Ethereum және Bitcoin: Citi болжам жасады
Citigroup нарықтық капитализациясы бойынша екінші криптовалюта — Ethereum-ның қысқа және ұзақмерзімді болжамын көтерді: алдағы бір жылда 25%-дан астамға өсуін күтеді. Ал әлемдегі ең қымбат криптомонета — биткоинге қатысты бағасын, керісінше, макроэкономикалық факторлардың қысымына байланысты сәл төмендетті.
Егжей-тегжейлі
Citigroup Ethereum бағасына болжамын жыл соңына дейін $4500 деңгейіне дейін көтерді — бұл ағымдағы деңгейден шамамен 3% жоғары. Ал келесі жылға таргет $5440 болып белгіленді, бұл тағы 26% өсімді білдіреді, деп хабарлайды Reuters. Сонымен қатар банк криптовалютаның бағасының төменгі шегін болжау қиын екенін атап өтті — желілік белсенділік пен экожүйедегі құнның бөлінуіне қатысты белгісіздікке байланысты.
Инвестбанк сарапшысы Ethereum-ның осы жаздағы күрт өсуіне және институционалдық инвесторлар мен қаржылық кеңесшілер тарапынан сатып алулардың жандануына сілтеме жасады. Оның пікірінше, алдағы өсімді крипто-ETF қорларына және цифрлық қазынашылықтарға түсімдердің артуы, сондай-ақ, стейкинг пен децентрализденген қаржылық платформалар (DeFi) арқылы қосымша кіріс алу мүмкіндігі қолдайды.
Citi биткоинға қатысты болжамын жыл соңына дейін $135 000-дан $133 000-ға дейін сәл төмендетті. Жаңа таргет ағымдағы деңгейден шамамен 12% өсімді білдіреді. Сарапшының айтуынша, инвесторлар барған сайын табысты Ethereum-ды артық көреді, ал биткоин тек бағаның өсуіне тәуелді. Сондай-ақ, Citi қарама-қайшы макроэкономикалық факторларға — доллардың күшеюі мен алтын бағасының төмендеуіне — сілтеме жасап, олар жыл соңына дейін биткоинның өсуін тежейтінін атап өтті.
Дегенмен, 12 айлық көкжиекте инвестбанк оптимизмін сақтап, биткоин бағасы $181 000-ға дейін өседі деп күтеді, яғни ағымдағы бағадан тағы 50%-дан астамға қымбат. Қазір биткоин оның нақты пайдаланылу қарқынын ескеретін модельдер көрсеткеннен қымбат тұр, бірақ «сандық алтын» нарративі өзекті болып қала береді және жаңа ағымдардың елеулі бөлігін тарта алады, деп сенеді Citi. Базалық болжам бойынша, биткоинге шамамен $7,5 млрд жаңа инвестиция құйылады. «Бұқа» сценарийі қор нарығының өсуіне және сұраныстың артуына байланысты болады, ал «аю» жағдайында, яғни рецессия орын алса, биткоин бағасы $83 000-ға дейін төмендеуі мүмкін, деп болжайды сарапшы.
Биткоин мен Ethereum қанша тұрады?
2 қазанда биткоин бағасы 2,4% өсіп, $119 372-ға жетті. Жыл басынан бері ол шамамен 28% көтерілді, бұған криптоиндустрия ұзақ уақыт бойы күткен реттеушілік жеңістер ықпал етті. Өзін «криптопрезидент» деп атаған президент Дональд Трамп пен оның отбасы соңғы бір жылда бұл секторға белсенді араласқанын Reuters атап өтті.
Ethereum құны да шамамен 2,4% өсіп, $4393-ға дейін жетті. Жыл басынан бері ол 32%-ға жуық қымбаттады, бұған мемлекеттік қолдаудың күшеюі мен институционалдық инвесторлардың қызығушылығының артуы әсер еткенін The Motley Fool түсіндіреді. Маңызды факторлардың бірі — стейблкоиндар нарығын реттейтін GENIUS Act заңының қабылдануы. Себебі, USDT пен USDC сияқты көптеген ірі токендер Ethereum блокчейнін пайдаланады, ал олардың танымалдығының өсуі Ethereum-ға деген сұраныстың айтарлықтай көзіне айналуы мүмкін, деп жазады басылым.
