«Мен тым артық кеттім»: Маск Трампқа қарсы жазбаларына өкінетінін мәлімдеді
Миллиардер әрі технологиялық компаниялар иесі Илон Маск 11 маусым, сәрсенбі күні әлеуметтік желі X-тегі парақшасында өткен аптада АҚШ президенті Дональд Трампқа қатысты жариялаған кейбір жазбаларына өкініш білдірді. «Мен тым артық кеттім», — деп жазды Маск.
Әңгіме бұған дейін одақтас болған екі тарап арасындағы жария жанжал жайлы. Ол 5 маусымда басталды: Маск электромобиль сатып алуға берілетін салықтық жеңілдіктерді жоюды көздейтін заң жобасын сынаған соң, Трамп «Илонға қатты ренжігенін» айтты. Бұл әлеуметтік желілерде бірнеше сағатқа созылған қарсы айыптаулар мен қауіптерге ұласты: президент Масктың компанияларымен жасалған мемлекеттік келісімшарттардан бас тартуға ниет білдірсе, Маск SpaceX компаниясының Dragon ғарыш кемесін пайдаланудан шығаратынын жария етті — бұл АҚШ-та астронавтарды Халықаралық ғарыш станциясына және кері жеткізетін жалғыз құрал. Алайда кәсіпкер кейін бұл мәлімдемесін кері қайтарып, демалыс күндері кей жазбаларын да өшіріп тастады. Ал дүйсенбіде Трамп SpaceX құрамына кіретін Starlink спутниктік интернет қызметін Ақ үйде сақтап қалуды жоспарлап отырғанын айтты.
Масктың жалғыз ашық саудада тұрған компаниясы — автокөлік өндіруші Tesla — үшін 5 маусым ең ауыр күн болды: акциялары 14%-дан астам құлдырап, нарықтық құны $150 млрд-тан артық жоғалтты. Бұл Tesla тарихындағы ең ірі бір күндік құлдырау болды, деп жазды MarketWatch. Ал Масктың жеке байлығы бір күнде $34 млрд-қа азайды, деп бағалады Bloomberg.
Дегенмен, құлдыраудан кейінгі үш сауда сессиясында акция бағасы қалпына келді. 11 маусым күні премаркетте олар 3%-ға өсті.
MarketWatch жазуынша Morgan Stanley аналитиктері Трамптың шабуылы белгілі бір ауқымды стратегияның бір бөлігі болуы мүмкін деген болжам жасаған. Қазір бұл инвестбанк Масктың жасанды интеллект стартапы xAI үшін $5 млрд көлемінде қарыз тарту процесімен айналысып жатыр, алайда кәсіпкер мен президент арасындағы қақтығыстан кейін инвесторлар пулын қалыптастыруда қиындықтар туындаған.
«Бірнеше жыл бұрын Илон Маск әлеуметтік желі [Twitter, қазіргі X] сатып алғанда, бәрі сенбегенін есіңізге түсіріңіз. Ол саясатқа ашық араласа бастағанда қанша адам наразы болды? Қайталанатын сценарийлерді сараласақ, инвесторлар Масктың қаншалықты алысқа бара алатынын және ол сыни пікірлер мен қаржылық шығындарға қалай төтеп бере алатынын тағы да бағаламауы мүмкін», — деп жазды Morgan Stanley сарапшылары.
Ал болып жатқан оқиғалардың белгілі бір деңгейде жоспарланған болуы мүмкін екенін ARK Invest инвестициялық компаниясының негізін қалаушысы және Tesla-ны бұрыннан қолдаушы Кэти Вуд та жоққа шығармады.
