Бірнеше сарапшы Nvidia бағасын көтерді: компания құны 5 трлн долларға жуықтауы мүмкін
Barclays сарапшылары жасанды интеллект чиптері нарығында көш бастап тұрған Nvidia акцияларының мақсатты бағасын көтеріп, келесі 12 айда 38 пайызға қымбаттайды деп болжады. Melius Research та өзінің таргетін өсіріп, акциялардың 41 пайызға дейін ұлғаюын күтуде. Егер бұл болжамдар орындалса, Nvidia-ның нарықтық капиталы бір жыл ішінде 5 трлн долларға жуықтайды, деп жазады MarketWatch.
Barclays-тың Nvidia өсіміне сенуі
Barclays сарапшысы Том О’Мэлли Nvidia акцияларын «сатып ал» (Overweight) деген ұсыныммен растады және мақсатты бағасын 170 доллардан 200 долларға дейін көтерді. Бұл сейсенбі күнгі жабылу бағасынан 38 пайыздық өсу әлеуетін білдіреді. Мұндай бағалау кезінде компания капиталы 3,5 трлн доллардан 4,9 трлн долларға жетеді. Barclays Nvidia-ны жыл екінші жартысындағы өсім әлеуеті ең жоғары қағаз деп атады. Аналитиктің айтуынша, Blackwell процессорларының кеңеюі осы өсімнің негізгі қозғаушысы болмақ. Чиптерді жеткізу тізбегіндегі жағдай «сау» көрінеді, ал өндірістік серіктестер 2025 жылдың екінші жартысына «оң көзқараста». ЖИ деп аталатын, адам араласуын аз қажет ететін жүйелер де қосымша сұраныс туғызып отыр. Barclays есебінше, жаңа Blackwell Ultra процессорларының шағын топтамасы осы тоқсанның соңына дейін жеткізіле бастайды, ал жаппай өндіріс келесі тоқсанда іске қосылады. Ultra сатылымы артқан сайын және Blackwell көлемі ұлғайған сайын, компанияның жалпы маржасы екінші жартыжылдықта жақсарады.
Melius Research-тің оптимизмі
17 маусымда Melius Research сарапшысы Бен Райтцес те «сатып ал» ұсынымын қалдырып, мақсатты бағаны 195 доллардан 205 долларға дейін көтерді. Бұл 41 пайызға жуық өсімді меңзейді. Райтцес Nvidia-ның дерек - орталықтар шығындары төрт-бес жылда жылына 2 трлн долларға дейін екі есе өседі деген бас директор Дженсен Хуангтың болжамына тоқталып, «бұл нарықтан компания неге 40 пайыз үлес алмауы керек?» деп жазады. Оның есебі бойынша, мұндай жағдайда дерек - орталық сегментінің табысы 800 млрд долларға жете алады (Wall Street биылғы қаржы жылында шамамен 180 млрд доллар деп күтеді). Сарапшының нақтырақ болжамы бойынша, 2028 қаржы жылында табыс 275 млрд долларға жету ықтимал, бірақ нарық компания әлеуетін әлі толық бағаламаған. Melius пікірінше, Nvidia «суверенді ЖИ» деп аталатын — мемлекеттер өз құпия деректерін өңдеу үшін салатын жергілікті дерек - орталықтардан да үлкен пайда көрмек. Сауд Арабиясы, БАӘ және Еуропада мұндай жобалар басталып та кетті.
Акциялар бағамы
Сейсенбіде Nvidia акциялары 0,4 пайызға құлдырап, 144,1 долларға түсті. Бұл қаңтардың 6‑сындағы рекордтан небәрі 6 пайыз төмен. Жыл басынан бері қағаздар 7 пайыздан астам өсті, ал соңғы үш айда компания капиталы 25 пайыз шамасында ұлғайды. MarketWatch дерегі бойынша, компанияны бақылайтын 67 сарапшының 60‑ы «сатып алуға» кеңес береді, алтауы «ұстауға», тек біреуі «сатуға» шақырады. Акцияның орташа мақсатты бағасы 172,2 доллар, бұл 17 маусымдағы жабылу бағасынан 19,5 пайыз жоғары.
