Қытай компанияларға Nvidia чиптерін қолданбауға кеңес берді. Экспортқа әсері қандай?
Қытай билігі жергілікті компанияларға жасанды интеллектке арналған Nvidia H20 процессорларын пайдаланудан бас тартуды ұсынды. Ұсыным, әсіресе, мемлекет пен ұлттық қауіпсіздікке қатысты жобаларда ескерілмек. Бұл қадам Nvidia-ның Қытай нарығындағы табысын қалпына келтіру жоспарына күмән тудырып отыр. Әрі Дональд Трамп әкімшілігінің АҚШ кірісін чип жеткізілімін қайта жандандыру арқылы арттыру үмітін ақтамай қалуы мүмкін. Сонымен қатар, бұл Пекиннің батыстық технологияларға тәуелділікті азайтып, өз жартылай өткізгіш өндірісін дамытуға деген ұмтылысын көрсетеді.
Егжей-тегжейі
Bloomberg дерегінше, соңғы апталарда Қытай билігі бірнеше жергілікті компанияға Nvidia H20 чиптерін қолданбауды ұсынған хабарламалар жіберген. Бұл процессорлар — АҚШ экспорт талаптарына сай, Қытай нарығына арнайы шығарылған, өнімділігі төмендетілген Nvidia-ның жетекші үлгілерінің жеңілдетілген нұсқасы. Шектеулер тек мемлекеттік секторға ғана емес, ұлттық қауіпсіздікпен байланысты жобаларда жұмыс істейтін жеке компанияларға да қатысты.
Хаттарда билік компаниялардан неліктен H20-ды отандық баламалардан артық көретінін, жергілікті шешімдер бар кезде бұл қаншалықты қажет екенін және Nvidia жабдықтарында қауіпсіздік мәселелері анықталған-анықталмағанын сұрады. Мемлекеттік БАҚ та H20-дың сенімділігіне күмән келтіре бастады. Пекин бұл шағымдарды Nvidia-ға тікелей жеткізді, бірақ компания әлсіздіктердің бар екенін бірнеше рет жоққа шығарды.
Bloomberg дерегінше, шектеулер тек Nvidia-ға ғана емес, Advanced Micro Devices (AMD) компаниясының жасанды интеллект үдеткіштеріне де қатысты. Nvidia агенттікке H20 әскери өнім емес және мемлекеттік секторға арналмағанын, ал Қытайда мұндай мақсаттар үшін жеткілікті өз чиптері бар екенін айтты. AMD түсініктеме беруден бас тартты.
Bloomberg хабарынан кейін қытайлық жасанды интеллект чип өндірушісі Cambricon Technologies акциялары бір күнде рұқсат етілген ең жоғарғы 20%-ға қымбаттады. Сондай-ақ Semiconductor Manufacturing International Corp сияқты басқа сала компанияларының да акциялары 5%-ға өсті.
Пекин неден қауіптенеді?
Біріншіден, билік Nvidia чиптерінде геолокацияны қадағалау немесе қашықтан өшіру функциялары болуы мүмкін деп алаңдайды, бірақ компания мұны жоққа шығарады. Екіншіден, Қытай өз жартылай өткізгіш технологиясын дамытып, батыстық чиптерден гөрі жергілікті өнімдерді пайдалануды ынталандыруға тырысуда.
Bloomberg атап өткендей, әзірге H20-ға тікелей тыйым салынбаған, бірақ шектеулер тек сезімтал салаларға қатысты. Бұл бұрын Tesla және iPhone көліктерін белгілі мекемелерде пайдалануға, сондай-ақ Micron микросхемаларын маңызды инфрақұрылымда қолдануға қойылған шектеулерге ұқсайды. Дегенмен, дереккөздерге сүйенсек, Пекин болашақта Nvidia және AMD өнімдеріне қатысты кең ауқымды шектеулер енгізуді қарастыруы мүмкін, бірақ бұл әлі ерте кезеңдегі талқылау.
Экспортқа әсері
Қытайдың бұл шешімі Nvidia-ның Қытайда жоғалтқан миллиардтаған доллар табысын қайтару жоспарын қиындатады. Бұған дейін Трамп әкімшілігі АҚШ-тың мұндай чиптерге қойған тыйымын алып тастаған соң, инвесторлар компанияның нарықтағы орнын нығайтады деп күтті. Nvidia мен AMD-ға Қытайға жасанды интеллектке арналған арнайы чиптерін қайта сатуға рұқсат етілді, бірақ түсімнің 15%-ы АҚШ үкіметіне аударылуы тиіс.
Bloomberg пікірінше, Пекиннің ұстанымы Трамптың экспорттық бақылауды АҚШ бюджетінің кіріс көзіне айналдыру жоспарына кедергі келтіруі мүмкін. Саудаға рұқсатты тыйымнан бірнеше ай өткен соң беру — ұлттық қауіпсіздікке қатысты бұрын бұзылмайтын деп саналатын мәселелерде әкімшіліктің прагматикалық, «транзакциялық» көзқарасын көрсетеді.
Қазір Қытайдағы Nvidia және AMD клиенттері Пекиннің қысымында, бірақ жергілікті чиптерге толық көшуге дайын болмауы мүмкін. Lombard Odier компаниясының сингапурлық бөлімшесінің аға макростратегі Хомин Ли отандық чиптердің сапасы жақсарып келе жатқанымен, кейбір тапсырмаларға олардың жарамдылығы шектеулі екенін айтады. Ол Трамп әкімшілігі рұқсат берген чиптерге сұраныс жоғары болады деп күтеді.
RAND зерттеушісі Леннарт Хайм Пекиннің реттеу арқылы Huawei өнімдерін сіңіретіндей ішкі нарық құруға тырысатынын, бірақ нақты қажеттілік болса H20 сатып алуға да мүмкіндік қалдыратынын айтады. Бұл — жергілікті баламалар әлі толық жеткіліксіз екенін, соған қарамастан Қытайдың шетелдік жеткізушілерге қысым жасап жатқанын көрсетеді.
Контекст
Nvidia H20 — компанияның ең озық үлгілерінен әлсіздеу, бірақ жад өткізу қабілеті жоғары процессор. Ол жасанды интеллекттің модельдер үлгілерді танып, қорытынды жасайтын сәтте тиімді қолданылады. Bloomberg дерегінше, бұл чипке Alibaba Group пен Tencent Holdings қызығушылық танытуда. Әсіресе Huawei-дің жеткілікті деңгейде дамыған компоненттер шығаруында қиындықтар туындап жатқанда бұл тиімді таңдау болар еді.
Трамп әкімшілігі чип экспортына қойылған шектеулерді жеңілдетіп, Қытайдың жасанды интеллект экожүйесін мүмкіндігінше ұзақ уақыт бойы АҚШ-тың төменірек деңгейдегі технологияларына тәуелді еткісі келеді. Бұл Huawei-ді әлеуетті кіріс пен жаңа техникалық білімдерден айырады.
Бұған дейінгі Байден әкімшілігінің есебінше, егер Қытай Nvidia H20-дан айрылса, онда озық жасанды интеллект модельдерімен жұмыс істеу кезінде инференс кезеңінің құны 3–6 есе қымбаттар еді.
