OpenAI 500 млрд долларға бағаланды. Акция сату жөнінде келіссөз басталды
OpenAI инвесторлармен қызметкерлердің акцияларын сату жөнінде келіссөз жүргізіп жатыр. Бұл келісім аясында ChatGPT жасаушы компания Илона Масктың SpaceX компаниясынан да қымбатқа бағалануы мүмкін. OpenAI осылайша жария емес технологиялық компаниялар арасында ең қымбат компания атануы ықтимал.
Бұл мәміле OpenAI үшін маңызды. Ол компанияға жетекші мамандарын Meta компаниясының жоғары жалақыларына қарамастан, өз қатарында ұстауға көмектесуі тиіс.
Егжей-тегжейі
OpenAI әлі 300 миллиард долларлық бағалау алған инвестициялық раундты ресми түрде аяқтаған жоқ. Алайда Bloomberg және Financial Times дереккөздеріне сәйкес, компания келесі раундқа дайындалып жатыр. Жаңа кезеңнің нәтижесінде бағалау 500 миллиард долларға дейін өсуі мүмкін. Егер мәміле жүзеге асса, OpenAI бағасы 2025 жылдың шілдесінде 400 миллиард долларға жеткен SpaceX-тен де асып түседі.
Bloomberg мәліметінше, Thrive Capital қоры және басқа да акционерлер OpenAI-ға қазіргі және бұрынғы қызметкерлердің акцияларының бір бөлігін сатып алу туралы ұсыныс жасаған. Қорытынды бағалау мен сатылатын акция көлемі әзірге анықталған жоқ. Олар инвесторлардың қызығушылығына байланысты болады.
Дегенмен Financial Times дереккөзі мәміле көлемі 1,5 миллиард доллардан әлдеқайда көп болуы мүмкін екенін айтады. 2024 жылдың соңында OpenAI қызметкерлері дәл осы сомаға акцияларын сатқан еді.
Контекст
Ірі америкалық стартаптар қызметкерлерге сыйақы ретінде акция сатуға жиі мүмкіндік береді. Бұл — мамандарды ынталандырып, оларды компанияда ұстап қалу үшін жасалатын тәсіл.
Bloomberg дереккөзі OpenAI инвесторлардың жоғары қызығушылығын пайдаланып, қызметкерлерге компания өсімін көрсететін өтімділік бергісі келетінін жеткізді. OpenAI жуырда бірнеше жетекші зерттеушілерінен айырылды. Олар Meta Platforms компаниясына ауысты. Meta қазір Apple және басқа да бәсекелестерден үздік мамандарды өздерінің жасанды «суперинтеллект» жобасына шақырып жатыр. Компания бұл үшін тоғыз таңбалы жалақы ұсынуда.
OpenAI-ға қалай инвестиция салуға болады?
OpenAI акциялары биржада сатылмайды. Алайда жақында Robinhood трейдинг платформасы Еуропадағы инвесторларға криптовалюталық туынды құралдар — токендер арқылы сауда жасау мүмкіндігін ұсынды.
Бұл токендер америкалық биржалық қорлардың (ETF) және кейбір жеке компаниялардың, соның ішінде OpenAI мен SpaceX-тің акцияларына негізделген. OpenAI бұл токендердің компаниядағы үлесті білдірмейтінін түсіндірді. Galaxy Research мәліметінше, олар тек негізгі активке жанама қол жеткізуге мүмкіндік беретін туынды құралдар болып саналады.
OpenAI қанша табыс табады?
2022 жылдың соңында ChatGPT іске қосылғаннан бері OpenAI-дың жылдық қайталанатын табысы (Annual Recurring Revenue — ARR) 12 миллиард долларға жетті.
ARR — жазылымнан түсетін тұрақты табыс көлемін көрсететін және стартаптарда жиі қолданылатын көрсеткіш. Financial Times дереккөзіне сүйенсек, 2025 жылдың соңына қарай ARR көрсеткіші 20 миллиард доллардан да асады деп болжанып отыр. OpenAI-дың басты бәсекелесі Anthropic 2025 жылы ARR-ды төрт есе арттырып, 4 миллиард долларға жеткізген.
Компания қазіргі уақытта кемінде 5 миллиард доллар инвестиция тарту жөнінде келіссөз жүргізіп жатыр. Бағалау көлемі — 170 миллиард доллар. Алайда екі компания да әлі табысқа шықпаған. Себебі ең озық жасанды интеллект модельдерін оқыту және қолдану шығындары өте жоғары болып отыр.
