Freedom Holding акциялары The Motley Fool Moneyball портфеліне енді
Freedom Holding компаниясының акциялары зерттеу және инвестициялық талдау компаниясы The Motley Fool әзірлеген басты инвестициялық портфель — Moneyball құрамына енгізілді. Акциялар «сатып алу» (Buy) ұсынымын алды.
Moneyball — бұл The Motley Fool сарапшылары күн сайын талдап, жылына 250-ге дейін акция идеяларын таңдайтын инвестициялық портфель. Оны компанияның тең құрылтайшысы Том Гарднер басқарады. Сарапшылар бағалы қағаздардың нарықтық құнын, салалық үрдістерді және Moneyball атты жасанды интеллект платформасынан алынған деректерді біріктіріп талдайды. Мақсат — теңгерімді әрі әртараптандырылған инвестициялық портфель құру.
The Motley Fool басылымының жазуынша, бұл стратегияның басты мақсаты — инвесторларға тұрақты табыс әкелетін және нарықтан жоғары нәтиже беретін шешімдер қабылдауға көмектесу.
The Motley Fool портфельдері — компания ең жоғары өсу әлеуеті бар акцияларды іріктеп, 650 мыңнан астам жазылушысына күн сайын ұсынып отыратын жинақтар. Moneyball портфелі — компанияның негізгі жобаларының бірі және ұзақ мерзімді перспективада жоғары сенімділік деңгейі бар инвестицияларды қамтиды.
Акциялар жағдайы
13 қазандағы сауда кезінде Freedom Holding акциялары 4 пайызға өсіп, 169,8 долларға жетті. Компанияның нарықтық құны 10,3 миллиард доллардан асты.
2025 жылдың басынан бері Freedom Holding нарықтық құнын шамамен 30 пайызға арттырды.
Маусым айында компания акциялары АҚШ-тағы 98 пайыз жария компанияларды қамтитын Russell 3000 индексіне қосылды. Ал шілдеде олар First Trust Financial AlphaDEX Fund (FXO) биржалық қорына енгізілді. Бұл қорда Уоррен Баффет басқаратын Berkshire Hathaway, Уолл-стриттің ірі банктері Goldman Sachs пен Citigroup, Robinhood трейдинг платформасы, Coinbase криптобиржасы және басқа да қаржы компанияларының қағаздары бар.
Тамыз айында әлемдегі ең ірі инвестициялық компания BlackRock Freedom Holding Corp ішіндегі өз үлесін ұлғайтқанын хабарлады.
