Жұмбақ компания және өзге мәмілелер: Баффет жаңа есепте нені жариялауы мүмкін?
Таяуда Berkshire Hathaway екінші тоқсанда қандай акцияларды сатып алып, қайсыларынан бас тартқанын жарияламақ. Уоррен Баффеттің компаниясы осы күнге дейін құпия сақтап келген жаңа инвестицияны ашуы, сондай-ақ Bank of America-дағы үлесін одан әрі азайтуы мүмкін, деп жазады Barron’s. Инвестиция шеберінің есебі алдында қай бағалы қағаздарға назар аударған жөн?
Berkshire есебінен инвесторлар нені аңғара алады?
Barron’s-тың мәліметінше компания өзіне тиесілі «жұмбақ» инвестицияны ашуы ықтимал. Бұған құжаттардағы деректер дәлел бола алады. Мамыр айында Berkshire бірінші тоқсан бойынша есеп берген кезде АҚШ-тың Бағалы қағаздар және биржа жөніндегі комиссиясынан (SEC) бір немесе бірнеше позицияны құпия ұстауға рұқсат сұраған. Баффет мұндай тәсілді бұрын да қолданған — бірнеше тоқсан бойы ірі пакет жинап, компанияның атын жарияламай, акция бағасының ерте өсуіне жол бермеген.
Мысалы, дәл осылай Chubb сақтандыру компаниясының акцияларын 2023 жылдың соңынан бастап жинап, тек 2024 жылдың мамырында ғана жариялаған. Сол кезде Chubb-тегі үлесі $7 млрд-қа бағаланған. Бұған дейін де Berkshire Chevron мен Verizon акцияларын сатып алуда осы іспеттес тактика ұстанған.
Barron’s-тың болжамынша бұл жолғы құпия инвестиция өнеркәсіп секторының компаниясы болуы мүмкін, ал пакеттің жалпы құны шамамен $5 млрд-қа жетуі ықтимал. 10-Q есептерінде Berkshire тек ең ірі позицияларын ғана ашып көрсетеді, ал кішігірім инвестицияларды үш санатқа бөледі: «қаржы секторы», «тұтыну секторы» және «коммерциялық, өнеркәсіптік және өзгелер». Бірінші тоқсанда өнеркәсіптік санаттағы портфель құны шамамен $2 млрд-қа өсті, бірақ мамырдағы 13-F есебінде бұл сегментте ірі сатып алулар көрінбеді. Ал екінші тоқсанда құн тағы $2,8 млрд-қа ұлғайды. Бұл қосынды $4,8 млрд көлемінде «жұмбақ акция» алынғанын меңзесе керек.
Екінші тоқсанда Berkshire көбірек сатып, аз сатып алған. Дегенмен, Morningstar-дың дерегінше портфелінде бар кейбір позицияларын толықтыра түсуі ықтимал. Олардың ішінде Chubb, алкоголь өнімдерін өндіруші Constellation Brands, Domino’s Pizza желісі, әуеғарыштық және электрондық бөлшектер өндіруші Heico Corp, сондай-ақ бассейн және SPA жабдықтарын ірі көлемде таратушы Pool Corp бар.
Сонымен қатар, Berkshire, шамасы, Bank of America-дағы үлесін қысқартуды жалғастыра түскен. 2024 жылдың шілдесінен 2025 жылдың бірінші тоқсанының соңына дейін компания пакетті шамамен 40%-ға азайтып, 631 млн акция қалдырған. Бұл $28 млрд шамасында. Barron’s-тың есептеуінше қосымша $4 млрд-қа дейін сатуы мүмкін. Бұдан бөлек, Berkshire DaVita DVA медициналық компаниясындағы, Capital One Financial қаржылық ұйымындағы, Charter Communications кабель және интернет провайдеріндегі, Liberty Media Corp C Formula One чемпионатының коммерциялық құқық иесіндегі, Louisiana Pacific құрылыс материалдары өндірушісіндегі және АҚШ-тағы ірі байланыс операторларының бірі T-Mobile-дағы үлестерін азайтуы мүмкін.
Контекст
Berkshire есебі 14 тамызда жарияланады. Бұл — екінші тоқсан аяқталғаннан кейінгі 45 күндік мерзімнің соңғы күні, яғни ірі инвесторлар өз мәмілелері жөнінде SEC-ке 13F формасы арқылы есеп беруге тиіс уақыт. Barron’s атап өткендей, Баффет компаниясы бұл есепті әдетте ең соңғы күні өткізеді.
Berkshire Hathaway есебінің алдында қандай акциялар қызықты?
Morningstar Баффет портфеліндегі қазіргі кезде бағаланбаған, есебінің алдында сатып алуға тұрарлық екі акцияны атады. Біріншісі — ірі америкалық мұнай-газ компаниясы Occidental Petroleum. Berkshire Hathaway оның 27% акциясына иелік етеді. Morningstar-дың бағалауынша компания әзірге тұрақты бәсекелестік артықшылыққа ие емес, бірақ капитал құнын өтейтін деңгейге жақындап қалды. Morningstar-дың мақсатты бағасы — акцияға $59, бұл 11 тамыздағы жабылу бағасынан 35% жоғары. 2025 жылдың басынан бері компания нарықтық құнын 11,5%-ға жоғалтқан.
Екіншісі — азық-түлік өндіруші Kraft Heinz. Morningstar бұл инвестиция Berkshire үшін даулы екенін мойындап отыр. Екінші тоқсанда Баффет Kraft Heinz-тегі үлесінің құнын $3,8 млрд-қа қысқартты. Бұл — 2015 жылы Heinz бен Kraft Foods біріктірілгеннен кейінгі екінші рет жасалған ірі есептен шығару (біріншісі 2019 жылы болған, сол кезде Баффет Kraft Foods үшін артық төлегенін мойындады). Соған қарамастан Morningstar қазіргі баға жаңа инвесторлар үшін тартымды деп санайды және мақсатты бағасын $51 деп белгілейді — бұл 11 тамыздағы жабылу бағасынан 86% жоғары. Жыл басынан бері компания акциялары 10,5%-ға арзандаған.
