Coinbase, Palantir, Nvidia: АҚШ-тың ірі зейнетақы қорының жаңа инвестициялары
АҚШ-тағы ең ірі мемлекеттік зейнетақы қоры CalPERS (California Public Employees’ Retirement System) 2025 жылдың екінші тоқсанында Coinbase, Palantir, Nvidia және Robinhood акцияларындағы үлесін ұлғайтты. Соңғы жылдары қордың табыстылығы салалық орташа деңгейден төмен болғанымен, басқарушылар ұзақмерзімді басымдықты басқа активтер классына беріп отыр.
Егжей-тегжейлі
АҚШ Қаржы нарығын реттеу комиссиясына (SEC) тапсырылған есепке сәйкес CalPERS екінші тоқсанда Coinbase криптобиржасындағы үлесін 42%-ға арттырып, қосымша 98 827 акция сатып алды. Тоқсан соңында портфельде барлығы 332 791 акция болды.
Palantir (AI-жүйелер әзірлеушісі) және Nvidia (AI-чиптер өндірушісі) бойынша инвестицияларын шамамен 10%-ға өсіріп, тиісінше 3,6 млн және 64,7 млн акцияға жеткізді.
Robinhood сауда платформасының 186 687 акциясын қосымша сатып алып, үлесін 17,4%-ға арттырды (барлығы — 1,26 млн акция).
Контекст
CalPERS шамамен $570 млрд активтерді басқарады және Калифорниядағы 2,3 млн қазіргі және бұрынғы мемлекеттік қызметкерге зейнетақы төлейді. Қор нақты мәмілелерді түсіндіруден бас тартып, инвестициялық стратегиясының индекстерге және сандық модельдерге негізделетінін айтады.
2025 жылдың маусымында бір топ зейнеткерлер қордың тиімділігін тексеруді талап етті. Соңғы бес жылда CalPERS-тің орташа жылдық табыстылығы 6,6% болды, бұл орташа көрсеткіштен (7,15%) төмен.
FT дерегінше қор жақында жеке капиталға инвестицияны арттыру жоспарын жариялап, мақсатты үлесті 13%-дан 17%-ға дейін көтерді (нақты үлес маусым соңында — 18%). Кейбір бұрынғы директорлар бұл қадам зейнеткерлер үшін тәуекелді арттырады деп алаңдаса, бас директор Марси Фрост жеке инвестициялар ұзақ мерзімде акция нарығынан озық нәтиже береді деп санайды.
2025 жылдың 30 маусымында аяқталған қаржы жылында CalPERS 11,6%-дық табыс көрсетіп, соңғы төрт жылдағы ең жоғары нәтижеге жетті. Қамтамасыз етілу деңгейі 75%-дан 79%-ға өсті. Жеке капитал портфелі 14,3% табыс әкелсе, ең үлкен пайда қоғамдық компаниялардың акцияларынан түсті — 16,8%.
