Таңғы шолу: S&P 500 жаңарды, Уолл-стрит еңбек нарығына назар аударуда
Жапония банкі АҚШ кедендік баждарына қатысты белгісіздіктерден туындаған үзілістен кейін мөлшерлемені қайта көтеруі мүмкін екенін аңғартты. АҚШ-та маусым айындағы еңбек нарығы туралы есеп жарияланбақ, бұл есеп жеке сектордағы жалдау қарқынының баяулауы аясында Федералды резервтік жүйенің мөлшерлемені төмендетуін күтуге түрткі болуы ықтимал. Қор нарығында Datadog акциялары компанияның S&P 500 индексіне қосылатыны жайлы хабардан кейін күрт қымбаттады. Осы және өзге де маңызды жаңалықтар 3 шілдеге арналған шолуда.
Жапонияның 30 жылдық облигацияларына сұраныс ақпаннан бергі ең жоғары деңгейге жетті
Инвесторлар бейсенбі күні өткен аукционда 30 жылдық мемлекеттік облигацияларды белсенді түрде сатып алды. Бұл – билік өкілдерінің борыш нарығындағы құбылмалылықты төмендетудегі белгілі бір жетістігін білдіреді, деп хабарлайды Bloomberg. Сұраныс пен ұсыныс арақатынасы (bid-to-cover) 3,58-ге жетіп, ақпаннан бергі ең жоғары көрсеткіш болды. Салыстыру үшін: маусым айында бұл көрсеткіш 2,92 болған, ал соңғы 12 айдағы орташа мәні – 3,33. Орташа және ең төменгі қабылданған баға арасындағы айырма (so-called tail) 0,31-ді құрап, алдыңғы орналастырудағы 0,49-дан азайған.
Маусым айында Жапония Қаржы министрлігі 2026 жылдың наурызына дейін өтеу мерзімі 20, 30 және 40 жыл болатын облигациялар орналастыру көлемін 3,2 трлн иенге ($22 млрд) қысқартатынын хабарлады. Сонымен қатар Жапония банкі мемлекеттік облигацияларды сатып алу бағдарламасын қысқарту қарқынын баяулататынын мәлімдеді.
Алайда жаһандық үрдістер мен осы айда өтетін парламенттік сайлаулар үкіметтің үлкен бюджет тапшылықтарын жабу қабілетіне деген инвесторлар сенімін тежеп отыр. Ірі жергілікті сатып алушылар – сақтандыру компаниялары секілді ұйымдар ұзақ мерзімді облигацияларға инвестиция жасаудан бас тарта бастағандықтан, 30 жылдық қағаздардың кірістілігін ұстап тұру барған сайын қиынға соғуда.
Жапония банкі басқармасының мүшесі мөлшерлемені көтеруді қайта бастауға шақырды
Жапония банкі АҚШ-тың кедендік тарифтерінің әсерін бағалау үшін алған үзілістен кейін қайтадан пайыздық мөлшерлемені көтеруді бастауы керек, деді басқарма мүшесі Хадзимэ Таката. Ол елдің инфляция бойынша Орталық банктің тұрақты мақсатына жақындап қалғанына сенімді екенін жеткізді, деп хабарлайды Reuters.
«Менің пікірімше Жапония банкі қазіргі таңда мөлшерлемені уақытша ғана тоқтатып отыр және біршама бақылаудан кейін аса жұмсақ саясаттан кету процесін жалғастыруы тиіс», — деді Таката.
«АҚШ тарапынан қабылданатын түрлі шараларға қатысты белгісіздік жоғары екенін ескере отырып, Жапония банкі шамадан тыс пессимизмге бой алдырмай, икемді ақша-несие саясатын ұстануы қажет», — деп қосты ол.
Монетарлық саясатқа қатысты бейтарап-байсалды қырынан танылған Такатаның бұл мәлімдемелері Жапония банкі мөлшерлемені қайта көтеруге дайын екенін көрсетеді. Агенттіктің жазуынша банк бұл қадамға нарық АҚШ тарифтерінің ықпалын көтере алатынына сенімді болған сәтте барады.
Таката сондай-ақ Жапония 2%-дық инфляциялық мақсатқа жетуге жақын екенін, бұл мақсатқа жоғары корпоративтік кірістер, еңбек нарығындағы тапшылық және жалақының өсуі арқылы қол жеткізіліп жатқанын атап өтті.
АҚШ-тағы әлсіз еңбек нарығы есебі ФРЖ-ның мөлшерлемені төмендету үмітін күшейтуі мүмкін, бірақ қор нарығына кері әсер етеді
Yahoo Finance-тың жазуынша бейсенбі күні жарияланатын АҚШ-тың маусым айындағы еңбек нарығы есебі жалдау қарқынының баяулауын және жұмыссыздық деңгейінің өсуін көрсетуі ықтимал. Бұл деректер АҚШ еңбек нарығының жағдайына және ФРЖ-ның алдағы пайыздық саясаттағы қадамдарына инвесторлар тарапынан ерекше назар аударылып отырған кезеңде шығады.
АҚШ Еңбек министрлігі есебін бейсенбі күні шығыс уақыты бойынша таңғы 8:30-да жариялайды. Bloomberg консенсус-болжамына сәйкес АҚШ экономикасы маусымда ауыл шаруашылығынан тыс секторда 110 000 жұмыс орнын құрған, ал жұмыссыздық деңгейі 4,3%-ға дейін өскен. Салыстыру үшін, мамырда 139 000 жұмыс орны ашылып, жұмыссыздық деңгейі 4,2% болып қалған.
Bloomberg деректері бойынша Уолл-стриттің негізгі күтімдері:
Ауыл шаруашылығынан тыс сектордағы жұмыс орны: +110 000 (мамырда +139 000).
Жұмыссыздық деңгейі: 4,3% (мамырда – 4,2%).
Орташа сағаттық жалақы, айлық өсім: +0,3% (мамырда +0,4%).
Орташа сағаттық жалақы, жылдық өсім: +3,8% (мамырда – 3,9%).
Апталық орташа жұмыс сағаты: 34,3 (өзгеріссіз).
«Біз еңбекке деген сұраныстың төмендеп жатқанын байқап отырмыз, бірақ бұл әлі де бірқалыпты деңгейде», — деп жазды Morgan Stanley-дің АҚШ бойынша бас экономисі Майкл Гейпен.
«Егер жаңа жұмыс орындарының саны 100 мыңнан аз болса немесе жұмыссыздық 4,4%-ға жетсе, бұл акция нарығын кемінде 1%-ға құлдыратуы мүмкін», — деді Citi компаниясының акциялар саудасы бөлімінің жетекшісі Стюарт Кайзер.
Datadog S&P 500 индексіне енеді
CNBC-дің хабарлауынша Datadog акциялары сәрсенбі күні кеңейтілген саудада 10%-ға өсті. Бұған себеп – S&P Global компаниясының Datadog-ты S&P 500 индексіне енгізіп, Juniper Networks-ті алмастыратынын жариялауы. Өзгерістер 9 шілде саудасынан бұрын күшіне енеді.
Ірі индекстерге енгізілген компаниялардың акциялары әдетте қымбаттайды, өйткені қор портфельдерін басқарушылар бұл өзгерістерді ескере отырып, активтерін қайта теңестіруге мәжбүр болады.
Нью-Йорктық Datadog компаниясы IPO-ны 2019 жылы өткізді. 2025 жылдың алғашқы тоқсанында компания таза табыс ретінде $24,6 млн және $761,6 млн тапты. Оның бәсекелестері қатарында Cisco, Elastic, сондай-ақ бұлтты қызметтердің алыбы Amazon мен Microsoft бар. Жағымды жаңалыққа қарамастан, жыл басынан бері Datadog акциялары технологиялық сектордан қалып қойды, сәрсенбі күнгі сауда жабылғанша олар 5,5%-ға төмендеген, ал Nasdaq индексі 5,6%-ға өсті. Соған қарамастан, Datadog-тың нарықтық капитализациясы $46,6 млрд-ты құрап, индекс медианасынан едәуір жоғары.
Нарықтағы жағдай
CNBC жазуынша, АҚШ пен Вьетнам арасындағы сауда келісімі туралы егжей-тегжейлерге қатысты күтілімдер аясында Вьетнамның қор нарығы үш жылдан астам уақыт ішіндегі ең жоғары деңгейге жетті. Президент Дональд Трамп сәрсенбі күні осы келісім туралы жариялады.
АҚШ бұл Оңтүстік-Шығыс Азия елінен келетін импортқа 20%-дық кедендік баж енгізбек, ал Вьетнам, Трамптың айтуынша америкалық тауарларға «нөлдік тариф» орнатады. Бұл мәлімдеме АҚШ тарифтеріне қатысты 90 күндік кейінге шегеру мерзімінің аяқталуына жақын қалған кезде жасалды.
Vietnam Index 0,3%-ға өсіп, 2022 жылдың сәуірінен бергі ең жоғары деңгейге жетті.
Жапонияда Nikkei 225 индексі 0,15%-ға төмендеді, Topix 0,2%-ға құлдырады.
Оңтүстік Кореяда Kospi индексі 0,8%-ға, шағын Kosdaq индексі 0,5%-ға өсті.
Аустралияда S&P/ASX 200 индексі 0,1%-ға көтерілді.
Гонконгта Hang Seng индексі 0,6%-ға төмендеді, ал Қытайдың құрлықтық CSI 300 индексі 0,1%-ға өсті.
АҚШ-тың қор индекстерінің фьючерстері аса өзгеріссіз қалды, себебі инвесторлар маусым айына арналған еңбек нарығы есебін күтуде. Алдыңғы сессияда негізгі америкалық индекстер әртүрлі бағытта қозғалды: S&P 500 жаңа күнішілік рекордқа жетіп, тарихи максимумда жабылды, Nasdaq Composite 0,9%-ға өсіп, рекордтық 20 393,13 деңгейіне жетті, ал Dow Jones 0,02%-ға төмендеп, 44 484,42 деңгейінде жабылды.
