CoreWeave-тің тоқсандық табысы 134%-ға артты
Nvidia-ның бұлтты технологиялар саласындағы серіктесі CoreWeave үшінші тоқсанда бұлт инфрақұрылымына инвестиция салу нәтижесінде операциялық маржаның төмендегенін және жылдық табыс болжамының азайтылғанын хабарлады — бұл өткен тоқсандағы екі еселенген сатылым өсіміне қарамастан орын алды. Есеп жарияланғаннан кейін CoreWeave акциялары кеңейтілген сауда сессиясында шамамен 7%-ға дейін арзандады.
Егжей-тегжейлі
Bloomberg деректеріне сүйенсек, жасанды интеллект модельдерін әзірлеу және оқытуға арналған бұлтты қызметтерді жеткізуші компанияның үшінші тоқсандағы операциялық табыс маржасы 4%-ды құрады. Бұл сарапшылардың ортақ болжамы саналатын 6,5%-дан төмен. Салыстыру үшін: 2024 жылдың дәл осы кезеңінде көрсеткіш 20% болған.
Bloomberg жазғандай, маржаның төмендеуі жалпы оң қаржылық есептің әлсіз тұсы болды. Компанияның табысы 134%-ға өсіп, $1,36 млрд-қа жетті. LSEG деректері бойынша, Уолл-стрит сарапшылары $1,29 млрд күтті деп хабарлайды CNBC. Бір акцияға шаққандағы шығын $0,22 болды — бұл сарапшылар болжаған $0,57-дан айтарлықтай аз. Сонымен қатар, есепте компанияның болашақтағы сатылымдарының көрсеткіші саналатын тапсырыстар портфелі тоқсан соңында $55,6 млрд болғаны жазылған. Бұл алдыңғы кезеңмен салыстырғанда шамамен екі есе көп.
Есеп жарияланған соң CoreWeave акциялары алғашқыда шамамен 2%-ға төмендеп, кейін құлдырау қарқынын үдетіп, бір сәтте 7%-ға дейін арзандады. Инвесторлардың көңіл-күйін компанияның жылдық табыс болжамының төмендеуі бұзған болуы мүмкін. Bloomberg дерегінше, компания 2025 жылғы сатылым көлемін $5,05–5,15 млрд диапазонында болжайды. Бұған дейінгі болжам $5,35 млрд-қа дейінгі табыс көзделген еді.
«Біз дата-орталық салушы серіктестің кестеден қалып жатуына байланысты уақытша кідірістерді бастан кешіп отырмыз», — деді CoreWeave бас директоры Майкл Интратор Bloomberg-ке. Агенттік бұл жағдай жасанды интеллектке деген «шексіз сұранысты» қанағаттандыру жолында бүкіл саланың тап болып отырған қиындықтарын көрсетеді деп жазады.
Контекст
CoreWeave — жоғары өнімді жасанды интеллект чиптерін жалға берумен айналысатын neocloud-компаниялардың бірі. Мұндай қызметтерге сұраныстың артуы компанияны жаңа дата-орталықтар салуға және оларды ең заманауи құралдармен жабдықтауға итермеледі. Сонымен қатар, CoreWeave соңғы жылдары негізгі клиенті болып келген Microsoft-қа тәуелділікті азайтып, тұтынушылар базасын әртараптандыруға тырысып келеді.
2024 жылдың қыркүйегінде CoreWeave өзінің акционері әрі әлемдегі жетекші жасанды интеллект процессорларын өндіруші Nvidia компаниясымен $6,3 млрд көлемінде келісімшарт жасады. Бұл келісім бойынша Nvidia 2032 жылға дейін CoreWeave-тің дата-орталықтарындағы сатылмай қалған бұлтты қуаттарды сатып алуға міндеттелді. Сарапшылардың айтуынша, бұл мәміле CoreWeave-ке Nvidia-ның негізгі бұлтты серіктесі мәртебесін беріп қана қоймай, ИИ есептеу қуатына деген сұраныстың уақытша төмендеуінен қорғайды.
Үшінші тоқсанда CoreWeave сондай-ақ OpenAI (ChatGPT жасаушысы) компаниясымен $6,5 млрд көлемінде әріптестікті кеңейтетін келісімге қол қойды және Meta компаниясымен алты жылдық, $14,2 млрд-қа дейінгі келісімшарт жасасты.
CoreWeave наурыз айында Nasdaq биржасында IPO өткізіп, акцияларын $40 бағамен орналастырды. Дүйсенбі күнгі сауда қорытындысы бойынша олардың бағасы $105,61 болды — бұл бастапқы бағадан 164% жоғары. Салыстыру үшін Nasdaq индексі сол кезеңде бар болғаны 32%-ға өсті.
