«Барлық болжамды тас-талқан етуі керек»: Palantir есебі алдында сарапшылар не дейді
Palantir инвесторлардың ерекше жоғары үмітін ақтау үшін жай ғана жақсы емес, шынымен де әсерлі тоқсандық нәтижелер көрсетуі керек, дейді Уолл-стрит сарапшылары. S&P 500 индексіндегі компаниялар ішінде Palantir-дің баға мен табыс арасындағы мультипликаторы ең жоғары, бірақ трейдерлер бұл көрсеткішке көз жұмып, Пентагонмен келісімдерге, коммерциялық бағыттың кеңеюіне және жасанды интеллектті енгізуіне байланысты Palantir-дің өсім әлеуетіне сенім артып отыр, деп жазады Bloomberg. Әскери және азаматтық бағыттағы ЖИ шешімдерін әзірлейтін компания екінші тоқсан есебін 4 тамыз күні сауда жабылған соң жариялайды. Есеп алдында небәрі бірнеше сағат ішінде Palantir акциялары 4%-дан аса өсіп, тарихи рекорд орнатты.
Уолл-стрит не дейді
Palantir акцияларының қарқынды өсуіне талдаушылар біраздан бері алаңдаулы, деп атап өтуде Bloomberg. Уолл-стриттің ең жиі кездесетін кеңесі — бұрын сатып алынған акцияларды портфельде ұстау (17 «Hold» рейтингі). Тағы сегіз сарапшы сатып алуға кеңес береді («Buy» және «Overweight»), ал қалған төртеуі сатуға («Sell») шақырады. Уолл-стриттің Palantir акциялары бойынша орташа мақсатты бағасы — $115,5, бұл соңғы жабылу бағасынан 25% төмен.
— Palantir акцияларына бейтарап баға беріп отырған сарапшылардың бірі — DA Davidson-нан Гил Лурия. Оның айтуынша, Palantir соңғы бірнеше тоқсанда Уолл-стриттің табыс бойынша болжамынан оңай асып түсіп отыр және қазір «басқа барлық бағдарламалық жасақтама компанияларынан қуатты серпін көрсетуде», бірақ бұл жолғы күтулер де «бұрын-соңды болмаған деңгейден жоғары». Palantir-дің органикалық табыс өсімінің болжамды қарқыны ол бақылап отырған 100-ден астам бағдарламалық компаниялар арасындағы ең жоғарысы, сондықтан «шектен тыс жоғары бағалау» аясында тәуекел де аса жоғары, деп түсіндірді ол.
Лурияның айтуынша коммерциялық бағытта Palantir жасанды интеллект саласындағы пилоттық жобасындағы жетістігін дамытып, жаңа клиенттерді ұзақ мерзімді серіктеске айналдыруы тиіс. Сонымен қатар, ол Palantir ЖИ саласындағы таланттар үшін бәсекелестікке тап болып отырғанын атап өтті.
— «Қазір олар [Palantir] сондай бір кезеңде тұр, есепті тура мағынасында «жарылысқа» айналдыруы керек. Олар Уолл-стриттің барлық күтулерін тас-талқан етуге тиіс», — дейді әріптесімен келісімін білдірген Robert W. Baird & Co компаниясының басқарушы директоры Тед Мортонсон.
— Өз кезегінде Loop Capital өткен аптада Palantir акцияларының мақсатты бағасын $155-тен $178-ге дейін көтеріп (бұл соңғы жабылу бағасынан 15% жоғары), «сатып алуға» кеңесін сақтады. Инвесткомпанияның сарапшысы Palantir табыс пен пайда бойынша болжамдардан тағы да асып түседі және осы тоқсанға арналған нұсқауларды жақсартады деп күтеді. Оның пікірінше, тіпті жоғары баға да ақталады: Palantir — ЖИ саласындағы көшбасшылықты, «таза» ЖИ-компания мәртебесін және ерекше маржиналдылықты үйлестіре білген сирек компания.
— Кейбір сарапшыларды Palantir-дің Пентагонмен жасасқан, құны $10 млрд-қа дейін жететін келісімі де жігерлендіруде. «Palantir — 2025 жылға арналған негізгі технологиялық инвестициялық идеяларымыздың бірі болып қала береді, ал бұл келісім компанияға федералды және коммерциялық нарықтағы бүкіл портфелі бойынша бұрын-соңды болмаған ілгерілеуге жол ашады», — дейді Wedbush компаниясының сарапшысы Дэн Айвз. Ол есепте Palantir ЖИ бағытында мықты нәтижелер көрсетеді деп сенеді. Wedbush Palantir акцияларын «Outperform» рейтингінде ұстауды жалғастырып отыр, бірақ оның мақсатты бағасы — $160 — 1 тамыздағы жабылу бағасынан небәрі 4% жоғары.
— Wealth Consulting Group инвестициялық директоры Джим Уорден де Palantir акцияларын бағасы жоғары болса да портфельде ұстауға тұрарлық деп есептейді. Оның айтуынша компания дәл қазір «Apple сәтіне» — алғашқы iPhone шыққан уақыттағы жағдайға ұқсас кезеңге келген болуы мүмкін. «Иә, барлығы бұл акция шектен тыс қымбат әрі мінсіз сценарийді көрсетіп отыр дейді, — деп атап өтті ол Bloomberg-ке берген пікірінде. — Бірақ егер Palantir табысы тоқсанына $1 млрд-тан $10 млрд-қа, кейін $20 млрд-қа дейін өсуі мүмкін кезеңге жеткен болса, онда қазіргі бағасы толығымен ақталуы мүмкін».
Сарапшылардың орташа болжамына сәйкес Palantir екінші тоқсан қорытындысы бойынша жылдық көрсеткішпен салыстырғанда табыстың 39%-ға өсімін ($939 млн), бос ақшалай ағынның табыстың 35%-ын ($330 млн), ал операциялық табыстың $404 млн құрағанын хабарлайды деп күтілуде, деп жазады Barron’s FactSet деректеріне сілтеме жасап.
Акциялар ахуалы
4 тамыздағы сауда барысында компания акциялары 4,3%-ға өсіп, $160,9-ға жетті. Бұл — компания тарихындағы ең жоғары баға. Жыл басынан бері Palantir-дің нарықтық құны 110%-дан аса өсті. Салыстыру үшін: АҚШ-тың негізгі S&P 500 индексі осы кезеңде небәрі 6% өсті. Компания акциялары болжанған жылдық табысқа шаққанда 81 мультипликаторымен саудалануда — бұл Nasdaq 100 индексінен 13 есе жоғары, деп атап өтеді Barron’s.
Компанияның жағдайы
Palantir-дің негізгі нарықтары — АҚШ пен Ұлыбритания, бұл елдерде 2024 жылы табыс тиісінше 38%-ға және 29%-ға өсті, ал қалған елдерде тек 8% өсім тіркелген, деп жазады Barron’s. Мемлекеттік сектор мен коммерциялық клиенттерден түскен табыстардың өсу қарқыны ұқсас, бірақ әзірге мемлекеттік келісімшарттар басымдыққа ие. Дәл осы келісімшарттар Palantir үшін осы тоқсанда және 2025 жылдың соңына дейін маңызды рөл атқаруы мүмкін. Жақында компания АҚШ армиясымен ынтымақтастығында екі маңызды межені еңсерді. Біріншісі — Palantir алғаш рет TITAN атты әскери ЖИ-талдау орталығына бас мердігер ретінде тағайындалды. Екіншісі — компания Пентагонмен ұзақтығы 10 жылға дейінгі және қаржыландыру көлемі $10 млрд-қа дейінгі біртұтас келісімшартқа қол қойды. Бұл келісім Palantir-дің АҚШ Қорғаныс министрлігінің негізгі мердігері ретіндегі мәртебесін күшейтті.
