BofA жүргізушісіз көліктердің таралуынан күтпеген бенефициарларды атады
Автономды көліктерге көшу автоcақтандырушылар үшін әлеуетті «алтын тамырға» айналуы мүмкін, деп есептейді Bank of America сарапшылары. Робот-такси жағдайында жол апаты үшін жауапкершілікті қазіргі сияқты адамдар- жүргізушілер емес, автокөлік пен бағдарламалық қамтамасыз етуді әзірлеуші заңды тұлғалар көтереді. Бұл сақтандыру компанияларының жұмысын айтарлықтай жеңілдетіп, олардың рентабельдігін арттырады, дейді банк.
Егжей-тегжейлі
Автосақтандыру нарығы айтарлықтай өзгеріп, онда жұмыс істейтін компаниялар үшін анағұрлым табысты бола алады, деп жазды Bank of America сарапшылары Bloomberg келтірген жазбасында.
Қазір АҚШ-тағы ережелерге сәйкес, жол апаты болған жағдайда жауапкершілікті жүргізуші көтереді. Ал жүргізушісі жоқ автономды көліктерде бұл жауапкершілік автокөлікті пайдалануға және бағдарламалық қамтамасыз етуді әзірлеуге жауап беретін коммерциялық тасымалдаушыға жүктелуі тиіс. Bank of America-ның пікірінше, бұл «сақтандырушылардың табыстылығына кедергі келтіретін факторлардың» бірін жоюы мүмкін. Әдетте, автоcақтандырушылар азаматтық жауапкершілікті сақтандыруда залал шегеді, сондықтан бұл ауыртпалықтың бизнеске ауысуы олар үшін қаржылық жағынан тиімді болуы ықтимал, деп түсіндірді Bloomberg.
«Теориялық тұрғыдан алғанда, жеке сақтандыру нарығы АҚШ-тың болжанбайтын азаматтық-құқықтық жүйесі туғызатын тәуекелдердің бір бөлігін ауыстыруға қуанышты болуы мүмкін, – деп жазды BofA сарапшылары. – Залал тәуекелін өз баланстарында көтеріп (және оны капиталмен қамтамасыз етудің) орнына, автоcақтандырушылар тек [жапа шеккендердің] талаптарын өңдеп, жаңа жауапты тараптардан – коммерциялық сақтандырушылардан төлем талап етуге дайын болады».
Апат аз болса — төлем де азая ма?
Автосақтандыру саласындағы «аюлы» көңіл-күй автономды көліктерге қатысты адамның қателігінен болатын апаттардың азаюын күтумен байланысты, яғни бұл сақтандыру құнының төмендеуіне және сақтандырушылардың маржасының қысқаруына әкелуі мүмкін, деп жазады Bloomberg.
Мысалы, Goldman Sachs маусым айында жасаған болжамында автономды көліктердің таралуы көлемі $400 млрд болатын АҚШ-тың автосақтандыру нарығын түбегейлі өзгертуі ықтимал екенін айтты, өйткені адамдар кінәлі болатын апаттар азайып, төлем шығындары қысқарады.
Алайда Bank of America «деректер керісінше сөйлейді» деп санайды. Сарапшылардың түсіндіруінше, техникалық прогресс жол апаттарының жиілігін шынымен азайтқанымен, олардың ауырлығы соншалықты қарқынмен өсіп жатыр, бұл апат санының азаюынан түсетін барлық пайдаларды жоққа шығарады.
«Жол апаттарының жиілігі жүз жылдан астам уақыт бойы тұрақты түрде төмендеп келеді, бірақ соңғы 20–30 жылда қауіпсіздік саласындағы көптеген инновацияларға қарамастан, жақсару қарқыны айтарлықтай баяулады», — делінген жазбада.
Автономды көліктің салаға ықпалы туралы пікірталастар
Автономды көліктің сақтандыру индустриясына ықпалы – нарықта белсенді талқыланып жатқан тақырып, әсіресе бұл технологияға байланысты болған даулы өлімге әкелген оқиғалардан кейін, деп санайды Bloomberg. Мысал ретінде агенттік Tesla көлігі жүргізушіге көмек көрсету жүйесі (FSD) қосылған күйде адамды қағып, адам өліміне әкелген жағдайды келтіреді. FSD — толыққанды автопилот емес, ол жүргізушінің назарын қажет ететін жүйе болғандықтан, апат кезінде көлікті адам басқармаған.
Пікірталас Tesla мен Google-дың еншілес компаниясы Waymo-ның робот-таксилері барған сайын кең таралып келе жатқан тұста өрбіп отыр, деп жазады Bloomberg. Мысалы, Tesla маусым айында Остинде (Техас) робот-такси қызметін іске қосып, оны басқа қалаларға кеңейту жоспарын жариялады.
