Pop Mart акциялары құлдырауда: Лабубуға қызығушылық азайып жатыр ма?
Әлеуметтік желілерде кең танымал болған Лабубу ойыншықтарын өндіруші Pop Mart компаниясының акциялары дүйсенбі күнгі сауда барысында 9%-ға дейін құлдырап, соңғы бес айдағы ең ірі төмендеуін көрсетті. Бұл оқиға олардың Гонконгтың Hang Seng индексіне енген бірінші күні орын алды. Инвесторлар Лабубуға деген сұраныс келешегіне алаңдап, бір бөлігі өз табысын тіркеуді жөн көрді.
Егжей-тегжейлі
8 қыркүйек, дүйсенбі күні Pop Mart компаниясының коллекциялық ойыншықтарын өндіретін акциялары сауда барысында 7%-дан астамға төмендеді. Күндізгі саудада құнды қағаздар шамамен 9%-ға дейін құлдырап, бұл сәуір айынан бергі ең үлкен төмендеу болды деп хабарлайды Bloomberg. Акция бағасы 282,2 гонконг долларына ($36,2) дейін түсіп, 20 тамыздан бергі ең төменгі көрсеткішке жетті.
Нарық қатысушылары бұл құлдырауды Pop Mart акцияларының Hang Seng және Hang Seng China Enterprises индекстеріне қосылғаннан кейінгі табысты тіркеумен байланыстырып отыр. Bloomberg түсіндіргендей, индекстерге енуінен пайда көргісі келген кей инвесторлар пайдасын бекітіп алды. Агенттіктің айтуынша сондай-ақ «аюлық» көңіл-күйдің артқанын көрсететін қысқа сату көлемі де 5 қыркүйекте рекордтық деңгейге жеткен.
Компанияның басты өнімі – Лабубу қуыршақтарына деген сұранысқа қатысты алаңдаушылық та қысым түсіруде. Аналитиктердің мәліметінше қайталама нарықтағы баға төмендеп жатыр, себебі ұсыныс шамадан тыс көбейіп, коллекционерлердің қызығушылығы бәсеңдей бастаған.
«Біз сонымен қатар жаңа өнімдердің сапасына байланысты теріс пікірлердің көбейіп жатқанын байқадық. Бұл мәселеге компания басшылығы дереу назар аударуы тиіс», – деп атап өтті Morningstar-дан аналитик Джефф Чжан.
Аналитиктердің пікірі
Лабубу қуыршақтарына деген екінші нарықтағы қызығушылықтың төмендеуіне қарамастан, тамыз айында аналитиктер Pop Mart-қа қатысты оң көзқарасты сақтаған болатын.
Мәселен, HSBC аналитигі Лина Янь Pop Mart өз брендтеріне деген қызығушылықты жаңа серияларды жүйелі түрде шығару арқылы ұстап тұра алатынын айтқан. Лабубудан бөлек, компанияда болашақ коллекциялар үшін негіз бола алатын тағы он шақты кейіпкер бар. Тамыз айында банк Pop Mart акцияларын «сатып алу» деп ұсынғанын Barron’s басылымы жазды.
Citi компаниясынан Лидия Лин де акцияларды сатып алуды ұсынуды жалғастырған. Barron’s хабарлауынша, ол Pop Mart табысының артуы мен шетел нарығына кеңеюі акция бағасына қолдау береді деп есептейді.
Контекст
Соңғы бір жыл ішінде Pop Mart акциялары «дизайнерлік ойыншықтар» мен «сюрприз-қорапшаларға» деген ажиотаждың арқасында шамамен 600%-ға өсті. Бұл тренд әсіресе Z ұрпағының арасында кеңінен тарады. Алайда Business Today мәліметінше қазіргі таңда Лабубудың кейбір серияларының қайталама нарықтағы бағасы бұрынғы деңгеймен салыстырғанда екі есе төмендеген.
