Nasdaq 100 сәуірден бергі нашар күндердің бірін өткерді, Dow рекордын сақтай алмады
Технологиялық компаниялардың салмағы үлкен Nasdaq 100 индексі, 19 тамызда 1,4% төмендеді. Бұл сәуірдегі жаппай сатылымнан кейінгі ең нашар күндерінің бірі болды. S&P 500 индексі 0,6% жоғалтты, ал Dow Jones сауда жабылғанға дейін кезекті рет рекордын сақтай алмады. Индекстердің құлдырауына ЖИ-мен байланысты технологиялық компаниялардың, соның ішінде Nvidia мен Palantir қағаздарының арзандауы әсер етті. Инвесторлар ЖИ-ралли перспективаларына алаңдап, пайдасын тіркеуге кірісті. Әсіресе Массачусетс технологиялық институтының зерттеуі дүрбелең туғызды: онда 95% компания генеративті ЖИ инвестицияларынан ешқандай пайда көрмейтіні айтылған.
Егжей-тегжейлі
— Nasdaq 100 индексі 1,39% төмендеп, сауданы 23 384,77 пунктте жапты. Bloomberg-тің жазуынша, бұл сәуірде Дональд Трамп енгізген баж салғынан кейінгі ең ірі құлдыраулардың бірі. Кең Nasdaq Composite 1,46% жоғалтты.
— Негізгі америкалық S&P 500 индексі 0,6% төмендеп, 6411,37 пунктті құрады.
— Көгілдір фишкалар индексі Dow Jones Industrial Average төрт негізгі америкалық бенчмарктың ішінде жалғыз өзі 0,02% өсті. Сауда басында Dow жаңа рекордқа жетіп, 45 207,39 пунктке шықты. Бірақ жабылу кезінде рекорд жаңармады: ол әлі де 2024 жылғы 4 желтоқсандағы 45 014,04 пункт болып қалды.
— Russell 2000 шағын капитализациялы компаниялар индексі 0,78% түсіп, 2276,6 пунктті құрады.
— Бірқатар технологиялық компаниялардың қағаздары күрт арзандады, әсіресе ЖИ-мен байланысты. ЖИ-чиптердің басты жеткізушісі Nvidia 3,5% жоғалтты. Әскери қажеттілікке арналған ЖИ әзірлеуші Palantir қағаздары 9,35% арзандап, S&P 500 ішінде күннің ең нашар нәтижесін көрсетті. AMD 5,4%, Broadcom 3,6% түсті.
— Керісінше, Home Depot-тың жақсы тоқсандық есебі оның қағаздарын 3,14% қымбаттатты (бұл Dow Jones-ты қолдады), сондай-ақ басқа ірі ритейлер қағаздарын көтерді. Intel қағаздары да 7% өсті — Softbank инвестициялары және компанияның ең ірі акционері Ақ үй болуы мүмкін деген жаңалықтар әсер етті.
Қандай оқиға орын алды?
Уолл-стриттегі жазғы тыныштық технологиялық алыптардың қағаздары жаппай сатылымға түскеннен кейін бұзылды. Бұл АҚШ нарығының аз ғана ірі компанияларға қаншалықты тәуелді екенін көрсетті, деп жазады Bloomberg.
«ЖИ-бум, бәлкім, тоқтаған жоқ, бірақ шағын үзіліс жасаған болуы мүмкін. Nasdaq сәуірден бері 40%-дан астам өскеннен кейін, тарихи тұрғыдан алғанда, кідіріс — қалыпты құбылыс. Нарық ФРЖ саясатын және соңғы экономикалық деректерді ескеріп қайта бейімделіп жатыр», — деді Lincoln Financial инвестициялық директоры Джейсон Брончетти (CNBC).
Financial Times-тың пікірінше, сейсенбі күні нарыққа ЖИ төңірегіндегі шамадан тыс оптимизмге қатысты алаңдаушылық ықпал етті. Дүйсенбі, 18 тамызда Массачусетс технологиялық институты жариялаған зерттеу: «95% компания генеративті ЖИ-ге инвестицияларынан нөл қайтарым алады» деген тұжырым жасады. «Бұл әңгіме адамдарды шошытады», — деді FT-ке аты-жөнін атамаған трейдер.
OpenAI басшысы Сэм Альтман да бұған дейін ЖИ төңірегінде «инвестициялық көпіршік» пайда болғанын айтқан. «Қазір инвесторлар ЖИ-ге шамадан тыс қызығып отыр ма? Менің ойымша, иә. Ал ЖИ ұзақ уақыттағы ең маңызды оқиға ма? Менің ойымша, ол да иә», — деді ол.
Nvidia, Palantir және басқа да қағаздардың күрт төмендеуі Interactive Brokers аға стратегі Стив Сосник үшін күтпеген жағдай болмады: «Олардың көпшілігі тым жоғары бағаланып кеткен, сондықтан шығу қозғалысы басталғанда жағдай күрделене түседі», — деді ол (FT).
Сондай-ақ трейдерлер ФРЖ төрағасы Джером Пауэллдің 22 тамыз, жұма күні болатын сөзіне дайындалып жатыр, деп жазады Bloomberg. Нарық қыркүйекте ФРЖ мөлшерлемесін 0,25 пайыздық пунктке төмендетеді деп күтуде, сондай-ақ жыл соңына дейін тағы бір рет төмендетеді деп болжауда. Бірақ Bank of America стратегтері Марк Кабана мен Меган Суибердың ойынша Пауэллдің сөзі нарық күткендей «көгершін тәріздес» болмайды, деп хабарлайды басылым.
