Mizuho: Walmart ChatGPT серіктестігі арқылы $1 трлн бағалауға жете алады
АҚШ-тың ең ірі бөлшек сауда желісі Walmart OpenAI компаниясымен серіктестік арқылы 1 триллион $ нарықтық құнға қол жеткізе алады, деп мәлімдеді Mizuho банкінің сарапшысы Дэвид Беллинджер. Bloomberg хабарлауынша, бұған ChatGPT жүйесіне Walmart өнімдерін тікелей сатып алу мүмкіндігі енгізілетіні туралы компанияның мәлімдемесі түрткі болды.
Егжей-тегжейі
Беллинджердің айтуынша, OpenAI-мен жасалған серіктестік Walmart акцияларына деген сенімді одан әрі күшейтеді, тіпті АҚШ экономикасындағы белгісіздік жағдайында да. Сарапшы компания акцияларына «Buy» (сатып алу) бағасын берді.
«Экономика баяулап тұрған кезеңнің өзінде Walmart акцияларының өсу әлеуеті бар. Ал компанияның инновациялық бастамалары оны тұтынушылық сектордағы басты ойыншыға айналдырады», — деді ол.
15 қазандағы саудада Walmart акциялары 2,2%-ға өсіп, 109,56 долларға жетіп, рекорд жаңартты. Компанияның нарықтық құны сол күні шамамен $869 миллиард болды. Бұған дейін, OpenAI-мен серіктестік жарияланған соң, акциялар бір күнде 5%-ға қымбаттап, сәуірден бергі ең жоғары күндік өсімді көрсетті.
Mizuho пікірінше, Walmart жасанды интеллектті бизнесіне енгізу жағынан басқа бөлшек сауда компанияларынан озып келеді. Кейбір бәсекелестер ЖИ құралдарын баяу енгізіп жатса, енді бірі тіпті оларды шектеуге тырысып отыр. Беллинджер бұл серіктестікті «агенттік коммерция дәуірін бастайтын маңызды қадам» деп атады.
Қазір әлемде нарықтық құны 1 триллион доллардан асқан тек 11 компания бар. Олардың ішінде тек екеуі ғана технологиялық салаға кірмейді, деп жазады Bloomberg.
Басқа сарапшылар не дейді?
Citigroup сарапшысы Пол Лежье Walmart пен OpenAI арасындағы келісім компанияның «технологиялық көшбасшы мәртебесін сақтап отырғанын» дәлелдейді деп есептейді. Оның айтуынша, OpenAI басқа да бөлшек платформалармен — мысалы, Etsy және Shopify-пен — жұмыс істейді, бірақ Walmart-пен серіктестік «ерекше мәнге ие».
Quo Vadis Capital компаниясының басшысы Джон Золидис Bloomberg-ке берген пікірінде: «Нарық Walmart ұсынған классикалық бөлшек сауда мен заманауи технологияның ерекше үйлесімін бағалады», — деді.
Акциялардың өсуі
Bloomberg дерегінше, соңғы үш жылда Walmart акциялары тұрақты түрде қымбаттап келеді. Бұл компанияның арзан бағалар мен тиімді ұсыныстар арқылы нарықтағы үлесін кеңейтуімен байланысты. 2023 жылы акциялар 11%-ға, 2024 жылы шамамен 72%-ға өскен. Бұл 1998 жылдан бергі ең жақсы нәтиже. 2025 жылдың басынан бері олардың бағасы тағы 20%-дан астам көтерілген.
