Circle акциясы есептен кейін 12% құлады. JPMorgan неге сатып алуға кеңес берді?
12 қарашада Circle Internet Group тоқсандық есебін жариялағаннан кейін котировкасы 12% құлдырағанына қарамастан, JPMorgan сарапшылары USDC стейблкоинының эмитентінің қағазын сатып алуға кеңес берді. Олар үшінші тоқсан нәтижелерін «сенімді» деп бағалап, күткеннен жоғары шыққанын атап өтті. JPMorgan қағазын «Нарықтан төмен» (underweight) рейтингінен «Нарықтан жоғары» (overweight) деңгейіне көтерді және Circle акциясының мақсатты бағасын $94-дан $100-ға дейін көтерді.
«Біздің ойымызша, тоқсан қорытындылары стейблкоиндердің дәстүрлі қаржы жүйесіне еніп жатқанын көрсетеді. Сондай-ақ, USDC стейблкоины жетекші токендердің бірі болып қала береді, ал Circle — негізгі серіктестердің бірі», — деп жазды JPMorgan сарапшылары MarketWatch келтірген жазбасында.
Сонымен қатар, JPMorgan сарапшылары USDC-тің нарықтағы үлесінің өсуі тоқтағанын, ал Tether (USDT) керісінше позициясын күшейтіп жатқанын мойындады. Circle өз инфрақұрылымына белсенді инвестиция құюды жалғастырып келеді. Қазір айналымда шамамен $75 млрд көлемінде USDC бар, бұл токенді капитализация бойынша Tether-ден кейінгі екінші стейблкоин етеді. Tether айналымында шамамен $183 млрд бар.
«Негізгі сұрақтардың бірі — стейблкоин нарығы «жеңімпаз бәрін алады» моделіне айнала ма? Бұл сұрақтың жауабы Circle-дің болашақ жалпы маржасын бағалау үшін өте маңызды», — деп атап өтті JPMorgan.
Бейсенбі күнгі саудада Circle акциясы 0,5% арзандап, $85,8-ға дейін түсті. Бұл — USDC эмитентінің қағазрын алғашқы рет ұсынған 5 маусымнан бергі ең төменгі деңгей.
Басқа да сарапшылар пікірі
«Үшінші тоқсан — қабылдауға болатын деңгейде. Бірақ төртінші тоқсанға жасалған болжам өсімнің баяулайтынын және қиындықтар болатынын көрсетеді», — деп жазды Mizuho Securities сарапшысы Дэн Долев Bloomberg келтірген аналитикалық жазбасында.
«Инвесторлар, ең ықтимал, USDC таратуға кететін шығындардың өсуінен алаңдап отыр», — деп жазды Baird сарапшысы Дэвид Конинг. Оның айтуынша, төртінші тоқсанда «табыстан тарату шығындарын алып тастағандағы» маржа шамамен 35% болуы мүмкін, ал алғашқы үш тоқсанда бұл көрсеткіш 38–40% деңгейінде болған. Bloomberg атап өткендей, бұл Circle жылдық маржа болжамын диапазонның жоғарғы шегіне — 38%-ға көтергеніне қарамастан.
Конингтің түсіндірмесіне сәйкес, инвесторлар компанияның тарату, транзакциялар және өзге де шығындарына назар аударған — олар 74% өскен. Бұл USDC таратуға төлемдердің артуымен, Coinbase платформасындағы USDC орташа қалдықтарының ұлғаюымен және басқа серіктестіктермен байланысты, деп түсіндірді Circle.
U.S. Tiger Securities сарапшысы Бо Пэй Circle акциясының сәрсенбідегі құлдырауын жылдық жалпы маржа болжамының 38%-ға қайта қаралуымен байланыстырды. Оның айтуынша, бұл төртінші тоқсанның әлсіз болатынын білдіреді, деп жазды Reuters.
«Котироканың төмендеуі акцияның ағымдағы бағалауында USDC өсіміне қатысты тым жоғары күтістердің әлі де сақталуымен, сондай-ақ Arc нативті токенін іске қосу мүмкіндігімен байланысты болуы мүмкін. Ол USDC таралу қарқынына әсер етуі ықтимал», — деді Clear Street басқарушы директоры Оуэн Лау Reuters-ке берген пікірінде.
