Nvidia басшысы: Қытай жасанды интеллект жарысында жеңіске жете алады
Қытай жасанды интеллект бойынша АҚШ-ты басып озуы мүмкін, деді Nvidia компаниясының бас директоры Дженсен Хуанг Financial Times басылымына берген сұхбатында. Дегенмен кейінірек ол өз пікірін сәл жұмсартып, бұл салада Американың көшбасшылығының маңыздылығын атап өтті. Оның бұл мәлімдемелері Пекин мен Вашингтон арасындағы технологиялық текетірес аясында, оның ортасында – Nvidia чиптерінің экспорты тұрған кезде жасалды. Ақ үймен белгілі бір келісімдер арқылы тепе-теңдікке келуге тырысқанымен, Қытай шын мәнінде компанияның нарыққа қолжеткізуін шектеді. Хуангтың айтуынша, мұнда Nvidia-ның үлесі бұрынғы 95%-дан нөлге дейін төмендеген.
Егжей-тегжейлі
«Қытай жасанды интеллект жарысында жеңіске жетеді», — деп Дженсен Хуангтың сөзін Financial Times келтіреді. Оның айтуынша бұған Қытайдағы энергия құнының төмендігі мен реттеудің салыстырмалы түрде жұмсақ болуы ықпал етеді.
Алайда FT материалы шыққаннан кейін бірнеше сағат өткен соң, Nvidia Хуангтың ұстанымын жұмсарту мақсатында оның атынан қосымша мәлімдеме жариялады. Бұл туралы CNBC жазды. «Мен бұрыннан Қытай жасанды интеллект саласында АҚШ-тан небәрі наносекундтарға ғана қалып келетінін айтып келем. АҚШ үшін жеңіс – жылдам дамып, әлемнің ең үздік әзірлеушілерін тарту арқылы қамтамасыз етілетін өмірлік маңызды мәселе», — делінген Хуангтың мәлімдемесінде.
CNBC атап өткендей, Хуанг бірнеше рет: егер әлемдік әзірлеушілер Nvidia-ның озық чиптеріне сүйенуді жалғастырса, АҚШ ЖИ жарысындағы көшбасшылығын сақтап қала алады деп мәлімдеген. Дәл осы уәжбен ол Вашингтонның Қытайға Nvidia өнімдерін экспорттауға қойған шектеулеріне қарсы болған.
Бұл неліктен бұл маңызды
Reuters-тің жазуынша Қытайдың озық ЖИ-чиптеріне, әсіресе капитализациясы ең жоғары технологиялық компания Nvidia өндірген процессорларға қолжеткізуі — Пекин мен Вашингтон арасындағы технологиялық бәсекенің басты шиеленіс нүктелерінің бірі.
«Әлем америкалық технологиялық негізде құрылса дейміз — бұл сөзсіз. Бірақ Қытай нарығында да болуымыз қажет, өйткені олардың әзірлеушілері үшін талас бізге маңызды. Егер АҚШ саясаты әлемдік ЖИ мамандарының жартысын жоғалтуға алып келсе, бұл ұзақмерзімде өзімізге зиян», — деген еді Хуанг қазан айында (Reuters дерегі).
Шілде айында Nvidia мен оның бәсекелесі AMD Қытайда сатылған кейбір ЖИ-чиптерден түскен табыстың 15%-ын АҚШ үкіметіне аудару туралы келісімге келген, бұл экспорттық лицензия алу үшін қажет болған еді, деп жазған FT дереккөздері. Алайда көп ұзамай Пекин, өз кезегінде, Nvidia-ның Қытай нарығына қол жеткізуін шектеді, деп хабарлады Reuters.
Қазанда Хуанг мәлімдегендей, компанияның Қытайдағы нарық үлесі 95%-дан нөлге дейін құлаған. «Біздің барлық болжамдарымызда Қытай бойынша үлес — нөл деп көрсетілген. Егер онда бір өзгеріс болса, оған қуаныштымыз, ол біз үшін бонус болады», — деген еді ол (Quartz басылымының дерегі).
