Citi Intel акцияларының рейтингін төмендетті. Nvidia серіктестігі көмектесе ме?
Citi инвестбанк Intel мен Nvidia серіктестігі туралы жаңалықтан кейінгі ажиотажды сынға алды. Сарапшылардың пікірінше, америкалық чип өндіруші жаңа инвестицияға қарамастан «қиындық көре береді». Банк Intel акцияларының рейтингін «бейтараптан» «сатуға» дейін түсірді, бірақ мақсатты бағасын 21%-ға көтерді. 19 қыркүйектегі саудада Intel қағаздары 3%-ға арзандады — оған дейінгі күні олар соңғы 38 жылдағы ең үлкен өсімді көрсеткен еді.
Егжей-тегжейі
CNBC хабарлауынша, Citi аналитигі Кристофер Дэнели Intel акциялары бойынша ұсынымды «бейтараптан» «сатуға» дейін төмендетті. Бірақ ол мақсатты бағаны $24-тен $29-ға көтерді. Жаңартылған баға 19 қыркүйектегі жабылу бағасынан шамамен 2%-ға төмен.
Жұма күні саудада Intel қағаздары 3,2%-ға түсіп, $29,58 болды. Дегенмен бұған дейінгі күні акциялар 22,8%-ға өсіп, рекорд жаңартты. Себебі Nvidia Intel-ге $5 млрд инвестиция салатыны белгілі болды. Бұл күн чипмейкер үшін 1987 жылдың 29 қазанынан бергі ең табысты күн болды.
Citi неге скептикалық көзқараста?
Citi серіктестік Intel мәселелерін шешеді деп сенбейді. «Intel-дің табысты контракттық өндіріс құратынына сенім аз. Біз рейтингті төмендетеміз, себебі акция бағасына бұл табыс қазірдің өзінде енгізілген», — деді Дэнели.
Келісім аясында Intel Nvidia графикасын өз процессорларына қосады және ЖИ платформаларға арналған чиптерді шығарады. Алайда Citi мұндай интеграция AMD-ге қарсы бәсекелестік артықшылық бермейді деп санайды. AMD әлдеқайда өнімді процессорларды төмен бағамен ұсынады.
«Nvidia графикасын қосу CPU-ды күшейтпейді, өйткені компьютердің өнімділігіндегі басты рөлді процессордың өзі атқарады», — деп жазды Дэнели.
Citi сонымен қатар Intel мен Nvidia серіктестігі ЖИ саласында үлкен табыс әкелмейді дейді. Ортақ шешімдердің нарық әлеуеті бар болғаны $1–2 млрд деп бағаланды.
Intel үшін бұл келісім нені шешеді?
Barron’s жазғандай, серіктестік Intel-ге бірнеше мәселені шешуге мүмкіндік береді. Ең әуелі компания қосымша өтімділікке ие болды. Бұған қоса, АҚШ үкіметінің 10% үлес сатып алуы, Nvidia мен SoftBank инвестициялары инвесторларға Трамп әкімшілігі Intel-ді құлатпайды деген сенім берді. Сол себепті де котировкалар шұғыл көтерілді. Тамыздан бері Intel акциялары 50%-дан астамға өсті.
Алайда сарапшылар басты мәселе — Intel-дің өндірістік технологиядағы артта қалуы шешілмегенін айтады. Компания үміт артып отырған контракттық өндіріс әлі де тайваньдық TSMC-ден әлсіз. Оның үстіне Intel-дің ірі сыртқы клиенттері жоқ. Фабрикалар сыртқы тапсырыссыз бос қалуы мүмкін. Nvidia да әзірге тапсырыс береді деп нақты уәде айтқан жоқ. Financial Times мәмілені «қаржылай символдық, бірақ саяси маңызды» деп сипаттады.
Басқа сарапшылар не дейді?
Mizuho сарапшысы Джордан Кляйн: «Қысқа мерзімде инвесторлар импульске еріп, Intel акцияларын сатып алуы мүмкін. Бірақ бұл мен үшін компания бағасын қайта қарауға себеп емес», — деп жазды.
Ал басқа сарапшылар мәмілеге оң көзқараста. Saxo Bank стратегі Чару Чанана келісім Intel-дің беделін күшейтіп, «болашақта Nvidia TSMC шамадан тыс жүктелсе немесе геосаясат араласса, Intel-ді балама өндіруші ретінде қарастыруы мүмкін» деді.
Benchmark сарапшысы Коди Эйкри акциялар рейтингісін «ұстаудан» «сатып алуға» дейін көтерді. Ол келісімді «бұрылыс сәті» деп атады. Мақсатты бағасы $43 — яғни 19 қыркүйектегі жабылу бағасынан 45%-ға жоғары.
«Бұл жаңалық Intel-дің ұзақ мерзімді бәсекелік позициясында маңызды бетбұрыс және ЖИ индустриясының көшбасшысы тарапынан үлкен сенімнің белгісі», — деп жазды ол.
LSEG дерегінше, Уолл-стриттегі 47 сарапшының 39-ы Intel акцияларына бейтарап көзқараста. MarketWatch дерегі бойынша консенсус бағасы $23,4, яғни жұма күнгі жабылу бағасынан 21%-ға төмен.
