Novo Nordisk акциялары Wegovy препараты бауыр ауруын емдеуге мақұлданғаннан соң өсті
Даниялық Novo Nordisk компаниясының акциялары салмақ азайтуға арналған Wegovy дәрісін АҚШ-та ауыр бауыр ауруын емдеуге қолдануға рұқсат бергеннен кейін қымбаттады.
Компанияға қысым әлі де сақталуда, өйткені Eli Lilly де метаболизммен байланысты стеатогепатитті (MASH деп те аталады) емдеуге арналған дәрілер әзірлеп жатыр. Талдаушылардың пікірінше олардың нарыққа шығуы — уақыт мәселесі.
Егжей-тегжейлі
Bloomberg-тің мәліметінше Novo Nordisk акциялары Копенгаген биржасында 6%-ға жуық өсті. Бұл АҚШ-тың FDA реттеушісі Wegovy препаратын ауыр бауыр ауруына қарсы қолдануға рұқсат еткеннен кейін болды. Ал Нью-Йорктегі премаркет саудасында компанияның депозитарлық қолхаттары 18 тамызда шамамен 3%-ға көтерілді. Сол уақытта оның америкалық бәсекелесі Eli Lilly акциялары 1%-дан артық төмендеді.
FDA 15 тамызда Wegovy инъекцияларын ересектердегі орташа және айқын фиброзы бар MASH ауруын емдеуге рұқсат берді. Бұл ауру бауырда май жиналғанда дамиды, қабыну тудырып, цирроз немесе қатерлі ісік секілді күрделі жағдайларға алып келуі мүмкін.
Novo үшін бұл ненің белгісі
Bloomberg жазғандай, FDA шешімі Novo Nordisk-ке GLP-1 класындағы дәрілер нарығында қосымша серпін береді. Бұл препараттар негізінен салмақ азайту әсерінің арқасында танымал болды.
BMO Capital Markets сарапшысы Эван Дэвид Сайгерманның айтуынша Wegovy-дің MASH ауруын емдеуге мақұлдануы компанияға «жыл басындағы қиындықтардан кейін жағдайды жақсартуға көмектесуі мүмкін». Биыл Novo ең қымбат еуропалық жария компания мәртебесінен айырылды. Бұған оның арықтататын дәрілерінің танымалдығы себеп болған еді. Жыл басынан бері табыс өсімінің баяулауы және бәсекелестіктің күшеюі салдарынан акциялары шамамен 40%-ға арзандады.
Reuters-тің дерегінше Wegovy — АҚШ-та MASH ауруын емдеуге мақұлданған GLP-1 класындағы алғашқы терапия. Бұл дерттен шамамен америкалық ересектердің 5%-ы зардап шегуде. Дегенмен, Novo-ға қысым арта түсуде:. Eli Lilly өзінің қант диабетіне қарсы Mounjaro және арықтататын Zepbound препараттарының құрамындағы тирзепатидпен MASH емдеу бойынша аралық зерттеудің үмітті нәтижелерін жариялады.
Nordnet сарапшысы Пер Хансен ескерткендей: «[Wegovy]-дің MASH нарығындағы эксклюзивті кезеңі қысқа болады, Eli Lilly жақын арада өз өнімін шығарады».
