ЕуроОдақ АҚШ тауарларына салынған баж салығын жедел алып тастамақ
Еуропалық одақ осы апта соңына дейін АҚШ-тан келетін өнеркәсіптік тауарларға барлық кедендік баж салықтарын алып тастау жөніндегі заңнаманы жеделдетіп қабылдауды жоспарлап отыр, деп хабарлайды Bloomberg дереккөздерге сілтеме жасап.
Бұл талапты АҚШ президенті Дональд Трамп ЕО-дан әкелінетін автомобильдерге салынатын импорттық бажды төмендету шарты ретінде қойған.
ЕО-ның сауда саясатына жауапты Еурокомиссия, сондай-ақ, кейбір теңіз өнімдері мен ауылшаруашылық тауарларына жеңілдетілген баж енгізуді көздеп отыр, деп жазады агенттік.
Дереккөздерге сүйенсек, Еурокомиссия бұл жолы жаңа заңнаманың ықпалын бағалау рәсімін — мұндай жағдайларда әдетте қолданылатын стандартты процесті — өткізбеуді ұйғарып отыр. Себебі негізгі мақсат — процесті барынша жеделдету.
Бұл ЕуроОдаққа не үшін маңызды?
ЕО Трамппен жасалған сауда келісімі АҚШ-қа тиімді екенін мойындады, бірақ оны бизнес үшін тұрақтылық пен сенімділікті қамтамасыз етудің қажетті шарты деп сипаттады, деп жазады Bloomberg.
Бұған дейін АҚШ Еуропадан келетін автокөліктерге баж салығының 27,5% деңгейінде қала беретінін мәлімдеген. Бұл мөлшерлеме ЕО АҚШ өнеркәсіптік тауарларына салынатын алымдарды алып тастамайынша өзгермейді. Ал ЕО-дан келетін басқа тауарлардың басым бөлігіне 15% көлемінде сауда салығы қолданылады.
Егер Еуроодақ осы айдың соңына дейін АҚШ тауарларына баж салығын жойса, онда 15%-дық мөлшерлеме Еуропа автокөліктеріне артқа қарай күшіне еніп, 1 тамыздан бастап есептелетін болады, деп жазады агенттік.
Көлік өнеркәсібінің рөлі
Автомобиль өнеркәсібі — ЕО-ның АҚШ-қа экспортындағы басты салалардың бірі. Мәселен, тек Германияның өзі 2024 жылы АҚШ нарығына жаңа көліктер мен қосалқы бөлшектерді 34,9 млрд доллар көлемінде жеткізген.
