Сингапур доллары — жаңа қорғаныс валютасы бола ала ма?
Сингапур доллары Азиядағы инвесторлар үшін «ерекше тұрақтылығына» байланысты қорғаныс валютасы ретінде қабылдана бастады, деп жазады CNBC. 2025 жылы ол АҚШ долларына қатысты айтарлықтай нығайды. Алайда Сингапур валютасы жаһандық қорғаныс активі дәрежесіне әлі жете қойған жоқ. Оған нарық көлемінің шағындығы, басқарылатын бағам және өтімділіктің төмендігі кедергі болып отыр.
Егжей-тегжейлі
Сингапур доллары Азия мен дамушы нарықтардағы инвесторлар үшін қорғаныс активі тәрізді әрекет етіп жатыр, деді CNBC телеарнасына OCBC банкінің валюта стратегi Кристофер Вонг. Оның айтуынша Сингапур валютасы доллар, иена немесе швейцар франкі сияқты жаһандық мәртебеге ие болмаса да, қаржылық тұрақсыздық кезінде, әсіресе Азия нарықтарында, қорғаныс қасиеттерін көрсетеді.
2025 жылдың басынан бері Сингапур доллары АҚШ долларына қатысты 6%-ға нығайды. Jefferies сарапшылары келесі бес жылда бұл валютаның АҚШ долларымен паритетке жетуі мүмкін екенін айтады.
Сингапур доллары сенімді актив ретінде қабылдануда, себебі елдің экономикасы тұрақты, ал биліктің қаржылық саясаты теңгерімді — әсіресе бюджеттік тәртіп тұрғысынан, деп түсіндірді PineBridge Investments компаниясының Азиядағы тұрақты табыс бағытының тең жетекшісі Омар Слим.
VP Bank инвестициялық директоры Феликс Брилл де бұл пікірмен келіседі. Ол Сингапурдың валюталық саясаты валюта бағамының «ерекше тұрақтылығын» қамтамасыз еткенін атап өтті — дәл осыны инвесторлар қорғаныс активтерінен күтеді.
Сингапур өз валютасының бағамын пайыздық мөлшерлемелер арқылы басқармайды. Оның орнына ол валюта бағамын негізгі сауда серіктестерінің валюталарынан құралған себетке байланған тар дәлізде ұстайды. Мұндай басқару жүйесі Сингапур долларының құбылмалылығын шектейді, бұл қысқа мерзімді кезеңде тәуекелді азайтып, болжамдылықты арттырады, деп түсіндіреді Sumitomo Mitsui Banking компаниясының Азия бойынша макростратегия бөлімінің жетекшісі Джефф Нг.
Кедергілер
Дегенмен Сингапур долларының тұрақтылығына қарамастан, оның алдында шектеулер бар. Ең алдымен — валюта нарығының көлемі. Bank for International Settlements мәліметінше, оның үлесі жаһандық валюта саудасында небәрі 2%-ды құрайды, ал АҚШ доллары — 88%, иена — 17%, швейцар франкі — 5%.
Сонымен қатар, басқарылатын бағам алыпсатарлық белсенділік пен ірі позициялардың қалыптасуын тежейді. Бұл өтімділікті төмендетеді — ал ол кез келген жаһандық қорғаныс валютасы үшін негізгі параметр. «Мұндай модель сенімді арттырады, бірақ ауқымды шектейді», — дейді VP Bank-тен Брилл.
Одан бөлек, Сингапур — экспортқа тәуелді экономика, және билік ұлттық валютаның күрт нығаюына мүдделі емес, дейді Natixis экономисі Чинь Нгуен. «Егер инвесторлар Сингапур долларындағы активтерді жаппай сатып ала бастаса, оның бағамы өсіп кетеді», — деп түсіндіреді Нгуен және монетарлық билік мұны болдырмауға тырысады дейді.
Бұған қоса, алдағы айларда Сингапур долларына қысым көрсететін фактор — АҚШ-тың сауда саясатының қатаюы болуы мүмкін, деп ескертеді Bloomberg. Президент Дональд Трамп фармацевтика мен жартылай өткізгіштерге — Сингапурдың басты экспорттық тауарларына — жаңа тарифтер енгізу қаупін төндіріп отыр. Осыған байланысты инвесторлар Сингапур билігі шілде айында ұлттық валютаны әлсіретіп, экономиканы қолдайды деп күтуде. 21 шілдеде Сингапур долларының бағамы $1,285 деңгейіне жақындады. Bank of Singapore болжауынша, ол уақытша $1,3 деңгейіне дейін әлсіреуі мүмкін.
Қандай әлеуеті бар
Шектеулерге қарамастан, сарапшылар Сингапур долларының келешегі бар деп отыр. Ол инвестициялық портфельдерді әртараптандыруда маңызды рөл атқара алады және инвесторлар үшін «үшінші валютаға» айнала алады, дейді Bank of Singapore-тен Жан Чиа. Қорғаныс валютасы мәртебесі онжылдықтар бойы қалыптасады: Сингапур доллары жаһандық дағдарыстарда басты таңдау болмаса да, алдағы уақытта оның рөлі артуы мүмкін, дейді VP Bank-тен Брилл.
PineBridge-тен Слим Сингапур долларының болашағына оптимизммен қарайды, әсіресе дәстүрлі қорғаныс валюталарының тартымдылығы төмендеп жатқан шақта. Оның пікірінше Сингапур валютасы доллар немесе иенаның орнын баспауы мүмкін, бірақ «Азияның швейцар франкі» ретінде жиірек қарастырыла бастайды.
