Nvidia-ның БАӘ-мен чип келісімі кешігіп жатыр — WSJ
Nvidia-ның жасанды интеллект чиптерін БАӘ-ге жеткізу туралы келісімі орындалмай тұр. The Wall Street Journal дереккөздері бойынша, құжатқа қол қойылғанына бес ай өтсе де, алға жылжу жоқ. Бұл жағдай компания басшысы Дженсен Хуанг пен АҚШ әкімшілігін алаңдатып отыр.
БАӘ мамырда америкалық экономикаға қаржы құюға келіскен, бірақ ақша әлі түспеген. Bloomberg дерегінше, жылына 500 мыңға дейін озық чип жеткізу көзделген, ал Reuters келісімді 2030 жылға дейін ұзарту жайында әңгіме болғанын жазды. Өнімнің 20%-ы G42 компаниясына, қалғаны аймақта деректер орталығын салатын америкалық ойыншыларға арналмақ еді.
WSJ мәліметінше, бұл келісім АҚШ-тың жоғары технологиялар экспорты бойынша жаңа стратегиясының үлгісі ретінде қарастырылған. Ақ үй мұндай қадамдарды Қытаймен жасанды интеллект бәсекесінде көшті сақтап қалудың кілті санайды.
Келісімнің болашағы АҚШ сауда министрі Говард Латникке байланысты. Ол экспортқа рұқсат беруі тиіс, бірақ алдымен БАӘ инвестициялық уәдесін орындауы керек деген ұстанымда. Дегенмен дереккөздердің айтуынша, министр процесті бөгеген жоқ. Nvidia өкілі де Хуангтың шағымы болмағанын айтты.
Мамырда БАӘ-мен қатар тағы бір ірі келісім жасалды. Nvidia Сауд Арабиясы қорымен қаржыландырылатын Humain компаниясына 18 мың Blackwell GB300 чипін жеткізеді. Соның негізінде қуаты 500 МВт деректер орталығы салынып, ЖИ модельдері мен инфрақұрылым әзірленбек. Компания болашақта жүз мыңдаған графикалық процессор сатып алуды жоспарлап отыр.
Осы келісімдер жайлы хабар шыққан күні Nvidia акциялары 6%-дан астам өсті, нәтижесінде компания құны $3 трлн-нан асты. Қазір оның нарықтық бағасы $4,5 трлн-нан жоғары. 3 қазандағы саудада акция тағы 0,4% қосты.
