Чип өндірушілер секторы $500 млрд капитализациядан айырылды
4 қарашада АҚШ-та басталып, 5 қарашада Азия нарықтарында жалғасқан жаппай сатылым салдарынан жаһандық инвесторлар жарты триллион доллар шамасында жартылай өткізгіш компаниялардың акцияларын сатып шығарды, деп хабарлайды Bloomberg. Дәл осынша сома Philadelphia Semiconductor Index құрамындағы компаниялардың және Bloomberg құрастырған азиялық чип өндірушілер индексінің жиынтық нарықтық құнынан өшірілді.
Егжей-тегжейлі
Сейсенбі күні технологиялық компаниялар көп шоғырланған Nasdaq Composite индексі 2%-ға төмендеді, ал S&P 500 1,17%-ға құлдырады. 5 қараша таңында S&P 500 және Nasdaq фьючерстері тиісінше 0,3% және 0,5%-ға түсіп жатты.
Азияда Samsung Electronics пен SK Hynix акциялары төмендеп, Оңтүстік Кореяның Kospi индексін бір сәтте 6,2%-ға дейін құлатты — кейіннен индекстің бір бөлігі қалпына келді. Жапонияның Advantest акциялары 6%-ға арзандады, ал Азиядағы ең қымбат компания — Taiwan Semiconductor Manufacturing Company (TSMC) қағаздары 3%-ға төмендеді. Бұл компаниялардың барлығы Nvidia-ның жеткізушілері болып табылады.
Сәуірден бері чипмейкерлердің капитализациясы триллиондап өсті — инвесторлар жасанды интеллект үшін есептеу қуатына сұраныстың жарылғыш өсіміне сенім артқан еді. Алайда қазіргі төмендеу — сектордың табыстылығы мен тым жоғары бағалануы туралы күмәннің күшеюін көрсетеді, әсіресе пайыздық мөлшерлемелер күткеннен ұзақ жоғары деңгейде қалса.
Аналитиктер не дейді?
Нарықтардағы күрт құбылу инвесторлардың жасанды интеллектке сенімінен емес, нарықтың өсу қарқынына күмәнінен туындап отыр, деп жазады Reuters.
— «Қазіргі түзету көбіне позицияларды қайта бөлуге байланысты — ең көп төмендеп жатқан компаниялар бұған дейін ең жоғары өсім көрсеткендер», — дейді Pictet Asset Management компаниясының Сингапурда орналасқан аға портфельдік менеджері Джон Уитхар.
— «Біз тәуекелі жоғары сегменттерде жаппай сатылымды байқап отырмыз — бұл қысқа мерзімді табысты фиксациялауға ұқсайды», — дейді Barrenjoey компаниясының (Гонконг) Азия бойынша акцияларды тарату бөлімінің басшысы Ангус Макгио. Оның айтуынша, 2025 жылға бағытталған қор менеджерлері турбуленттіліктен қашқанымен, нарықтан толық кетуге асықпайды. «Жыл сәтті өтті, сондықтан бәрін сатып жіберу — қисынсыз. Егер нарық қайта өсу белгісін берсе, инвесторлар жылдам оралады», — дейді ол.
— «Қазір құлдырау кезінде сатып алуға асығудың қажеті жоқ — соңғы раллидің үлкен бөлігі нақты негізге сүйенбеді. Егер ірі технологиялық компаниялар тағы 15–20%-ға түссе, онда сатып алу мүмкіндігін қарастыруға болады», — дейді Bloomberg сұхбатында GAO Capital хедж-қорының бас директоры Чауэй Як.
— «Нарықтар қып-қызыл түске боялған, бұл тәуекелдердің ауыр көрінісін көрсетеді. Құлдырау жалғасуы мүмкін деген мүмкіндікті жоққа шығармауымыз керек. Қарапайым тілмен айтқанда — қазір сатып алуға себеп аз», — дейді Pepperstone Group зерттеу бөлімінің жетекшісі Крис Уэстон (Bloomberg келтіруі бойынша).
— Кейбір сарапшылардың пікірінше, түзету — пайдалы үрдіс: ол қызып кеткен нарықтағы «буды шығарып», акцияларды салыстырмалы түрде арзан етеді. Сонымен қатар, Amazon мен Meta секілді технологиялық алпауыттар жасанды интеллектке ірі инвестицияларын жалғастырып жатқандықтан, чип өндірушілер алдағы уақытта да қаржылық нәтижелер мен акция бағасында бұдан пайда көруі мүмкін (Bloomberg).
«Біз өте биікке және өте жылдам көтерілдік — сондықтан құлдырау бүгін де, ертең де жалғасса, инвесторлар таңғалмауы керек», — дейді M&G Investments компаниясының Азия нарығына жауапты портфельдік менеджері Викас Першад. «Бірақ дәл қазір — сатып алу мүмкіндіктеріне назар аударатын сәт», — деп қосады ол.
