Маск партия құратынын айтқан соң Tesla акциясы құлдырап, шортистер табыс тапты
«Қысқа сату стратегиясын ұстанатын трейдерлер Tesla акциясының құлдырауынан шамамен 1,4 млрд доллар көлемінде «қағаз жүзіндегі» табыс көре алады», - деп хабарлады Reuters. 7 шілде, дүйсенбі күні Tesla акциялары шамамен 7%-ға арзандады. Инвесторлар компания бас директоры Илон Масктың АҚШ-та жаңа саяси партия құратыны туралы мәлімдемесінен кейін алаңдай бастады. Нарық қатысушылары Масктың компаниядан тағы да назарын басқа жаққа бұрып жіберуінен қауіптенеді. Мұндай жағдай бұрын Ақ үймен байланыста болған кезінде де болған.
Егжей-тегжейі
7 шілде, дүйсенбі күнгі саудада Tesla акциялары бір сәтте 8,4%-ға арзандап, күнді 6,8% төмендеумен аяқтады. Қор биржасындағы жабылу бағасы 293,94 $ болды. Бұл кейінгі бір айдағы ең төменгі көрсеткіш. «Бұл жағдай қысқа позиция ұстанған инвесторлар үшін тиімді болуы мүмкін. Олар позицияларын жаппайынша жүзеге аспайтын «қағаз табыс» ретінде шамамен 1,4 млрд доллар пайда көре алады», - деп жазды Reuters Ortex талдау компаниясының деректеріне сілтеме жасап. Есептеулер үшін акция бағасы 296 $ деңгейінде алынған.
Бұл — бір ай ішіндегі шортистер үшін екінші сәтті мүмкіндік. 5 маусымда олар бір күн ішінде 4 млрд доллардан астам пайда тапқан. Ол кезде Tesla акциялары сауда тарихындағы ең ірі бір күндік құлдырауға ұшыраған еді. Бұл оқиға Маск пен АҚШ президенті Дональд Трамп арасындағы әлеуметтік желідегі қақтығыстан кейін болды.
Tesla акцияларының құлдырауы Илон Масктың байлығына да әсер етті. Forbes-тың есебінше, 7 шілдеде Масктың байлығы 12 млрд долларға азайып, 393,1 млрд долларды құрады. Соған қарамастан, ол Forbes Real-Time рейтингінде әлі де бірінші орында тұр. Екінші орындағы Oracle компаниясының төрағасы Ларри Эллисоннан оны 117,2 млрд доллар бөледі.
Акция неге құлады?
Tesla акциялары Масктың АҚШ-та жаңа саяси партия құратыны туралы мәлімдемесінен кейін құлдырады. «Бұл инвесторлар арасында оның компанияға көңіл бөлмей қоюы мүмкін деген алаңдаушылық туғызды», - деп жазады Reuters. Бұл шешім Маск пен Трамп арасындағы ашық қарсыластықтың жалғасы болды. Маск Трамптың 4 шілдеде қол қойған бюджет және салық реформаларын («үлкен әрі тамаша заң») сынға алған соң, Трамп Масктың бұл әрекетін «ақылға қонымсыз» деп атап, оны «нағыз апатқа айналды» деп сынға алды.
Маск бұл мәлімдемені компания екі тоқсан қатарынан жеткізілімдердің азайғаны туралы есеп бергеннен бірнеше күн өткен соң жасады. «Бұл – Tesla тарихындағы ең үлкен төмендеу. Компания акциялары желтоқсан айындағы рекордпен салыстырғанда 35%-ға құлдырады», - деп жазды Reuters. Агенттік Tesla акциялары биыл «Керемет жетілік» қатарында ең әлсіз көрсеткіш көрсеткенін атап өтті.
Camelthorn Investments кеңесшісі Шон Кэмбелл Reuters-ке берген пікірінде: «Мен және басқа да Tesla инвесторлары компания саясаттан алшақ жүргенін қалаймыз. Неғұрлым тез арада бұл алаңдатушы фактор жойылып, Tesla негізгі бизнесіне оралса – соғұрлым жақсы», – деді.
Cарапшылар не дейді?
Tesla-ға қатысты оптимистердің бірі саналатын Wedbush компаниясынан Дэн Айвз жексенбі күні: «Инвесторларға Масктың саяси белсенділігі ұнамайды», – деді.
«Маск саясатқа барған сайын тереңдеп барады және енді Вашингтон элитасына қарсы шығуға тырысуда. Ал бұл – Tesla инвесторлары мен акционерлері қаламайтын бағыт», – деп жазды ол Forbes келтірген жазбасында.
William Blair сарапшысы Джед Дорсхаймер дүйсенбі күні Tesla акцияларының рейтингін Outperform («нарықтан жоғары») деңгейінен нейтралға дейін төмендетті. Ол да Масктың саяси белсенділігі акцияларға теріс әсер етіп жатқанын айтты.
«Инвесторлар, әсіресе, компанияға Масктың барынша назар салуы қажет сәтте алаңдататын мәселелерден шаршады. Оның саясатқа тағы араласуы тек тәуекел алып келеді. Біз Масктың күш-жігері роботакси жобасына емес, сайлауға бағытталғанына өкінеміз», – деп жазды Дорсхаймер CNBC келтірген жазбасында.
Сондай-ақ ол «үлкен әрі тамаша» заң тек электромобильдерге берілетін салық жеңілдігін ғана жоймай, сонымен қатар автокомпанияларға көміртек шығарындылары бойынша қойылған талапты бұзғаны үшін салынатын айыппұлды да алып тастайтынын айтты. Ал бұл талаптар Tesla үшін маңызды табыс көзі саналады: компания экологиялық таза көліктер шығарады, сондықтан квоталарды басқа өндірушілерге сата алады.
«Электромобильдерге берілетін жеңілдіктер жойылса, сұраныс азаюы мүмкін. Сонымен бірге, квоталардан түсетін табыстың азаюы компанияның таза пайдасына тікелей соққы болады. Бұл жағдайда инвесторлар Tesla-ны бағалауға қатысты өз есептерін қайта қарауы тиіс», – деді Дорсхаймер.
JPMorgan талдаушыларының айтуынша, Tesla 2025 жылдың алғашқы екі тоқсанында жеткізілім көлемінің ең үлкен төмендеуін тіркеген. «Бұл тенденция компания үшін алаңдатарлық», - дейді банк өкілдері. Олар 2025 жыл Tesla үшін 2022 жылдан бергі ең нашар жылға айналуы мүмкін деп болжады. Осы себепті JPMorgan Tesla акцияларын сату керек деп есептейді (рейтинг – «Sell»). Бұған дейін банк акцияны «нарықтан төмен» деп бағалаған (Underweight).
Контекст
Silver Bulletin порталының мәліметінше, қазіргі сәтте америкалықтардың 55%-ы Илон Маскқа теріс көзқараспен қарайды. Оны 37% ғана қолдайды, ал қалған 8% нақты пікір білдірмеген. Салыстыру үшін: өткен жылдың соңында Маскқа теріс қарайтындар үлесі 45% болған. «Бұл тенденция демократтар, республикашылар және тәуелсіз сайлаушылар арасында да байқалады», - деп жазады Forbes.
