Күтпеген келісім: Баффет басқарған Berkshire 1,6 млрд долларға жаңа инвестиция ашты
Уоррен Баффет жетекшілік ететін Berkshire Hathaway қиындыққа тап болған UnitedHealth сақтандыру компаниясының үлесін сатып алғанын жариялады. Жыл басынан бері акциялары екі есе арзандаған компанияға инвестиция салу нарық үшін күтпеген жағдай болды, деп жазады CNBC. Дегенмен, Баффеттің төмен бағаланған активтерді сатып алу тарихын ескерсек, бұл таңқаларлық емес. Екінші тоқсанда UnitedHealth акциялары басқа да белгілі инвесторларды қызықтырды — олардың қатарында Scion Asset Management-тен Майкл Бьюрри және Appaloosa Management-тен Дэвид Тепперлер бар.
Мәміле жайлы деректер
АҚШ Бағалы қағаздар және биржа жөніндегі комиссиясына (SEC) тапсырылған 13F нысанындағы есепке сәйкес Berkshire екінші тоқсанда UnitedHealth-тің 5 миллионнан астам акциясын шамамен 1,6 млрд долларға сатып алған. Осылайша бұл актив Berkshire портфеліндегі көлемі жағынан 18-орынды иеленді, ол Amazon мен Constellation Brands-тен кейін тұр.
Есеп берілген сәтке дейін UnitedHealth акциялары жыл басынан бері 50%-ға жуық арзандаған еді. Бірақ құжат жарияланғаннан кейін кеңейтілген саудада бағасы 10,5%-ға өсті.
UnitedHealth несімен ерекшеленеді
АҚШ-тың ең ірі жекеменшік медициналық сақтандырушысы ел тұрғындарының денсаулық сақтау құнының өсуіне наразылығының символына айналды. Бұл, әсіресе, былтыр желтоқсанда Medicare бағдарламасын басқаратын UnitedHealthcare бөлімшесінің бас директорын ашулы клиент атып өлтірген кезде айқын көрінді. Қазір UnitedHealth-ке қатысты АҚШ Әділет министрлігі Medicare есептерін рәсімдеу тәжірибесіне байланысты тергеу жүргізіп жатыр.
Сәуірде компания жылдық табыс болжамынан бас тартты, ал бас директор Эндрю Уитти қызметінен кетті. Шілдеде UnitedHealth жаңа болжам ұсынды, бірақ ол Уолл-стрит күтулерінен әлдеқайда төмен болды, бұл акция құнын одан әрі түсірді.
Бағасы түскен UnitedHealth акцияларын екінші тоқсанда басқа да танымал инвесторлар сатып алды. 2008 жылғы ипотекалық дағдарысты болжаған Майкл Бьюрри басқарған Scion Asset Management 6 млн доллар көлемінде акция сатып алып, сонымен қатар 350 мың акцияға 100 млн доллардан астам номиналды құны бар call-опциондар алды. Дэвид Теппердің Appaloosa Management қоры да UnitedHealth инвестициясын 1300%-дан астам арттырып, 764,3 млн долларға жеткізді. Енді бұл қор портфеліндегі көлемі жағынан екінші активке айналды.
Баффеттің инвестициялау тәсілі
Компанияның даулы беделіне қарамастан, мәміле Баффеттің стратегиясына сай келеді. Ол төмен бағаланған, бірақ мықты іргелі көрсеткіштері бар бизнеске — жоғары капитал тиімділігіне, төмен қарыз деңгейіне және тұрақты ақша ағымын қалыптастыру қабілетіне ие компанияларға — инвестиция жасайды. Баффет күрделі бизнес-модельдерді ұнатпайды, түсінікті және ашық басқару құрылымы бар компанияларды таңдайды. Сонымен қатар ол «экономикалық ор» (economic moat) деп аталатын бәсекелестікке қарсы артықшылықты бағалайды.
Berkshire акция портфелінің жалпы көлемі шамамен 300 млрд долларды құрайды. Сарапшылардың пікірінше бұл сатып алуды тікелей Баффеттің өзі емес, оның инвестициялық менеджерлері Тодд Комбс пен Тед Вешлер жасауы мүмкін.
Баффеттің «құпия» активі
Нарық қатысушылары екінші тоқсандық есепте Баффет биылғы жылы жасырған «құпия» инвестициясын жариялайды деп күтті. Бұған дейін Berkshire бірінші тоқсан есебінде кейбір позицияларды құпия сақтауға рұқсат сұраған еді. Бұл тактиканы Баффет бұрын да пайдаланған — бірнеше тоқсан бойы ірі үлес жинап, компанияны жария етпей, бағаның өсуін болдырмау үшін.
Алайда CNBC-дің дерегінше бұл жолғы құпия актив бірнеше позицияның комбинациясы болған. Құрылысшылар DR Horton және Lennar, сондай-ақ болат өндіруші Nucor-дағы үлестерін арттыру. Құжат жарияланған соң кеңейтілген саудада DR Horton акциялары 3,7%-ға, Lennar — 5,7%-ға, Nucor — 6,5%-ға өсті.
Бұған дейін құпия активтің өнеркәсіптік компания болуы мүмкін деген болжам айтылған. Сарапшылардың фавориттерінің қатарында Caterpillar, сондай-ақ UPS, FedEx, Deere бар еді. Бірақ есеп жарияланғаннан кейін Caterpillar акциялары 1,6%-ға, UPS — 0,2%-ға төмендеді, FedEx — 1%-ға, Deere — 0,1%-ға өсті.
Berkshire-дің басқа мәмілелері
— Екінші тоқсанда Berkshire телеком-оператор T-Mobile-дегі үлесін толықтай сатты. Пакет құны 1 млрд доллар болатын.
— Apple-дегі үлес 20 млн акцияға қысқарды, бірақ компания портфельдегі ең ірі актив болып қала береді.
— Bank of America акцияларындағы үлес те азайды: шілде 2024-тен 2025 жылдың бірінші тоқсанының соңына дейін Баффет үлесін 40%-ға жуық қысқартқан, ал екінші тоқсанда тағы 26 млн акция сатылды.
— Компания жарнама агенттігі Lamar Advertising және қауіпсіздік жүйелерін өндіруші Allegion-нан аз мөлшерде үлес сатып алды.
