Масктың xAI компаниясы ЖИ-қуаттарын кеңейтуге $15 млрд инвестиция тартты
Илон Маск негізін қалаған жасанды интеллект әзірлейтін xAI компаниясы инвесторлардан $15 млрд тартты, деп жазды CNBC дереккөздерге сілтеме жасап.
Инвесторлар қыркүйекте белгілі болған $10 млрд қаржыландыру раундына қосымша тағы $5 млрд қосты. Сол кезде стартап $200 млрд болып бағаланды.
Телеарна дереккөздерінің айтуынша, қаражаттың басым бөлігі үлкен тілдік модельдерді іске қосатын басты құрылғы — графикалық процессорларды (GPU) сатып алуға жұмсалады.
xAI қазір ондаған мың ЖИ-чиптермен жабдықталған ірі дата-орталықтар құру процесінде. Олар компанияның суперкомпьютерін іске қосуға қажет болады. Телеарнаның мәліметінше, Мемфисте компания газ турбинасын осы дата-орталықты энергиямен қамту үшін қолдануға тырысқанда, экологиялық және құқық қорғау ұйымдарының қарсылығына тап болды — олар жобаны бұғаттауға тырысуда.
Наурыз айында xAI Маскқа тиесілі X әлеуметтік желісін сатып алды — бұл мәміле платформаны $33 млрд деп бағалады.
Соңғы айларда жасанды интеллект саласындағы стартаптар базалық ЖИ-модельдерге өсіп келе жатқан сұранысты қанағаттандыру үшін орасан капитал тартып, рекордтық бағалауға жетіп жатыр, деді CNBC. Мысалы, қыркүйекте Anthropic $13 млрд инвестиция тартып, өзінің бағалауын наурызбен салыстырғанда шамамен үш есе ұлғайтты. Қазанда Сэм Альтман басқаратын OpenAI бүкіл компанияны $500 млрд деп бағалау негізінде $6,6 млрд көлемінде акция сату мәмілесін жүзеге асырды. Қазанның соңында Reuters дереккөздері ChatGPT жасаушысы IPO-ға дайындалып жатқанын, ал бағалау $1 трлн болуы мүмкін екенін хабарлады. Алайда, қараша айында компанияның қаржы директоры Сара Фрайер WSJ Tech Live конференциясында OpenAI акциясын биржаға шығару жақын перспективада «күні тәртібінде тұрмағанын» айтты.
