Duolingo акциялары 34%-ға шарықтады. Оларды сатып алуға кеш емес пе
Тіл үйренуге арналған платформа Duolingo компаниясының тоқсандық есебі жарияланғаннан кейін акциялары 30%-дан астам өсті. Компания табысы сарапшылар күткен нәтижеден асып түсті. Кіріс жылдық есеппен 42%-ға, ал күнделікті белсенді қолданушылар саны 40%-ға артты. Жасанды интеллектпен жұмыс істейтін жазылымдар, жаңа курстар мен «суперқосымша» жасау амбициялары инвесторлардың қызығушылығын арттырып отыр.
Егжей-тегжейлі
Duolingo акциялары Нью-Йорк биржасындағы сауданың басында 34%-ға өсіп, $460,5 деңгейіне жетті — бұл маусым ортасынан бергі ең жоғары көрсеткіш. Инвесторлар компанияның екінші тоқсанға арналған есебіне оң баға берді. Duolingo бір акцияға шаққанда $0,91 таза табыс жариялады, ал кіріс $252,3 млн болды. Сарапшылардың FactSet сауалнамасына сәйкес олар $0,59 пайда мен $240,6 млн кіріс күтті, деп хабарлайды The Barron’s.
Компанияның айтуынша табыстың артуына күнделікті белсенді аудиторияның 40%-ға, 47,7 млн қолданушыға дейін өсуі мен ай сайынғы белсенді қолданушылардың 24%-ға, 128,3 млн адамға дейін артуы себеп болды. Осы факторлардың негізінде таза табыс 84%-ға, $44,8 млн-ға дейін артты — мұнда табысты валюталық курс, жарнама кірістерінің өсуі және Super жазылымдарының жетістігі де рөл атқарды.
«Біз екінші тоқсанда брондау мен кіріс бойынша өзіміздің амбициялы мақсаттарымыздан да асып түстік — әрі мұны табыстылықты арттыра отырып жасадық», — деді Duolingo негізін қалаушы және бас директор Луис фон Ан.
Компания үшінші тоқсанға арналған болжамын жақсартып, кірісті $257–261 млн аралығында күтуде — бұл Уолл-стрит консенсусы күткеннен жоғары. Сонымен қатар, жылдық болжам да көтерілді: 2025 жылға арналған табыс $1,01–1,019 млрд болады деп күтілуде.
Сарапшылар не дейді
Duolingo акциялары соңғы бір жылда 100%-дан астам өсті. Компанияға инвестиция салуды қарастырғанда қазіргі жоғары бағалануды ескеру керек. Акция бағасының өсуі инвесторлардың үлкен үмітіне негізделген, алайда алдағы динамика стратегияны жүзеге асыру тиімділігіне байланысты болады, дейді ValueTheMarkets сарапшылары. Олар стратегия сәтті іске асса, акция бағасы әлі де өсуі мүмкін деп санайды, бірақ нарықтағы жалпы жағдай мен бәсекелестер әрекетін де ескеру қажет.
Needham сарапшылары есеп жарияланғаннан кейін Duolingo акцияларын сатып алуға кеңес беруді жалғастырып, мақсатты бағаны $460 деңгейінде сақтап қалды, деп жазады Investing.com. Олардың айтуынша Duolingo-ның Max жазылымы, шахмат курсы және жаңа монетизация құралдары компанияның өсу әлеуетін арттыра түсті.
Алайда Zacks Investment Research компаниясы Duolingo акцияларына «сату» (sell) рейтингін берді — бұл қысқамерзімде кең нарықпен салыстырғанда әлсіз динамика күтілетінін білдіреді.
Duolingo дамуының перспективалары
Duolingo-ның негізін қалаушы және бас директоры Луис фон Анның айтуынша компанияның негізгі өсу драйвері — генеративті жасанды интеллектті белсенді енгізу. Бұл тәсіл оқыту курстарының аясын едәуір кеңейтуге мүмкіндік берді. Super және Max жазылымдарының үлесі ерекше маңызды.
Duolingo-да екі деңгейлі жазылым бар:
Super — белсенді үйренушілерге арналған,
Max — жетілдірілген қолданушыларға арналған.
Екі тариф те жасанды интеллектке негізделген функцияларды қамтиды:
бейнеботтармен сөйлесу практикасы,
қателерді дербес талдау,
кері байланыстың жетілдірілген құралдары.
Негізгі бағыты шет тілдерін оқыту болғанымен, Duolingo «білім беру саласындағы суперқосымша» болуды мақсат етеді. Осы орайда, компания математика, музыка және басқа пәндер бойынша курстар қосуда. Соңғы тоқсанда Duolingo алғашқы шахмат курсын іске қосты, деп жазады SiliconAngle.
Сонымен қатар, Duolingo Лондонда орналасқан музыкалық стартап NextBeat-ті сатып алғанын хабарлады — бұл стартап музыкалық ойындар жасаумен айналысады, деп еске салады The Wall Street Journal. Келісім сомасы жарияланбағанымен, 23 адамнан тұратын команда Duolingo қатарына қосылып, қазіргі уақытта тек фортепиано ойнауды үйретумен шектелген музыка курстарын кеңейтуге көмектеспек.
