Tesla автопилоттары қызыл жарықтан өтіп, жол ережесін бұзғаны үшін тергеуге ілікті
АҚШ-тың Ұлттық жол қозғалысы қауіпсіздігі басқармасы (NHTSA) Tesla көліктеріне қатысты 58 оқиғаны анықтағанын хабарлады. Бұл жағдайларда көліктер қарсы жолаққа шығып кеткен, қызыл жарықта тоқтамаған және басқа да жол ережелерін бұзған. Мұндай сәттер жүргізушіге көмек беретін Full Self-Driving (FSD) жүйесі қосулы болған кезде болған. Ведомство сайтында жарияланған құжатқа сәйкес, алдын ала тексеру шамамен 2,9 миллион көлікті қамтиды.
NHTSA дерегінше, кейбір оқиғалар жол апаттарына және жарақаттарға себеп болған, бірақ әзірге өлім жағдайлары тіркелмеген. Басқарма алты жағдайды ерекше атап өтті: онда FSD жүйесі іске қосылған көліктер бағдаршамның қызыл жарығына қарамастан айқас жолға кіріп, басқа көліктермен соқтығысқан. Мұндай бірнеше оқиға Мэриленд штатындағы бір ғана қиылыста қайталанған. Реттеуші Tesla компаниясы бұл учаскедегі мәселені жою үшін шара қабылдағанын мәлімдеді. Тергеу FSD жүйесінің әрекетіне байланысты қауіптердің ауқымы мен жиілігін анықтау үшін басталды, делінген NHTSA хабарламасында.
Bloomberg еске салғандай, Tesla бұған дейін де апат кезінде есіктердің автоматты ашылуындағы ақаулар және жол-көлік оқиғалары туралы деректерді уақытында бермеу бойынша тексеріліп келген. Сонымен қатар, өткен жылы реттеуші орган FSD жүйесі нашар көріну жағдайында жаяу жүргіншіні қағып кеткеннен кейін жеке тергеу бастаған болатын.
Tesla бас директоры Илон Маск 2024 жылы Дональд Трамптың сайлау науқанын қолдап, жаңа әкімшіліктегі тиімділік департаментін (DOGE) басқарған кезде Reuters бұл компанияны ондаған рет тексеруден құтқарады деп жазған еді. Алайда, The Verge ақпаратына сәйкес, биыл ақпанда DOGE автономды жүргізу қауіпсіздігін бағалаумен айналысқан NHTSA қызметкерлерін жұмыстан босатуға ықпал еткен. Ал көктем мен жаз айларында басқарма пилотсыз көліктерге қатысты бақылау және тергеу ережелерін жеңілдеткен. Бірақ Трамп пен Маск арасындағы жазғы ашық жанжал Tesla мен реттеуші органдар арасындағы қатынастарға кері әсер етуі мүмкін, деп болжады The Wall Street Journal шолушысы Квентин Уэбб. Оның айтуынша, бұл қақтығыс Tesla-ның роботаксилерді заңдастыруға және жаңа ережелер енгізуге бағытталған күш-жігерін баяулатуы ықтимал.
9 қазандағы саудада Tesla акциялары 2,1%-ға төмендеп, $429,3 деңгейіне түсті. Компания үшін бұл апта оңай болған жоқ: 7 қазанда инвесторларды қызықтырмаған жеңілдетілген Model Y нұсқасы таныстырылғаннан кейін акциялар тағы 4%-ға арзандаған.
