп есептейді. Компания сату мен операциялық көрсеткіштердің жақсарып келе жатқанын айтқанымен, нақты деректер оны дәлелдей қоймайды. Уолл-стриттегі сарапшылар орта есеппен сатылым 0,2%-ға төмендейді деп күтсе, Jefferies 1%-дық төмендеуді болжайды. Starbucks үшінші тоқсан қорытындысын 2025 жылдың 29 шілдесінде, нарық жабылған соң жариялайды.
Акциялар бағасы не болды?
17 шілдеде өткен сауда сессиясында Starbucks акциялары 2%-ға төмендеп, $90,5 деңгейіне түсті. Бұл соңғы үш аптадағы ең төмен көрсеткіш болды. Бірақ сессия барысында бағасы қайта көтеріле бастады. Жалпы, жыл басынан бері компания акциялары небәрі 1,2%-ға ғана өсті. Ал осы уақыт аралығында АҚШ-тың негізгі индекстерінің бірі S&P 500 шамамен 7%-ға артты.
Басқа сарапшылар не ойлайды?
TD Cowen компаниясының сарапшысы Эндрю Чарльз те Starbucks акцияларын сатуға кеңес берді. Оның мақсатты бағасы — $90, бұл қазіргі бағадан шамамен 3%-ға төмен. Ол да Уолл-стрит компанияға тым сенім артқанын және брендтің бағасы мен сапасына деген тұтынушы көзқарасы нашарлағанын айтты.
Ал BTIG сарапшысы Питер Салех керісінше, шілдеде Starbucks-ты келесі 12 айдағы ең жақсы инвестициялық идеялар қатарына қосты. Оның болжамы бойынша, акция бағасы $105-қа жетуі мүмкін, бұл қазіргі деңгейден 13,5%-ға артық. Салех компания бизнесінің қалпына келуі күткеннен баяу жүріп жатқанын мойындады. Дегенмен, ол 2026 жылдан бастап сату мен табыс айтарлықтай өседі деп сенеді. Оның ойынша, нақты қалпына келу 2025 жылдың соңына қарай немесе 2026 жылдың бірінші жартысында басталады. «Иә, бұл бұрынғы болжамымыздан кеш, бірақ бұл өсімге түрткі болады деп сенеміз», — деді ол.
Уолл-стриттегі сарапшылардың пікірі екіге бөлінді. Сарапшылардың 43%-ы акцияларды сатып алуға кеңес берсе, 46%-ы бейтарап позицияда (ұстау). Қалғандары сату немесе салмақты азайту керек дейді. Орташа есеппен алғанда, консенсус-баға шамамен $93,6 болып отыр. Бұл ағымдағы бағадан 1%-ға ғана жоғары.
