QuantumScape акциялары 80%-ға өсті, бірақ Baird сақ болуға кеңес береді
Электромобильдерге арналған аккумулятор өндірушісі – mid-cap санатындағы QuantumScape акцияларын сатып алу инвесторлар үшін қауіпті болуы мүмкін, деп есептейді Baird Equity Research зерттеу компаниясы. Соңғы екі күнде компания акциялары жаңа технология туралы жағымды жаңалықтар аясында 78%-ға қымбаттады. Алайда Baird сарапшылары бұл технологияны нақты іске қосылған кезде көргісі келеді және әзірге бұл қағаздарда құлдырау тәуекелін байқап отыр.
Егжей-тегжейлі
MarketWatch хабарлауынша Baird сарапшылары 24 маусым, сәрсенбі күнгі сауда аяқталғаннан кейін жарияланған жағымды жаңалықтарға қарамастан, QuantumScape акцияларын сатып алуды ұсынбайды. Компания өзінің литий-ионды аккумуляторларына арналған Cobra технологиясының негізгі өндіріс сатысына көшкенін жариялады. Бұл кезеңде дайын өнім жасала бастайды. Barron’s басылымы жазғандай, QuantumScape арзан әрі қауіпсіз, бір зарядпен ұзақ жүретін қаттыэлектролитті аккумулятор жасауды көздеп отыр — бұл электромобильдердің бағасын төмендетуі мүмкін.
Инвесторлар бұл жаңалықты ерекше ынтамен қарсы алды: 25 және 26 маусым күндері QuantumScape акциялары 78%-ға өсіп, $7,65-ке жетті — бұл соңғы бір жылдан астам уақыттағы ең жоғары деңгей. 27 маусымдағы таңғы саудада компания акциялары 3,4%-ға төмендеді.
Baird неге сақтық танытуда
MarketWatch мәліметінше Baird сарапшысы Бен Калло инвестициялық жазбасында: «QuantumScape үшін маңызды белестер әлі алда», — деп атап өтті. Оның айтуынша компания әлі табыс таппайды және өндіріс көлемін арттыру жоспары нақты кепілдікке ие емес.
Сондай-ақ Калло бұл саланың бәсекелі екенін ескертті. Сол себепті ол QuantumScape пен Volkswagen тобына қарасты аккумулятор өндіруші PowerCo арасындағы эксклюзивті емес келісімшартқа күмәнмен қарайды. Бұл келісімшарт бойынша бірқатар шарттар орындалғаннан кейін QuantumScape PowerCo-ға аккумулятор элементтерін жаппай өндіру лицензиясын беруі керек.
Каллоның айтуынша Baird алдымен QuantumScape өз революциялық технологиясынан қалай табыс табатынын көрсеткенін қалайды. Осыдан кейін ғана сарапшылар компания акциялары туралы оң пікір білдіре алады. Оның айтуынша компания акциялары бойынша мақсатты баға — $6, бұл қазіргі нарықтық бағадан шамамен 22% төмен.
Басқа сарапшылар не дейді
Уолл-стриттегі сарапшылардың көпшілігі Baird ұстанымын қолдайды. MarketWatch дерегінше QuantumScape акциялары бойынша ең кең тараған баға беру — «ұстау». Бұл — төрт сарапшының ұсынған бағасы. Тағы екеуі бұл акцияларды сатуға кеңес береді, ал тек бір ғана сарапшы сатып алуды ұсынады. Қазіргі нарықтық бағадан төмен орналасқан орташа мақсатты баға — $4,83.
