Freedom Broker АҚШ-тағы дата-орталықтар бумынан ұтатын бес энергия компаниясын атады
АҚШ-та деректерді өңдеу орталықтарының жылдам дамуы алдағы жылдары электр энергиясына сұраныстың негізгі драйверіне айналмақ. Бұл электр энергиясы нарығында жұмыс істейтін компанияларға тиімді. Мұндай пікірді Freedom Broker сарапшылары келтірген. Олар осы үрдістен пайда көруі мүмкін бес коммуналдық компанияны бөліп көрсетті.
Егжей-тегжейі
АҚШ Энергетикалық ақпарат басқармасының (EIA) болжамына сүйенген Freedom Broker сарапшылары елдегі жалпы электр тұтыну 2025 жылы 2,3%-ға, ал 2026 жылы тағы 2,1%-ға өседі дейді. Елдің ескі инфрақұрылымы қазірдің өзінде зор жүктемеге тап болғандықтан, оны жаңғыртуға миллиардтаған доллар инвестиция салу қажет болады.
Осыны ескерген сарапшылар 2027 жылға арналған акция бағасының болжамды табысқа қатынасы (P/E), 2026 жылғы дивидендтік табыстылық және қазіргі қарыз деңгейіне қарай ең тартымды деп саналатын компанияларды таңдады.
Қандай компаниялар аталды?
American Electric Power (AEP)
АҚШ-тағы ең ірі әрі әртараптандырылған энергия компанияларының бірі. Огайо мен Техаста белсенді жұмыс істейді — мұнда дата-орталықтардан электрге сұраныс тез өсуде. AEP желілерін жаңғыртуға қаржы салып, сенімділігін арттыруда. Бұл табыс базасының өсуіне ықпал етеді.
Алайда әр штаттағы түрлі реттеу тәртібі болжам жасауды қиындатады. Сарапшылардың ортақ бағасы — бір акция үшін 114,3 $, бұл 21 тамыздағы жабылу бағасына сәйкес келеді. 22 тамыздағы саудада акциялар 0,6%-ға өсті.
Pinnacle West Capital (PNW)
Компанияның еншілесі Arizona Public Service (APS) Аризонадағы ең ірі электр жеткізуші. Өңірде жаңа зауыттар, соның ішінде TSMC-нің 65 млрд $ инвестициясы бар чип өндірісі қарқынды дамып жатыр. Бұл PNW-ға тікелей пайда әкеледі.
Негізгі тәуекелдер — тек бір штатқа тәуелділік және экологиялық проблемалар, соның ішінде су тапшылығы. Сарапшылар бағасы — 96 $, өсім әлеуеті 5,5%. 22 тамызда акциялары 0,3%-ға көтерілді.
Dominion Energy (D)
Солтүстік Вирджинияда жетекші орынға ие — бұл әлемдегі ең ірі дата-орталықтар нарығы. Компания жаңа қуат қосуға сұраныстар алып, желілерін кеңейтуге миллиардтаған инвестиция құюда.
Қауіптері — бизнес шоғырлануының жоғары болуы және реттеудің қатаңдауы мүмкіндігі. Сарапшылар бағасы — 60 $, бұл 2% төмендеу әлеуетін көрсетеді. 22 тамызда акциялары 1,5%-ға өсті.
Duke Energy (DUK)
Солтүстік және Оңтүстік Каролинада, сондай-ақ Орта Батыста мықты позицияға ие. Бұл аймақтарда дата-орталықтар мен өндіріс қарқынды өсіп жатыр. Компания 5 жылға 87 млрд $ инвестициялық бағдарлама жүзеге асыруда. Оның ішінде 7 ГВт газ станцияларын салу бар.
Негізгі тәуекел — жоспардың ауқымы: кешігу мен артық шығын болмауы тиіс. Сондай-ақ штат билігі тарифтерді көтеруге рұқсат беруі қажет. Сарапшылар бағасы — 131,4 $, өсім әлеуеті 6%. 22 тамызда акциялары 0,3%-ға қымбаттады.
Xcel Energy (XEL)
Сегіз штатта жұмыс істейтін ірі коммуналдық компания. Дата-орталықтар Миннесота мен Колорадо өңірлерінде белсенді дамып жатыр. Компанияға 8,9 ГВт-қа дейінгі қосылу өтініштері түскен. Оларды жүзеге асыру үшін Xcel бес жылда 45 млрд $ салмақ. Бұл 2029 жылға дейін табыс базасын жылына орта есеппен 9,4%-ға өсіруі тиіс.
Қауіптері — орман өртінен келетін ықтимал шығын және реттеу қиындығы. Сарапшылар бағасы — 77 $, өсім әлеуеті 5,5%. 22 тамызда акциялары 1,2%-ға көтерілді.
Контекст
20 тамызда Melius Research сарапшылары да жасанды интеллект дамуы мен электр тұтынудың өсуінен ұтатын компанияларды атаған еді. Олар Constellation Energy, Vistra, NextEra Energy, NRG Energy және Talen Energy акцияларына «сатып алу» рейтингін берген.
