Таңғы шолу: LG Tesla-мен келісім жасады, АҚШ пен Қытай тарифтер бойынша ымыра іздеуде
ЖИ-чиптерге маманданған Groq стартапы компанияны $6 млрд деп бағалау кезінде $600 млн инвестиция тарту туралы келіссөздер жүргізіп жатыр. Бұл 2024 жылдың тамызындағы раундпен салыстырғанда екі есе жоғары. Meta компаниясы суперкомпьютерлік дата-орталықтарға ауқымды инвестициялар мен OpenAI-дің бұрынғы қызметкерлерін қоса алғанда, саланың жетекші сарапшыларын жалдау аясында тоқсандық табысы туралы есеп беруге дайындалып жатыр. Осы уақытта Оңтүстік Кореялық LG Energy Solution АҚШ нарығындағы позициясын нығайта отырып, Tesla компаниясымен энергия сақтау жүйелеріне арналған LFP аккумуляторларын жеткізу бойынша $4,3 млрд-тық келісімге қол қойды. Осы және басқа да тақырыптар — 30 шілдедегі таңғы басты шолуымызда.
LG Energy Solution Tesla-ға $4,3 млрд-қа LFP аккумуляторларын жеткізеді
Оңтүстік Кореялық LG Energy Solution Tesla-мен литий-темір-фосфатты (LFP) аккумуляторларды энергия сақтау жүйелеріне жеткізу туралы $4,3 млрд-тық келісімге келгенін Reuters агенттігіне жағдайға жақын дереккөз хабарлады. Аккумуляторлар LGES-тің АҚШ-тағы зауытынан жеткізіледі.
Tesla мен General Motors-тың негізгі жеткізушілерінің бірі саналатын LGES-тің ресми мәлімдемесінде аккумуляторлардың көлікке арналғаны не энергия сақтау жүйелеріне арналғаны нақтыланбаған. «Келісімшарт бойынша құпиялылық шарттарына байланысты клиенттің кім екенін айта алмаймыз», — деді LGES өкілдері. Tesla түсініктеме бермеді.
Келісімшарттың мерзімі 2027 жылдың тамызынан 2030 жылдың шілдесіне дейін. Қосымша келісімдер негізінде келісімшартты жеті жылға дейін ұзарту және жеткізу көлемін арттыру мүмкіндігі қарастырылған.
LGES — АҚШ-та LFP-аккумуляторларын шығаратын санаулы өндірушілердің бірі. Бұл технология ұзақ уақыт бойы Қытай компанияларының үстемдігін сақтап келген. LGES бұл өндірісті Мичиганда 2024 жылдың мамырында іске қосты.
Meta компаниясы ЖИ мен дата-орталықтарға ауқымды инвестициялар аясында табысы туралы есеп беруге дайындалуда
Facebook-тың бас компаниясы Meta сәрсенбі күні екінші тоқсан бойынша табысы жөнінде есеп жариялайды. Бұл жасанды интеллектке ауқымды инвестициялар мен ЖИ-сарапшыларын белсенді түрде жұмысқа тарту аясында жүзеге асады, деп жазады Yahoo Finance.
Жұма күні бас директор Марк Цукерберг OpenAI зерттеушісі болған Шэнцзя Чжаоның Meta-ның жаңа бөлімшесі — Superintelligence Lab-тың бас ғылыми қызметкері болып тағайындалғанын хабарлады. Чжао ChatGPT моделін жасауға қатысқан.
Бұған дейін Meta Scale AI компаниясына $14,3 млрд инвестиция салып, оның бас директоры Александр Ванды, сондай-ақ Safe Superintelligence және Apple компанияларынан бірқатар мамандарды жұмысқа алған.
Meta ЖИ-инфрақұрылымға да белсенді қаржы құйып жатыр. Цукербергтің айтуынша компания бүкіл ел аумағында көп гига-ваттты дата-орталықтар салуға жүздеген миллиард доллар жұмсауда.
Bloomberg консенсус-болжамына сәйкес сарапшылар Meta акция табысы (EPS) $5,89, ал жалпы табыс $44,83 млрд болады деп күтеді. Өткен жылы бұл көрсеткіштер тиісінше $5,16 EPS және $39,07 млрд болған.
Жарнамалық табыс жылдық көрсеткіш бойынша 15%-ға өсіп, $44,09 млрд болады деп болжануда, ал Reality Labs бөлімшесі $386 млн кіріс әкелуі тиіс.
Groq $6 млрд бағалау кезінде $600 млн инвестиция тартпақ
ЖИ-чиптерді өндірумен айналысатын Groq стартапы $6 млрд бағалау кезінде $600 млн көлемінде жаңа инвестициялық раундты тарту жөнінде келіссөздер жүргізіп жатыр, деп хабарлайды Bloomberg дереккөздерге сілтеме жасап. Келісім әлі соңына дейін бекітілмеген, шарттар өзгеруі мүмкін.
2024 жылдың тамызында Groq $2,8 млрд бағалау кезінде $640 млн инвестиция алған болатын. Яғни, қазіргі бағалау бір жылдың ішінде компания құнын екі есеге ұлғайтып отыр.
Жаңа раундқа Техас штатындағы Disruptive венчурлік компаниясы жетекшілік етуде. Ал қараша айындағы алдыңғы инвестициялық раундқа BlackRock, Neuberger Berman, Type One Ventures, сонымен қатар Cisco, KDDI және Samsung Catalyst Fund секілді корпоративтік қорлар қатысқан.
Groq компаниясын бұрын Google-де Tensor Processing Unit (TPU) чиптерін әзірлеумен айналысқан Джонатан Росс негізін қалаған.
Жаңа инвестициялық раунд мамыр айында Bell Canada компаниясымен жасалған серіктестік аясында жүзеге аспақ — Groq канадалық телеком-оператордың ауқымды ИИ жобасына инфрақұрылым жеткізеді. Сәуірде компания Meta-мен Llama 4 моделін жылдам өңдеу үшін серіктестік орнатқан болатын.
Groq та, Disruptive те Bloomberg-тің сұранысына түсініктеме берген жоқ.
АҚШ пен Қытай тарифтер бойынша шешімсіз келіссөздерді аяқтады
АҚШ пен Қытай делегациялары сейсенбі күні екі күнге созылған келіссөздерді аяқтады. Олар жаңа тарифтердің күшіне енуін кейінге шегеру туралы шешім қабылдамаған. Бұл ретте нарықтар тараптар келесі екі апта ішінде жаңа баж салығын енгізбеу үшін ымыраға келуі мүмкін бе дегенге жіті назар аударып отыр, деп хабарлайды Yahoo Finance.
«Біз Вашингтонға қайта оралып, президентпен бұл туралы ақылдасамыз», — деді АҚШ сауда өкілі Джеймисон Грир келіссөздер аяқталғаннан кейін Швецияның Стокгольм қаласында.
«Соңғы шешімді президент қабылдайды», — деп толықтырды ол.
АҚШ қаржы министрі Скотт Бессент те келіссөз нәтижелеріне пікір білдіріп, өткен екі күн «өте мазмұнды» болғанын айтып, жаңа 90 күндік шегерімнің мүмкін екенін растады. Оның айтуынша, келіссөздердің жалпы атмосферасы «өте конструктивті» болған.
Сейсенбі күні кешке АҚШ президенті Дональд Трамп Air Force One бортында журналистердің сұрақтарына жауап беріп, Бессентпен жаңа ғана сөйлескенін және шешімді брифингтен кейін қабылдайтынын мәлімдеді. Ол сондай-ақ Бессент кездесудің нәтижелерін оң бағалағанын айтты.
Нарықтарда не болып жатыр
— Жапонияның кең ауқымды Topix индексі сауда ашылғанда 0,1%-ға өсті.
— Nikkei 225 индексі өзгеріссіз қалды.
— Оңтүстік Кореяда Kospi индексі 0,48%-ға, ал шағын компаниялар индексі Kosdaq — 0,42%-ға өсті.
— Австралияның S&P/ASX 200 индексі 0,19%-ға төмендеді.
— S&P 500 фьючерстері 0,12%-ға, Nasdaq 100 — 0,20%-ға, ал Dow Jones Industrial Average фьючерстері 0,08%-ға өсті.
