Elliott Toyota Industries акциясын сатып алды. Компания бір жылда 55% қымбаттады
Әлемдегі ең танымал белсенді инвесторлардың бірі — Elliott Management, өткен тоқсанда жапондық Toyota Industries компаниясының акционері атанды. Компания жүк көтергіш, автокөлік бөлшегін мен тоқыма станогын өндіреді. Осылайша Elliott Toyota Industries-ті жекеменшік компанияға айналдыруды көздейтін акцияны кері сатып алу туралы даудың төңірегіне қосылып кетті. Сатып алушылардың жоспары жүзеге асқан жағдайда, бұл Жапония тарихындағы осындай ең ірі және әлемдегі ең үлкен келісімдердің бірі болмақ, деп растады Bloomberg.
Егжей-тегжейлі
Elliott 2025 жылғы 30 қыркүйектегі жағдай бойынша Toyota Industries компаниясының 3,26% үлесіне ие болған. Бұл Elliott-ті компанияның ең ірі акционерлерінің біріне айналдырды, деді Bloomberg. Содан бері белсенді инвестордың үлесі ұлғайып, қазір 5% құрады, деп хабарлады Financial Times дереккөздері.
Toyota Industries акционері атанғаннан кейін Elliott «әлемдегі ең ірі әрі ең даулы жекешелендіру әрекеттерінің бірінің ортасында» қалды, деп жазды Financial Times. Басылымның хабарлауынша, белсенді инвестор бастапқыда Toyota Fudosan жылжымайтын мүлік компаниясы мен әлемдегі ең ірі автокөлік өндірушісі Toyota Motor компаниясының директорлар кеңесінің төрағасы Акио Тойода бастаған инвесторлар консорциумы ұсынған акцияларды кері сатып алу ұсынысына қарсы шыққан. Bloomberg атап өткендей, бұл — Жапония тарихындағы жария компанияны жекеменшікке айналдыру жөніндегі ең ірі ұсыныс. Ұсынылған мәміле сомасы 4,7 трлн иенді ($30,6 млрд) құрады.
Elliott-тің пікірінше, Toyota Industries акциясына ұсынылған 16 300 иен (ағымдағы бағам бойынша $105,8) бағасы тым төмен. Bloomberg мәліметінше, бұл сома ұсыныс жасалған сәтте-ақ соңғы жабылу бағасынан 11% аз болған. Салыстыру үшін: Toyota Industries қағазы 11 қарашадағы саудада 1,8% қымбаттап, 17 250 иенге ($111,9) жетті. 2025 жылдың басынан бері олардың құны 34%, ал соңғы 12 айда шамамен 55% артқан.
FT дерегінше, Elliott Toyota Industries-ке «елеулі инвестиция салғанын» және Toyota Fudosan мен Акио Тойода ұсынған мәміле жөнінде компания басшылығымен және директорлар кеңесімен өз көзқарасын бөліскенін растады. Elliott бұл ұсынылған сома Toyota Industries-ті «елеулі түрде төмен бағалайды» деп санайды. Ал компанияның өзі акционерлермен «шынайы әрі өзара құрметке негізделген сындарлы келіссөздер жүргізіп жатқанын» мәлімдеді, деп жазды FT. Bloomberg хабарлауынша, Toyota Fudosan бұл жағдайға қатысты пікір білдіруден бас тартты.
Контекст
2025 жылдың жазында жасалған Toyota Industries акциясын кері сатып алу туралы ұсыныс институционалды инвесторлар мен корпоративтік басқару саласының сарапшыларының наразылығын тудырды. Олар мәміленің ашық еместігін және компания бағасының төмен қойылғанын сынға алған, деп жазды Financial Times. United First Partners қыркүйекте Toyota Industries активтерінің бір акцияға шаққандағы әділ құнын 22 782 иен деп бағалаған, ал Global Equity Research сарапшысы Арун Джордж қараша айында бұл көрсеткішті 19 607 иен деңгейінде атаған, деп қосты Bloomberg.
Мәміле жүзеге асқан жағдайда, Тойода Жапонияның ең ірі бизнесінің үстінен бақылауын күшейтеді, деп қосты Bloomberg.
