Wegovy сатылымы 67%-ға өсті. Бұл нәтиже Novo Nordisk инвесторларын сендіре ме?
Даниялық фармацевтикалық алпауыт Novo Nordisk салмақ тастауға арналған флагмандық Wegovy дәрісінің сатылымы екінші тоқсанда 67%-ға артқанын хабарлады. Алайда бұл көрсеткіш нарықты тыныштандырмады: компания акциялары шамамен 2,5%-ға төмендеді. Америкалық Eli Lilly компаниясымен бәсеке күшейіп, АҚШ-тағы позициялары әлсіреп жатқан тұста, Novo-ның жалпы табысы Wegovy іске қосылмай тұрған кездегі деңгеймен тең болып қалды.
Егжей-тегжейі
2025 жылдың екінші тоқсанында Novo Nordisk-тің табысы өткен жылдың сәйкес кезеңімен салыстырғанда тұрақты бағамен есептегенде 13%-ға өсіп, 76,86 млрд дат кронына (шамамен $11,9 млрд) жетті. Бұл сарапшылардың 76,6 млрд крон деңгейіндегі консенсус-болжамынан жоғары болды, деп жазады CNBC. Дегенмен, Bloomberg атап өткендей, бұл өсім соңғы төрт жыл ішіндегі ең төменгі қарқын. Компания мұндай төмен көрсеткішті Wegovy АҚШ-та іске қосылмай тұрған кезеңнен бері алғаш рет көрсетіп отыр.
Wegovy сатылымы тоқсан ішінде 67%-ға өсіп, 19,53 млрд крон табыс әкелді. Бұл сарапшылардың 20 млрд крондық бағалауынан аздау. Бірінші тоқсанда өсім бұдан жоғары — 83% болған еді. Компанияның таза пайдасы 26,5 млрд кронды құрап, нарық күткен 26,6 млрд деңгейіне сәл жетпеді.
Компания өткен аптада жариялаған төмендетілген жылдық болжамын растады. Бұл болжам биыл екінші рет нашар күйге түсті. Қазіргі кезде Novo табыстың 8–14%-ға, ал операциялық кірістің 10–16%-ға өсуін күтеді.
Novo-ны не мазалап отыр?
Novo Nordisk үшін негізгі мәселе — АҚШ нарығы. Бұл нарық компания табысының едәуір бөлігін құрайды. Мұнда Novo бірден бірнеше қысым көзімен бетпе-бет келіп отыр, деп жазады Bloomberg. Бір жағынан, жеткізілімдер қалпына келтірілгенімен, АҚШ-тағы пациенттер Wegovy дәрісінің арзан баламаларын дәріханалардан сатып алып отыр. Бұл баламалар бұрын препараттың жетіспеушілігіне байланысты рұқсат етілген, бірақ қазір тапшылық жоқ болса да, дәріханалар оларды сатуды жалғастыруда, дейді Novo.
Екінші жағынан, Eli Lilly компаниясы тарапынан бәсеке артып отыр. Бұл компания өз препараты — Zepbound арқылы нарық үлесін тез көбейтуде. Zepbound кейінірек шықса да, көптеген дәрігер оны Wegovy-ден тиімді деп санайды. Bloomberg деректеріне сүйенсек, 2026 жылдың соңына дейін Eli Lilly-дің Zepbound және Mounjaro препараттары сату көлемі бойынша Novo Nordisk өнімдерінен асып түсуі мүмкін. Бұл дат компаниясын семіздік терапиясы сегментіндегі жетекшілік орнынан ығыстырып тастайды.
Novo акцияларымен не болып жатыр?
Wegovy сатылымының өсуі әзірге инвесторларды сендіре алмады. 6 тамызда Копенгагендегі саудада Novo Nordisk акциялары 2,4%-ға арзандады. Жыл басынан бері компанияның нарықтық құны 52%-ға төмендеді. Салыстыру үшін: Eli Lilly акциялары сол кезеңде бар болғаны 0,8%-ға арзандаған.
29 шілдеде жылдық болжам екінші рет төмендетілгеннен кейін және компания басшысы қызметіне сырттан емес, ішкі кандидаттың тағайындалғаны белгілі болған соң, Novo бір ғана сауда сессиясында нарықтық құнының шамамен 23%-ын жоғалтты. Бұл соңғы 40 жылдағы ең ауыр күн болды. Осы оқиғалардан кейін UBS сарапшысы Мэттью Уэстон компания акцияларын сатып алуға берген ұсынымынан бас тартты, бағасын Neutral деңгейіне дейін түсіріп, мақсатты бағасын 600 кроннан 340 кронға дейін төмендетті. Бұл жаңа мақсат — FactSet мәліметінше, Novo акцияларын бақылайтын сарапшылар арасындағы екінші ең төмен баға.
MarketWatch хабарлауынша, 32 сарапшының 16-сы әлі де дат компаниясының акцияларын сатып алуға кеңес береді (Buy және Overweight рейтингтері). Тағы 13 сарапшы акцияларды портфельде ұстауға (Hold) шақырады, ал үшеуі сатуды (Sell) ұсынады. Уолл-стриттің консенсус-бағалауы бойынша Novo компаниясының АҚШ-тағы депозитарлық қолхаттарының мақсатты бағасы — $77,8. Бұл ағымдағы деңгейден 60%-дан астам өсім әлеуетін білдіреді.
Алдағы жоспарлар
6 тамызда жарияланған есеп — компанияда басшылық ауысуына себеп болған тоқсанның алғашқы егжей-тегжейлі талдауы. Bloomberg-тің жазуынша, компанияның көп жылдық қызметкері Майк Дустдар 7 тамыздан бастап бас директор қызметіне кіріседі. CNBC мәліметінше, ол жаңа қызметіне «жоғары нәтижелерге бағытталған, шұғыл әрекет ету сезімімен және компанияның амбициясын жаңа деңгейге көтеруге деген ұмтылыспен» кірісетінін мәлімдеген. Ол компанияның жағымсыз үрдісті өзгерте алатынына күмәнданған инвесторлардың сенімін қайта қалпына келтіруі тиіс, деп жазады Reuters.
