Kroger жылдық сату болжамын төмендетті. Ритейлерге не әсер етіп отыр?
Kroger супермаркеттер желісінің операторы жылдық сату болжамын қысқартты. Себебі сатып алушылар азық-түлік, жаңа көкөніс пен жеміс-жидек таңдағанда таңдауды қатты қадағалай бастады. Олар дүкендердегі жеңілдіктер мен распродажаларға көбірек қарайды, деп жазады Reuters.
Компания акциялары 4 желтоқсандағы саудада шамамен 7%-ға дейін түсті. Жыл басынан бері қағаздар шамамен 1%-ға ғана өсті.
Егжей-тегжейі
— Kroger 2025 жылдың үшінші тоқсанының нәтижелерін жариялады. LSEG деректері бойынша, жанармай сатуды есептемегендегі сатулар үшінші тоқсанда 2,6%-ға өсті. Сарапшылар 2,91% өсім күтті.
— Түзетілген бір акцияға пайда 1,05 доллар болды. Бұл Reuters жазғандай, болжанған 1,03 доллардан сәл жоғары.
— Жаңартылған болжам бойынша, 2025 жылы жанармайды қоспағандағы салыстырмалы сатулар 2,8–3% аралығында өседі. Бұл орташа күтілетін 3,14% деңгейінен төмен. Қыркүйекте компания бұл көрсеткіш 2,7–3,4% диапазонында өседі деп күткен.
Компанияға не қысым жасап отыр?
Kroger қысымды төмен табысы бар сатып алушылардан сезіп отыр. Олар шығындарын азайтып, арзанырақ тауарларға көше бастады. Бұған азық-түлікке арналған әлеуметтік көмектің (food stamps) қысқаруы әсер етті, деп жазады Reuters. Бұл төлемдер федерал үкіметтің жабылуына байланысты 1 қарашада уақытша тоқтатылды. Бұл отбасылық бюджеттерге тағы бір соққы болды.
Jefferies сарапшыларының дерегінше, АҚШ-та food stamps арқылы төленетін барлық сатып алулардың шамамен 10%-ы Kroger дүкендеріне тиесілі. Бұл көрсеткіш бойынша компания Walmart-тан кейінгі екінші орында. Kroger жалпы сатылымының шамамен 6%-ы осындай транзакциялар есебінен қалыптасады, дейді сарапшылар.
Сондай-ақ агенттік нарықтағы бәсеке күшейгенін атап өтеді. Walmart пен Target сияқты ірі ойыншылар клиент тарту үшін бағаларды түсіріп жатыр. Kroger де үнемшіл сатып алушыларды ұстап қалу үшін 3500 тауарға, соның ішінде жаңа өнімдер мен етке бағаны төмендетті.
4 желтоқсандағы құлдырау Kroger-дің уақытша бас директоры Рон Сардженттің сөзінен кейін күшейді. Ол орта табысы бар сатып алушылар қазір төмен табысты отбасылармен бірдей қысымды сезініп отырғанын айтты.
Сарапшылар не дейді?
Өткен аптада, 26 қарашада JPMorgan Kroger акциялары бойынша мақсатты бағаны 75 доллардан 73 долларға дейін түсірді. Рейтингін «бейтарап» деңгейінде қалдырды. Жаңа таргет ритейлер акциялары үшін 10,6% әлеуетті өсім болатынын білдіреді.
Компания акцияларын бақылайтын 25 аналитиктің 14-і қағаздарды портфельде ұстауды ұсынады. Қалған 11-і оларды сатып алуға кеңес береді.
