Бестселлер Novo жүрек ауруларының қаупін бәсекелесінен тиімдірек төмендетеді
Даниялық фармацевтикалық алпауыт Novo Nordisk семіздікті емдеуге арналған Wegovy препараты жүрек-қантамыр ауруларының қаупін негізгі бәсекелестеріне қарағанда тиімдірек азайтатынын мәлімдеді. Осы жаңалықтан кейін компания акциялары 3%-ға қымбаттады.
Егжей-тегжейлі
Novo Nordisk компаниясы Wegovy препаратының жүрек-қантамыр қауіптерін америкалық бәсекелесі Eli Lilly әзірлеген препараттарға қарағанда тиімдірек төмендететінін мәлімдеді, деп жазады The Wall Street Journal. Зерттеу нәтижелері бойынша семаглутид (Wegovy брендімен белгілі) ұзақ мерзімді қабылдаған адамдарда инфаркт, инсульт, жүрек-қантамыр жүйесіне байланысты немесе кез келген себептен болатын өлім қаупі тирзепатид қабылдағандарға қарағанда 57%-ға төмен болған. Тирзепатид – бұл Eli Lilly компаниясының Zepbound және Mounjaro препараттарының белсенді заты.
Бұл нәтижелер артық салмағы бар, бірақ диабетке шалдықпаған 21 000-нан астам пациентке негізделген. Novo зерттеудің 2022 жылдан бері күнделікті клиникалық тәжірибеге негізделген шынайы өмір жағдайында жүргізілгенін хабарлады – бұл классикалық бақыланатын зерттеу емес.
«Бұл мәліметтер семаглутидтің қазіргі уақытта жүрек-қантамыр жүйесін қорғауға нақты дәлелденген әсері бар GLP-1 класындағы жалғыз препарат екенін көрсетеді. Ол семіздік пен жүрек ауруларынан зардап шегетін, бірақ диабеті жоқ адамдарға арналған», – деді Novo Nordisk-тің өнімдер мен портфель стратегиясы жөніндегі жетекшісі Людовик Хельфготт.
Бұл нені білдіреді?
Копенгагендегі биржада 1 қыркүйекте Novo Nordisk акциялары 3%-ға көтерілді. Алайда, бұл әлі де компания бағамын жыл басынан бергі құлдыраудан құтқаруға жеткіліксіз: қаңтардан бері компания құны 40%-дан астамға азайған. Бұған себеп – салмақты азайтуға арналған дәрілер нарығындағы қатаң бәсекелестік, оның ішінде танымал дәрілердің арзан баламаларын өндіретін дәріханалардың қысымы.
Barron's басылымының жазуынша Wegovy препаратының жүрекке пайдасы жайлы жаңа деректер бұл препаратқа сұранысты арттырып, сақтандыру өтемақыларының кеңеюіне ықпал етуі мүмкін. Қазір көптеген сақтандыру компаниялары мұндай препараттарды тек қант диабеті бар клиенттерге ғана өтейді.
Eli Lilly акциялары болса, жыл басынан бері 5%-ға арзандады, ал бұл құлдыраудың үштен екісі тамыз айында орын алған – компанияның диабеті жоқ адамдарға арналған семіздікке қарсы таблеткасының көңіл көншітпеген сынақ нәтижелері нарықты күйзеліске ұшыратты. Бірақ диабетпен ауыратындар арасында жүргізілген сол препаратқа қатысты зерттеулер инвесторларға үміт сыйлады.
Қазіргі таңда Wall Street-тегі бірде-бір сарапшы Eli Lilly акцияларын сатуға кеңес бермейді. MarketWatch дерегі бойынша 28 аналитиктің 22-сі бұл қағаздарды сатып алуға кеңес беріп отыр.
Ал Novo Nordisk-ке деген көзқарас сәл сақ: компания акцияларына 15 сатып алу, 16 ұстау (бейтарап) деген рейтинг берілген. Тек бір ғана сарапшы бұл компаниядағы үлесті қысқартуға кеңес беруде.
