Швейцария Ұлттық банкі техсектордағы ірі инвесторға айналды

Консервативті капитал басқару әдістерін ұстанатын Швейцария Ұлттық банкі біртіндеп әлемдегі технологиялық сектордың ең ірі инвесторларының біріне айналды. Швейцарияның орталық банкі Кремний алқабындағы ірі ойыншылардың бірі атанды, ал оның акциялар портфелінің құны елдің жылдық ЖІӨ-нің 20%-ына жақындап қалды.

Егжей-тегжейлі

2025 жылдың маусымындағы жағдай бойынша Швейцария Ұлттық банкінің америкалық акциялар портфелі $167 млрд деп бағаланған және 2300-ден астам позицияны қамтыған, деп жазады Financial Times АҚШ-тың Бағалы қағаздар және биржалар жөніндегі комиссиясының (SEC) материалдарына сілтеме жасап. Оның ішінде $42 млрд-тан астам қаражат небары бес ірі технологиялық компанияға — Amazon, Apple, Meta, Microsoft және Nvidia компанияларына салынған. Ұлттық банктің Apple-дегі үлесі $10 млрд шамасында, ал Nvidia-дегі үлесі $11 млрд-тан асады.

Швейцария Ұлттық банкі — консервативті институт болғанымен, оның жұмыс тәсілдері әдеттегідей емес. Мақалада жазылғандай, ешбір басқа орталық банк осындай ірі акциялық позицияларға ие емес. Банктің мәліметінше қазіргі кезде оның балансының 87%-ы шетел валютасындағы активтерден тұрады: шамамен екі үштен бірі — мемлекеттік облигациялар, 10%-ы — корпоративтік бондар, ал 25%-ы — акциялар.

Көптеген орталық банктерден айырмашылығы, Швейцария Ұлттық банкі ел үкіметіне тиесілі емес. Оның акцияларының жартысы швейцариялық кантондарға және кантондық банктерге, ал қалған жартысы жеке тұлғаларға тиесілі. Сонымен қатар, банк Швейцария қор биржасында саудаланады.

Банк қандай акцияларды сатып алып, қайсысын сатты

Швейцария Ұлттық банкі АҚШ-тағы акционерлер жиналыстарына қатыспау ұстанымын қатаң сақтайды және ол иелік ететін компаниялардың басқаруына әсер етуге тырыспайды. Алайда бұл пассивті ұстаным мүлдем әрекетсіз дегенді білдірмейді, деп атап көрсетеді FT:

2023 жылы банктің портфелінде Berkshire Hathaway акциялары мүлде болмаған, ал 2025 жылға қарай оның бұл компаниядағы үлесі $2 млрд-тан асты.

Nvidia-дегі банктің үлесі осы аралықта тек акция бағасының өсуіне байланысты ғана емес, акцияларды белсенді сатып алу нәтижесінде алты есе көбейіп, құны үш есеге артты.

Соңғы екі жылда банк Meta мен Netflix-тегі үлестерін азайтқанымен, қалған акциялар айтарлықтай қымбаттады. Сол сияқты, банк Palantir Technologies акцияларының бір бөлігін сатқанымен, олардың құнының қарқынды өсуі нәтижесінде банк иелігіндегі үлестің жалпы құны сегіз есеге өсті, деп жазады FT.

Швейцария Ұлттық банкі қандай акцияларға инвестиция салмайды

Швейцария Ұлттық банкі кейбір секторлардан мүлдем аулақ жүреді. Атап айтқанда, ол жүйелік тұрғыдан маңызды банктерге инвестиция салмайды — бұл мүдделер қақтығысын болдырмау үшін қажет, деп түсіндірді Vontobel инвестициялық компаниясының теңтөрайымы Кристель Ренду де Линт басылымға.

Сонымен қатар, банк халықаралық деңгейде айыпталатын қару-жарақ түрлерін өндіретін компаниялардың акцияларына инвестиция жасамайды.