Google жасанды интеллекттен келетін қауіпке жауабын ұсынды. Нарық қанағаттанды ма?
Google іздеу жүйесіндегі пайдаланушыларды жоғалтудан қауіптеніп, «ЖИ режимі» (AI Mode) деп аталатын жаңа функцияны таныстырды. Бұл — қолданушылар жасанды интеллектпен тікелей сұхбаттаса алатын жаңа дүние. WSJ бұл жаңашылдықты компания тарихындағы ең батыл қадам деп бағалап отыр. Алайда инвесторлар дәл осы сәтте нақты әрі сенімді стратегия күтті, сондықтан алғашқы реакция аса қуатты бола қоймады.
Егжей-тегжейі
Bloomberg жазуынша, Google жасанды интеллект негізіндегі чат-боттарға қызығушылық артқан тұста өзінің іздеу жүйесін қайта қарастыруға кірісті. Жыл сайынғы әзірлеушілер конференциясында компания «ЖИ режимін» таныстырды. Мұнда пайдаланушылар Google-дың AI жүйесімен (ChatGPT сияқты) тікелей диалог құра алады.
Google бұл құралды күрделі әрі көпсатылы сұраныстар үшін арнайы кеңістік ретінде сипаттайды. Алдағы уақытта бұл режимдегі бірқатар мүмкіндіктер іздеу нәтижелерінің астында орналасатын AI Overviews бөліміне де біртіндеп енгізіледі.
Alphabet бас директоры Сундар Пичаи WSJ келтірген сөзінде: «Бұл — іздеуді мүлде жаңа деңгейде қайта ойлап, интеллектуалдық пайымдауға негізделген тәсіл. Біз қазір жасанды интеллект платформасына көшу кезеңінің жаңа сатысына өттік. Жылдар бойы жүргізілген зерттеулер шынайы өнімге айналып жатыр» деді.
Нарық қалай қабылдады?
20 мамырдағы сауда кезінде Google-дың A санатындағы акциялары 2,2% төмендеп, күнді 1,54% жоғалтумен аяқтады. C санатындағы акциялар да осыған ұқсас нәтиже көрсетті. Bloomberg жазуынша, бұл инвесторлар жарияланған жаңалықтардан аса әсерленбегенін көрсетеді.
Synovus Trust компаниясының аға портфель менеджері Дэн Морганның пікірінше:
«Инвесторлар Google-дың Gemini атты жасанды интеллект жүйесінен ChatGPT сынды тегін қызметтерге қарсы нақты жауап күтуде». Ол жасанды интеллекттің нарықты кеңейтуі мүмкін бе, әлде Google үлесін тартып ала ма — бұл тақырып инвесторлар арасында пікірталас тудырып отырғанын айтты.
Rosenblatt Securities сарапшысы Бартон Крокет те мұнымен келіседі: жасанды интеллект Google үшін үлкен мүмкіндік те, қауіп те болуы мүмкін — бәрі компанияның әрекетіне байланысты.
Google-дың әзірлеушілер конференциясында басты назарды дәл іздеу жүйесіне аударуы жағдайдың қаншалықты маңызды екенін білдіреді, дейді Glean атты іздеу стартапының бас директоры әрі бұрынғы Google қызметкері Арвинд Джайн. Бұрын бұл конференцияда басқа өнімдер көбірек насихатталатын.
WSJ мұны Google-дың жасанды интеллекттен туындаған қауіпке қарсы ең батыл әрекеті деп атады. MarketWatch еске салғандай, ChatGPT де веб-беттерді қарап, қолданушыларға толыққанды диалог түріндегі жауап бере алады. Бұл Google-дың негізгі кіріс көзі — жарнама түсетін іздеу жүйесіне үлкен қауіп төндіреді.
The New York Times жазуынша, Google «ЖИ режимін» іске қосу арқылы өз бизнесін бәсекелестердің бұзуынан бұрын өзі бұзуға дайын екенін көрсетіп отыр. 2023 жылы іздеу жүйесі Google-ға шамамен 200 миллиард доллар табыс әкелген — бұл Alphabet табысының жартысынан астамы.
Moz компаниясының инновациялар жөніндегі директоры Пит Майерс NYT-ке берген сұхбатында былай деді: «Олар бұл жаңартуды көпке дейін кейінге қалдырды. Себебі ЖИ сапасы әлі жеткіліксіз деп ойлады және бұл арқылы табыс табу жолын түсінбеді. Енді бәсекеге қабілетті болу үшін қажет деп тапқанын іске асырып жатыр — бұл оларға ыңғайсыздық тудыруда».
Соған қарамастан, Baird сарапшылары Google әзірге басқа AI әзірлеушілерден іздеу сұранысы бойынша әлдеқайда озық екенін атап өтті. Сонымен қатар, бәсекелестерде толыққанды жарысқа қатысу үшін қажетті инфрақұрылым, жарнама технологиясы, аналитика секілді маңызды құралдар жоқ деп санайды.
Google тағы не жариялады?
Компания іздеуге қатысы жоқ басқа да жаңа жасанды интеллект функцияларын таныстырды. Мәселен, 2025 жылдың жазында Google чат-ботының келесі буыны — Gemini 2.5 Flash іске қосылады. Сонымен қатар, компания Deep Think атты бағдарламалау мен «логикалық пайымдауға» арналған жаңа үлгіні сынақтан өткізіп жатыр.
Google өзінің Chrome браузеріне, іздеу жүйесіне және Gemini қосымшасына ЖИ-агент — цифрлық көмекшінің мүмкіндіктерін енгізбек. Алдымен бұл агент Chrome-де веб-парақтардағы күрделі ақпаратты нақтылап, қысқаша мазмұнын шығарып беруге көмектеседі. Ал болашақта ол ЖИ арасында өздігінен әрекет етіп, сайттар арасында да еркін қозғала алатын болады.
Бұл мүмкіндіктердің басым бөлігі тек AI Ultra деп аталатын жаңа тариф бойынша қолжетімді болады. Оның айлық құны — 250 доллар. Бұл — компания үшін стратегиялық бетбұрыс: бұған дейін Google технологияларын тегін ұсынып, жарнама көрсету арқылы пайда тауып келген еді, деп жазады Bloomberg.
Контекст
Google-дың іздеу парағына ЖИ-ді енгізуі салдарынан қолданушылар AI Overviews арқылы қысқаша жауап алып, бастапқы дереккөз сайттарға сирек өте бастады. Соның салдарынан контент жасаушыларға келетін сыртқы трафик азайды. Бұл жағдайға Reddit ерекше назар аударды. Өткен жылдың төртінші тоқсанында Google-дан келетін ауысулар айтарлықтай қысқарған.
Wells Fargo сарапшысы Кен Гаврелскидің пікірінше, бұл — уақытша емес, тұрақты проблемаға айналып отыр. Оның айтуынша, қауіп тек Reddit-ке ғана емес, іздеу трафигіне тәуелді барлық компанияларға төніп тұр.
