Таңғы жаңалықтар: Трамптың заң жобасы қабылданды, Nvidia рекордқа жақындады
Nvidia жаңа рекордтарды жаңғыртуда. Компания акциялары тарихи максимумға жетіп, нарықтық капитализациясы $3,9 трлн-ға жақындады. Сонымен қатар, ЖИ секторында OpenAI теңқұрушысы Илья Суцкевер өзі негізін қалаған Safe Superintelligence стартапының бас директоры атанды. Бұдан бөлек, АҚШ Өкілдер палатасы Дональд Трамптың триллиондаған долларлық салықтық жеңілдіктер мен шығындарды көздейтін кең көлемді салық-бюджеттік заң жобасын (One Big Beautiful Bill) мақұлдады. Осы және өзге де тақырыптар жайлы 4 шілде таңындағы негізгі оқиғалар шолуында.
Конгресс Трамптың салық-бюджеттік заң жобасын мақұлдады
АҚШ Конгресінің төменгі палатасы — Өкілдер палатасы Дональд Трамптың кең ауқымды салық-бюджеттік заң жобасын мақұлдады. Қорытынды дауыс беру нәтижесі 218–214 болып тіркелді, деп жазады CNBC.
Бұған дейін заң жобасын Сенат бір дау айырмашылығымен қабылдаған болатын, шешуші дауыс вице-президент Джей Ди Ванске тиесілі болды. Енді құжат Трамптың қол қоюына жіберіледі. Президент бірнеше ай бойы республикалық Конгресс мүшелерінен бұл заң жобасын 4 шілдеге дейін өзіне жолдауды талап еткен еді.
Трамп «Бір Үлкен Әдемі Билл» деп атаған құжат триллион долларлық салықтық жеңілдіктер мен иммиграциялық бақылау шараларын қаржыландыруды көздейді. Бұл шығындар Medicaid және өзге де әлеуметтік бағдарламаларды айтарлықтай қысқарту арқылы өтелмек.
Nvidia тарихтағы ең қымбат компания болуға ұмтылуда
Nvidia акциялары бейсенбі күнгі сауданы рекордтық деңгейде аяқтап, нарықтағы жалпы өсім аясында 1,3%-ға қымбаттады, деп жазады Yahoo Finance.
4 шілде мейрамы қарсаңындағы қысқартылған сауда сессиясында ЖИ-чип нарығының көшбасшысы саналатын компания акциялары 2%-дан астамға көтеріліп, компанияның нарықтық капиталдық құны $3,92 трлн-ға жетті. Сауда сессиясы аяқталған сәтте бұл көрсеткіш $3,89 трлн болды — бұл 2024 жылдың соңында тіркелген Apple рекорды — $3,9 трлн-нан сәл ғана төмен. Содан бері Apple құны төмендеді, компания ЖИ жарысында басқа технологиялық алпауыттардан артта қалып, шетелде өндірілетін өнімдеріне баж салығы салынуы мүмкін деген қауіппен бетпе-бет келіп отыр.
Инвесторлар мамыр айының соңындағы күшті тоқсандық есептен кейін Nvidia акцияларын белсенді сатып алуда. Есеп бизнесінің тұрақты өсуін көрсетті,. Маусым айының соңынан бастап АҚШ-тың Қытайға чип экспортын шектеуіне қарамастан, Nvidia акциялары тарихи максимумдарды жаңартуды жалғастыруда.
Бейсенбідегі ралли 2025 жылғы әсерлі қалпына келу үрдісіне қосымша серпін берді — жыл басынан бері акциялар 19%-дан астамға өсті.
Wedbush сарапшысы Дэн Айвз Nvidia жазда-ақ $4 трлн нарықтық капитализацияға жетеді деп күтеді, ал алдағы 18 ай ішінде бұл көрсеткіш $5 трлн-нан асуы мүмкін екенін айтады. «Біз жыл соңына дейін технологиялық сектордың күшті динамикасын сақтайтынына сенеміз, — деді ол клиенттерге жолдаған жазбасында. — Біздің оптимизміміз алдағы үш жылда бизнес пен үкімет тарапынан ЖИ-ды дамытуға $2 трлн көлемінде шығын жұмсалатынын инвесторлар әлі толық бағаламады деген сенімге негізделген».
Суцкевер Safe Superintelligence компаниясының CEO-сы атанды
OpenAI теңқұрушысы Илья Суцкевер өзі 2023 жылы негізін қалаған ЖИ-стартап — Safe Superintelligence бас директоры болатынын мәлімдеді, деп хабарлайды CNBC.
Бұл мәлімдеме Meta компаниясының Safe Superintelligence-тің бұрынғы CEO-сы, кәсіпкер әрі инвестор Дэниел Гроссты өзіне тартқанынан кейін жасалды.
X әлеуметтік желісінде Суцкевер Гросстың компаниядағы мерзімі «аяқталғанын» нақтылады. Safe Superintelligence-тің тағы бір теңқұрушысы Дэниел Леви енді компания президенті қызметіне кіріседі. Ал техникалық команда тікелей Суцкеверге бағынады.
Осы арада Meta бас директоры Марк Цукерберг ЖИ мамандарын жаппай жұмысқа тартуды жалғастыруда. Ол Scale AI компаниясына $14 млрд инвестиция құйды, бұл компанияның негізін қалаушы Александр Ван және негізгі инженерлер кейін Meta-ға қосылды.
Дүйсенбі күні Цукерберг Meta Superintelligence Labs атты жаңа бөлімшенің құрылғанын жариялады. Бұл құрылым ЖИ дамытуға бағытталады және оның құрамына жетекші зерттеушілер мен инженерлер енген. Алайда жаңа қызметкерлер тізімінде Гросстың аты аталған жоқ.
CNBC мәліметінше бұған дейін Meta Safe Superintelligence-ті сатып алмақ болған, бірақ Суцкевер бұл ұсыныстан бас тартқан. 2024 жылғы сәуірдегі қаржыландыру раундынан кейін стартаптың нарықтық бағасы $32 млрд-қа бағаланған.
Суцкевер Safe Superintelligence-тің тәуелсіздігін сақтауға ниетті екенін растады: «Бізді сатып алғысы келетіндер туралы қауесеттерді естіген боларсыздар. Мұндай қызығушылық бізді қуантады, алайда біз миссиямызды орындауға басымдық береміз, — деп жазды ол. — Бізде есептеу ресурстары бар, бізде команда бар, әрі не істеу керектігін білеміз. Біз бірге қауіпсіз суперинтеллект құруды жалғастырамыз».
Үндістан нарықтық манипуляциямен күресуде
Үндістанның Қор нарығы мен биржа жөніндегі кеңесі (SEBI) америкалық Jane Street Group компаниясын ауқымды нарықтық манипуляция жасады деп айыптап, үнді қор нарығына кіруін уақытша шектеді, деп хабарлайды CNBC.
Реттеуші сайтында жарияланған уақытша шешімге сәйкес Jane Street құрылымдарына бағалы қағаздар нарығына қатысуға және бағалы қағаздарды тікелей не жанама түрде сатып алуға, сатуға немесе өзге де мәмілелер жасауға тыйым салынады.
SEBI сондай-ақ Jane Street-ке тиесілі заңсыз алынған пайда ретінде қарастырылған 48,4 млрд үнді рупиясын (шамамен $566,3 млн) бұғаттауға бұйрық берді. Банктерге Jane Street-пен байланысты шоттардан SEBI рұқсатынсыз қаражат шешуге тыйым салынды.
Компания бұл шешіммен келіспейтінін білдіріп, реттеушімен ынтымақтастықты жалғастыратынын мәлімдеді. Jane Street өкілі CNBC-ге берген түсініктемесінде компания жұмыс істейтін елдердің барлық ережелерін сақтайтынын айтты.
SEBI Jane Street түрлі стратегияларды қолданып, Үндістанның негізгі қор индикаторы — Nifty 50-ге жасанды әсер еткенін мәлімдеді. Атап айтқанда, компания сауда күнінің басында BANKNIFTY индексіне байланған акциялар мен фьючерстерді белсенді түрде сатып алып, кейіннен оның құлдырауына бәс тігуді көздейтін мәмілелер жасаған және опциондардан пайда көрген.
Реттеуші бұл әрекеттер ресми ережелерді бұзбағанымен, олардың ауқымы мен жиілігі нарықтық манипуляцияға тән екенін және «опциондармен бір мезгілде сауда жасау арқылы пайда табудан басқа экономикалық логикасы жоқ» екенін айтты.
2025 жылғы ақпанда Үндістан Ұлттық қор биржасы ресми ескерту жасағаннан кейін де мұндай әрекеттер жалғасты. Осыған байланысты SEBI компанияны «сенімсіз қатысушы» деп атап, оның әрекеттері «миллиондаған жеке инвесторлардың сеніміне қауіп төндіреді» деді.
Нарықтардағы жағдай
Азия-Тынық мұхиты нарықтары жұма күні аралас динамика көрсетті. Бұған АҚШ-тың еңбек нарығы туралы күтуден жоғары шыққан есебі әсер етіп, экономиканың баяулауына қатысты инвесторлардың алаңдаушылығын жеңілдетті.
— Жапонияның Nikkei 225 және кең ауқымды Topix индекстері құбылмалы саудада 0,2% өсті.
— Оңтүстік Кореяда Kospi индексі 1,2%-ға, ал шағын компаниялар Kosdaq индексі 1,5%-ға төмендеді.
— Қытайда CSI 300 индексі сауда күнін 0,2% төмендеумен бастады, ал Гонконгтың Hang Seng индексі 1,4%-ға құлдырады.
— Австралияда S&P/ASX 200 индексі 0,2% өсті.
АҚШ нарықтары жұма күні Тәуелсіздік күніне байланысты жабық болды. Оның қарсаңында америкалық акциялар өсті: S&P 500 және технологияларға бағытталған Nasdaq Composite индекстері еңбек нарығының мықты есебінен жаңа рекордтарға жетті.
