Рекордтық кэш: Баффет үшінші тоқсанда не істеді?
Уоррен Баффет басқаратын Berkshire Hathaway үшінші тоқсанда өзінің портфеліндегі акцияларды сатуды жалғастырды. Бұл жөнінде компания 1 қарашада жариялаған есепте хабарлады. Міне, инвесторларға айтылған негізгі мәліметтер:
— Berkshire Hathaway есепшоттындағы қолма-қол қаражат көлемі маусым соңындағы $344 млрд-тан $381,7 млрд-қа дейін жетті — бұл жаңа рекорд. Ақшаның едәуір бөлігі қысқа мерзімді мемлекеттік облигацияларда (T-Bills) сақталады.
— Berkshire «жастық ақшасын» ұлғаюын жалғастыруда, себебі компания әлі де акцияның таза сатушысы. Өткен тоқсанда компания шамамен $12,4 млрд-тың акциясын сатып, $6,4 млрд-тың акциясын сатып алған. Berkshire қай компаниялардың акциясын сатқанын және сатып алғанын қараша айының ортасында 13-F формасы бойынша жариялайды.
— Қолма-қол қордың өскеніне қарамастан, Berkshire-дің таза инвестициялық кірісі қысқа мерзімді пайыздық мөлшерлемелердің төмендеуі аясында 13% түсіп, $3,2 млрд-қа түсті.
— Berkshire Hathaway қатарынан бесінші тоқсан бойы өз акциясын нарықтан кері сатып алған жоқ, тіпті Баффеттің бас директор қызметінен кететіні туралы жаңалықтан кейін акцияның төмендегеніне қарамастан.
— Компанияның операциялық пайдасы жылдық мәнде 34% өсіп, $13,5 млрд-қа жетті. Bloomberg атап өткендей, мұндай өсім табиғи апаттармен байланысты сақтандыру жағдайларының ерекше төмен деңгейінде сақтандыру қызметінен түскен пайданың артуы есебінен қамтамасыз етілді.
Berkshire Hathaway қазір басшылық ауысуына дайындалып жатыр. Мамыр айында 95 жастағы Уоррен Баффет 60 жыл жұмыс істегеннен кейін жыл соңында бас директор қызметінен кететінін хабарлады. Оның орнына Berkshire вице-төрағасы Грег Абель тағайындалады. Баффет директорлар кеңесінің төрағасы болып қала береді.
Мамыр айында осы өзгерістер туралы хабарланғаннан бері Berkshire Hathaway акциясы шамамен 12% арзандады. Инвесторлар компания Баффет премиясынан айырылуы мүмкін деп қауіптенеді — яғни, аңызға айналған инвестордың беделі мен капиталды басқарудағы шеберлігі есебінен акцияға қосымша берілген құн. Қазанда Уолл-стритте Berkshire Hathaway бойынша алғашқы «аю» пайда болды — инвестбанк KBW инвесторларға компания акциясын сатуды ұсынды. Банк ескерткендей, Баффет бас директорлықтан кеткен соң, конгломераттың пайда өсімі баяулап, инвесторлардың сенімі әлсіреуі мүмкін.
