Басты жаңалықтар: алғашқы «тарифтік хаттар», $9 млрд-тық мәміле
Дональд Трамп агрессивті сауда саясатын жалғастырып, Жапония, Оңтүстік Корея және Таиландты қоса алғанда 14 елдің өнімдеріне 40%-ға дейін баж салығын енгізді. АҚШ билігі көмір мен газ станцияларының жабылуы және жаңартылатын энергия көздеріне шамадан тыс тәуелділік салдарынан 2030 жылға қарай жаппай электр үзілістері болуы мүмкін екенін ескертті. Nvidia-ның «қамқорлығындағы» CoreWeave компаниясы деректер орталығы инфрақұрылымын жеткізетін Core Scientific-ті $9 млрд-қа сатып алатынын хабарлады.Осы және өзге де жаңалықтар 8 шілде таңындағы шолуымызда.
Трамп 1 тамыздан бастап 14 елге жаңа баж салығын енгізетінін жариялады
АҚШ президенті Дональд Трамп CNBC хабарлауынша 1 тамыздан бастап кемінде 14 елден келетін импортқа жаңа баж салығы енгізілетінін мәлімдеді. Ол Truth Social әлеуметтік желісінде Жапония, Оңтүстік Корея, Қазақстан, Оңтүстік Африка және басқа да сауда серіктестерінің басшыларына жолданған тариф мөлшерлері көрсетілген хаттардың скриншоттарын жариялады. Ақ үйдің баспасөз хатшысы Кэролайн Левитттің айтуынша мұндай хаттарды алдағы күндері басқа елдер де алады.
Аталған хаттарға сәйкес Жапония, Оңтүстік Корея, Малайзия, Қазақстан және Тунистен келетін импорт 25% баж салығына ұшырайды, ал Оңтүстік Африка мен Босния тауарларына 30%, Индонезияға — 32% мөлшерлеме белгіленген. Бангладеш пен Сербия үшін тариф 35%-ға дейін жетеді, Камбоджа мен Таиландқа — 36%. Лаос пен Мьянмадан келетін импорт ең жоғары — 40%-дық баж салығымен салынады. Сонымен қатар, АҚШ екіжақты қарым-қатынас сипатына қарай тарифтерді қайта қарауы мүмкін екені айтылған.
Бұл хаттар — 9 шілдеге дейін таратылатын серияның алғашқылары, яғни келіссөздерге берілген мерзімнің аяқталатын күні. Дүйсенбі күні Трамп бұл мерзімді 1 тамызға шегеретін жарлыққа қол қойды, мұны «қосымша ақпарат пен жоғары лауазымды тұлғалардың ұсынымдарымен» түсіндірді.
АҚШ-та 2030 жылға қарай электр үзілістерінің күрт артуы мүмкін
АҚШ-та жасанды интеллект дамуы есебінен энергия тұтынудың күрт өсуі электр жарығының үзілуін 2030 жылға қарай 100 есе жиілетуі мүмкін, деп хабарлайды Bloomberg Трамптың тапсырмасымен дайындалған Энергетика министрлігінің есебіне сілтеме жасап. Агенттіктің хабарлауынша бұл құжат көмір станцияларын жабу үдерісін тежеу үшін биліктің кең ауқымды араласуына негіз болуы ықтимал.
Есепте электр қуаты тапшылығы көмір мен газ станцияларының жаппай жабылуы және жаңартылатын энергия көздеріне шамадан тыс тәуелділікпен байланысты екені айтылған. Министрліктің бағалауынша қазіргі саясат жалғаса берсе, бұл АҚШ-тың экономикалық өсіміне, ұлттық қауіпсіздігіне және жаңа технологиялардағы көшбасшылығына қауіп төндіреді.
«Егер біз сенімді электрмен қамтуды сақтап, жасанды интеллект жарысында жеңіске жетіп, электр бағасының шарықтауынан сақтанғымыз келсе, Америка энергетикасының әлеуетін ашуымыз қажет», — деді энергетика министрі Крис Райт.
Министрлік бұл есеп Федералды энергетика туралы заң аясындағы төтенше өкілеттіктерді қолдануға, мысалы, көмір мен газ станцияларының жұмысын ұзартуға негіз бола алатынын атап өтті. Мұндай шаралар бұған дейін екі нысанды жабылудан сақтап қалған. Қазір бұл тәжірибені кеңейту мүмкіндігі қарастырылуда.
Есептің жариялануы Трамптың құны $3,4 трлн болатын ауқымды бюджет пакетін қабылдауымен тұспа-тұс келді. Ол жел мен күн энергетикасына берілетін салықтық жеңілдіктерді жоюды қамтиды. АҚШ Энергетикалық ақпарат басқармасының мәліметінше, 2023 жылы жаңадан іске қосылған қуаттардың 61%-ы күн станцияларына тиесілі болған.
Кэти Вуд нарық тұрақсыздығы аясында қорғаныштық ETF-тер сериясын іске қосады
Ark Investment Management инвестициялық компаниясы Кэти Вудтың басшылығымен өзінің негізгі қоры ARK Innovation-ның ықтимал шығындарын азайту мақсатында төрт жаңа биржалық қор (ETF) құру үшін өтінім берді, деп хабарлайды Reuters.
Ark-тың бұл қадамдары «buffer ETF» деп аталатын жаңа бағытқа жатады — мұндай қорлар пайда табу шегін шектей отырып, шығынды азайту үшін опциондық стратегияларды пайдаланады. Мұндай тәсілді бұған дейін BlackRock, Allianz және Innovator сынды компаниялар қолданған, және ол нарықтағы тұрақсыздық кезінде қауіпсіздік іздеген инвесторлар арасында барған сайын танымал болуда.
Жаңа ETF-тердің әрқайсысы ARK Innovation ETF акцияларының құны 50%-ға дейін төмендеген жағдайда шығынды шектеуге бағытталған. Пайда тек қордың өсімі шамамен 5%-дан асқан жағдайда ғана төленетін болады. Биылғы жылдың басынан бері ARK Innovation ETF шамамен 24%-ға өсті, ал S&P 500 индексі — шамамен 6%-ға ғана көтерілді.
ETF-тердің іске қосылуы Трамптың баж саясатына байланысты туындаған нарықтық тұрақсыздық жағдайында жүзеге асуда. Reuters тілшілерінің пікірінше Трамптың саясаты ARK Innovation қорындағы активтерге — мысалы, Tesla электромобиль өндірушісіне, Coinbase криптобиржасына және Robinhood инвестициялық платформасына — тиімді болуы мүмкін.
CoreWeave компаниясы Core Scientific-ті $9 млрд-қа сатып алды
Жасанды интеллектке арналған бұлтты есептеу қызметтерін ұсынатын CoreWeave компаниясы деректер орталығы инфрақұрылымын өндіретін Core Scientific-ті $9 млрд-қа сатып алатынын мәлімдеді. TechCrunch хабарлағандай, мәміле толықтай акциялармен төленеді.
Бірігу нәтижесінде CoreWeave 1 гигаваттан астам деректер орталығы қуатына қол жеткізеді — бұл 850 мыңнан астам үйді электр қуатымен қамтуға жетеді. Компания бұл ресурстарды генеративті жасанды интеллект үлгілерін оқыту мен іске қосу үшін жалға беруді жоспарлап отыр.
Бұлтты инфрақұрылым жеткізушілері ІІ-компаниялардың есептеу сұраныстарын қамтамасыз ету үшін қуат көлемін жедел арттыруда. Бұған дейін Bloomberg OpenAI компаниясының Oracle-мен қосымша 4,5 гигаваттық деректер орталығын жалға алу туралы келісімге қол қойғанын хабарлады — бұл олардың ауқымды Stargate жобасын кеңейтеді.
Нарықтардағы жағдай
Азия-Тынық мұхиты аймағының нарықтары өсті — CNBC хабарлағандай, инвесторлар сауда шиеленісін елемеген сыңайлы.
— Жапониядағы Nikkei 225 индексі 0,18%-ға өсті, ал кеңірек қамтитын Topix индексі өзгеріссіз қалды.
— Оңтүстік Кореяда Kospi индексі 1%-ға көтерілді, ал шағын компаниялар индексі Kosdaq өзгеріссіз қалды.
— Қытай материгінде CSI 300 индексі 0,2%-ға, Гонконгтағы Hang Seng индексі 0,18%-ға өсті.
— Австралияның S&P/ASX 200 индексі бастапқы өсуін жоғалтып, 0,2%-ға төмендеді. Бұл елдің Резервтік банкі негізгі мөлшерлемені өзгеріссіз қалдырғаннан кейін болды — нарық 25 базистік тармаққа төмендеуді күткен еді.
— АҚШ-тың акциялар фьючерстері Трамп енгізген жаңа баждар туралы жаңалықтардан кейін Азия сессиясының таңғы сағаттарында төмендеді. Осы жаңалықтар аясында Уолл-стриттегі үш негізгі индекс маусым ортасынан бергі ең нашар нәтижелерін көрсетті.
